1 R 14
14
Tma Ayiy tqanil tu'n tkub'o'lj Jerob'oam
1Tzaj jun yab'il ti'j Ab'iy tk'wal Jerob'oam toju' tq'ijlalil lu. 2Xi'tzun tma'n Jerob'oam te t-xu'jil:
—Ch'exb'emila t-xb'aluna tu'ntzun lalun tz'el tnik'tzila qa aya nxu'jile', ex kutxi'ya toj Silo. Atzu' najla' Ayiy, ju' t-sanjelal Dyos tzaj q'mante weye qa oktoq chin okyele' te nimaqkawil teju' nintnam lu. 3Iq'inxa lajoj wab'j muqin ex jun xar ta'lkab', kutxi'ya ka'yilte tu'n ttzaj tma'n teya titi' kb'ajel ti'ju' k'wal lu, chij.
4Tb'inchatzun t-xu'jil Jerob'oam ikju'. B'aj tb'incha'ntib' ex xi'tzuntz Silo, ex pon tja Ayiy. Mixtoqti' nka'yin Ayiy, qu'n matxitoq che naju' twitz tu'n tijil, 5matxi'toqtzun tma Qman Dyos te Ayiy qa oktoq pomelu' t-xu'jil Jerob'oam xjelulte ti'ju' tal yab'toq. Ex tzaj tman titi' kxe'l tma'n teju' qya, ex tzaj tma'n qa ch'exb'e'n t-xb'alunju' qya ajtpon.
6Tetzunj t-xitb'i'n Ayiy tq'ojq'ojel tqan tej tokx ttzija, xitma'n te: kutoktza t-xu'jil Jerob'oam. ¿Titiqu'n nkub' tch'exb'e'na' tib'a? matxi' tzaj q'ma'n weye' tu'n nyoline' kuw teya, 7kutanj ti'ja ex q'manxa te Jerob'oam, lu xtma Qman Dyos ikjalu: matz'etz wiq'i'na kyxol tnam ex matz'oknq'o'na te nejenel teju' ntaname' Israel. 8Matz'el wiq'i'ne' kawb'il teju' tyajajil Dab'i tu'nt-xi' nq'o'ne' teya. Atzunta mikxa'ju'ya kse'nte Dab'i nmajine', mab'japun nchaq'b'ile' tu'n ex matz'ok lpe wi'je' tu'n tkyaqil tk'u'j, ex tnik'alkyi'ju' tb'inchb'aj nwitze'; 9aya taq'wix qexi'xju' tb'inchb'aja kyekwitzu' ẍe ten nejtl twitza; matz'oktq'o'na ntx'u'jile', matxi' che kub' tb'incha'na txqantl dyos ex tilb'ilal k'uxb'ilqe', ex matxi' chin eltik'u'na. 10Qu'mtzun ktzajel wiq'i'ne' taq'wix kyib'aju' tyajajila: knb'incha'ye' tu'n kyb'ajkyim kykyaqilju' tk'wala qa' toj Israel; mixti'x jun kjel anq'in. Che b'ajel mankun kykyaqilju' tyajajila wu'ne', kse'n nex chtet tz'is tek'. 11Tx'yan kb'ajel wankye twitze'la che b'ajelkyim toju' nintnam; aye'tzu'n che kyimel toj kojb'il k'utz kb'ajel wankye, qu'n iky oje kub' nxima'nju'ye' tu'n tb'inchet, ayine' Dyos Manb'aj, chi Dyos.
12Atzunta qya, kutxi'ya tjaya, naqa xpona toju' nintnam, kkyimelju' k'wal. 13Kykyaqiltzu'n aj Israel che oq'el ti'j, ex kb'elex kymqu'n; o'kxtzun te kb'elex mqu'nju' b'a'n kyxolu' tyajajil Jerob'oam. Qu'n o'kxku'te b'a'nxch'i'ntl matxi' tzaj tka'yi'n Qman Dyos kyxol kykyaqilju' tyajajil Jerob'oam.
14Yajxi'tzuntel k'okyel tq'o'n jun nimaqkawil tib'aj Israel, che mankulu' tyajajil Jerob'oam tu'n toju' tq'ijlalil ktenb'el. Kxe'l qex ja'lo 15che b'ajel tchto'n Qman Dyos aj Israel kse'n nche b'ajxyiju'n ajlaj tu'n tnimal a'. Che jawil xb'oqi'n toju' tb'anil tx'otx' lu kyajni tq'o'n kyeju' ojtxi' qyajilb'en, ex che kxe'l t-xon ti'jxi' nin a' Ewprates, qu'n matz'okkyq'o'n ttx'u'jil Qman Dyos tu'n tpaju' xkub' kyb'incha'n tilb'ilal Astarte. 16Che kjel ttzaqpi'n Qman Dyos aj Israel tu'n kpaju' til Jerob'oam ju' xxi' q'onkye aj Israel toj il, chi Ayiy t-sanjelal Dyos.
17Anjtzun ti'ju' t-xu'jil Jerob'oam ex pon Tirsa; ex naqnokx ttziju' tja, kyimju' k'wal. 18Kykyaqilju' aj Israel exi' muqul ex e'oq' ti'j, kse'nxju' tma Qman Dyos tu'nelju' t-sanjelal, Ayiy.
19Atzu'n jni'tl tqanil ti'j Jerob'oam, tej tq'ojin ex junjuntl tqanil ti'ju' tkawb'il, tz'ib'a'nqe' toju' tu'jil tqanil kyb'inchb'aju' nimaqkawil toj Israel. 20Junaq kab'e' (22) ab'q'i kawin Jerob'oam, tetzunj tkyim, kawin Nadab' ju' tk'wal te t-xel.
Tkawb'il Rob'oam toj Juda
(2 Cr 12.1-16)
21Atoq Rob'oam tk'wal Salomon in kawin toj Juda. Tetoq kab'naq jun (41) ab'q'i tej ttzyet tkawin, ex kawin wuqlajoj ab'q'i toju' nintnam Jerusalen, jaw t-sk'o'n Qman Dyos jatu'n tna'njtza' tb'i kyxol kykyaqil nimaqkytanam tnej tyajajil Israel. Naama tb'iju' ttxu Rob'oam, ex aj Amon.
22Taq'wixi'xtzun b'je'la'ju' tb'inchb'aj Rob'oam toj twitz Qman Dyos, tzajxi'xtl ttx'u'jil Qman Dyos tu'n tpaj kyetwitz tkyaqilju' il kyb'inchaju' ojtxi' tyajilb'en, 23qu'n ex ikxkye e'jaw kyb'incha'n kyja witzleb', ex eb'jaw kyb'incha'n ab'j ex ẍwank te kyxjan kywi'yile kykyaqil witz nimaq kywe' ex kyjaq' tze pujin kyxaq. 24Ikqe'xju' xjal ate'toq toj tnam intoq kyb'incha'n ajpaji'n toj kyk'u'lb'il, ex intoq kyb'incha'n tkyaqilju' taq'wixil nkyb'incha'n txqantl tnam min nche niman te Dyos, ju' eb'je'x t-xla'ja'n Qman Dyos kywitzku' aj Israel.
25Oktzaqpaj Sisak nimaqkawil toj Ejipt q'ojil ti'j Jerusalen toj tjwe'yin ab'q'i ttzyetlen tkawin Rob'oam, 26eb'je'xtiq'i'nju' k'uwenj toj tja Dyos ex toju' ja te kawb'il. Tkyaqil eb'je'x tiq'i'n, ex eb'ajx tiq'i'nju' kolb'il q'anpwaqqe' e'kub' tb'incha'n Salomon. 27Ekub'tzun tb'incha'n nimaqkawil Rob'oam kolb'il q'ank'uxb'ilqe' te kyxel, ex e'kyaj tq'o'n toj kyq'ob'u' nejenel kye xjal te q'oj intoq che xq'uqin ttziju' tja te kawb'il. 28Atltoqtzun junjun maj ajt-xi' nimaqkawil toj tja Dyos, aye'tzu'n xq'uqil intoq che'x tuk'i'l intoq che'x kyiq'i'n kolb'il. Ex intoq che kub' kyq'o'n jumajtl toju' kyja xq'uqil.
29Atzu'n jni'tl tqanil ti'j Rob'oam ex tkyaqilju' tb'incha, tz'ib'a'nqe' toju' tu'jil tqanil kyb'inchb'aju' nimaqkawil toj Juda.
30Ten q'oj kukxju' kyxol Rob'oam tuk'i'l Jerob'oam. 31Tetzunj tkyim Rob'oam, ku'x mqu'n kyk'etzju' ojtxi' tchman toj Ninttanam Dab'i. Naama tb'iju' ttxu, aj Amon. Yajxi'tzuntl kyejten Ab'yam ju' tk'wal te nimaqkawil te t-xel.
Currently Selected:
1 R 14: MAMO
Highlight
Share
Copy
Want to have your highlights saved across all your devices? Sign up or sign in
Biblia Mam Ostuncalco © Sociedad Bíblica de Guatemala 1999