ISAIAS 54
54
Jaunak berriro emaztetzat hartu Jerusalem
1Egin poz-oihu, Jerusalem,
emakume agor
eta haur gabe horrek!
Ekin kantari pozaren pozez,
erdiminik izan ez duzun horrek!
Jaunak baitio:
«Bakarrik utziaren seme-alabak
gehiago izango dira
senardunarenak baino».#Ga 4,27an aipatua. emakume agor 1 Sm 2,5; Sal 113,9.
2Zabalagotu
zeure etxolaren esparrua,
hedatu beldur gabe
zeure egoitza-oihalak;
luzatu lokarriak,
sartu gogor ziriak,#Zabalagotu etxola 49,20; Jr 10,20. Ik. 26,15; 33,20.
3ezker-eskuin haziko baitzara;
zure ondorengoek
nazio asko berenganatuko dituzte
eta orain hondaturik dauden
hirietan biziko dira.
4Ez beldurtu,
ez zara barregarri geldituko;
ez lotsatu, ez zaituzte laidotuko.
Ahaztu egingo duzu
gaztetako lotsaizuna,
ez zara oroituko
alargun zineneko laidoaz#54,4 gaztetako lotsaizuna: Egiptoko esklabotza-garaia, artean Jaunak ez baitzuen herria emaztetzat hartua; alargun zineneko laidoa: Babiloniako erbestealdia da, herria Jaunak, senarrak, utzitako emazte bezala (ik. 6. tx.) zegoeneko garaia, alegia.,
5egin zintuenak emaztetzat
hartuko baitzaitu:
Jaun ahalguztiduna, horixe du izena.
Israelen Jainko santua da
zure askatzailea:
lur osoaren Jainkoa deritza.#emaztetzat hartuko Os 2,21+. Ik. 49,14-21; 50,1.
6Senarrak utziriko emaztea,
emazte atsekabetua zinen,
baina Jaunak berriro dei egin dizu.
Hau dio Jaunak:
«Utz ote daiteke
gaztetako emaztea?#Senarrak utzitako emaztea 49,14+. gaztetako emaztea Ml 2,14-16; Es 5,18.
7Unetxo batez utzi zintudan,
baina gupidarik handienaz
hartuko zaitut.
8Haserrealdi batean, unetxo batez
aurpegia ezkutatu nizun,
baina etengabe maite zaitudalako
gupidatu naiz zutaz.
Hala diot nik, Jaunak,
zure askatzaileak.#unetxo batez Sal 30,6. aurpegia ezkutatu 8,17+; 59,2. etengabe maite 60,10; Jr 31,3+.
9Noeren uholdekoan bezala
gertatzen zait:
zin egin nuen orduan
ez zela berriro uholderik
izango munduan,
eta halaxe egiten dut zin orain
ez naizela zurekin
berriro haserretuko,
ez dizudala gehiago
mehatxurik egingo.#berriro uholderik ez Has 8,21-22; 9,11-16; Jr 31,35-37.
10Mendiak beren lekutik aldenduko
eta muinoak koloka jarriko balira ere,
nire maitasuna
ez da zuregandik aldenduko,
zure zorionaren aldeko
nire konpromisoak
ez du kolokarik egingo.
Hala diot nik, barru-barrutik
maite zaituen Jaunak».#Mendiak tokiz aldatu Hab 3,6; Sal 46,3-4; Jdt 16,15. nire konpromisoa Ez 34,25; 37,26. ez du kolokarik egingo Jr 31,31-34; 33,20-21; Erm 11,29.
Jerusalem berria
11Oi Jerusalem, zoritxarreko hiri,
ekaitzak astindua,
inork kontsolatu gabea!
Jaspezko oinarri gainean
eraikiko zaitut,
zafirozko zimendu gainean ezarriko.#harribitxiz eraikiko hiria Tb 13,16-17; Ap 21,18-21.
12Dorreak errubiz
eta ateak esmeraldaz
egingo dizkizut,
harribitxiz harresi guztiak.
13Zure seme-alabak nire ikasle
izango dira
eta denak zorion betean biziko.#nire ikasle 50,4; Jr 31,34; Jn 6,45.
14Justizian sendo ezarria egongo zara.
Zapalkuntzatik libre izango zara
eta ez duzu ezeren beldurrik izango,
ikara ez zaizu inoiz hurbilduko.#Justizian ezarria 1,26-27; 28,16-17. ezeren beldurrik gabe Sal 91; 121.
15Inork erasotzen badizu,
ez da nire baimenaz izango;
zure kontra lehertuko da erasotzailea.#zure kontra lehertuko Lk 20,18.
16Nik egin dut artisaua,
txingarrari haize emanez
helburu ezberdinetarako tresnak
egiten dituena;
eta nik egin dut suntsitzailea,
hondaketa helburu duena.
17Baina zure kontra egindako arma,
huts gertatuko da;
auzitan salatuko zaituena
erruduntzat utziko duzu.
Hauxe da
Jaunaren zerbitzarien senipartea,
nik ematen diedan garaipena.
Nik, Jaunak, esana.#kontrako armak huts gertatuko 37,33-37; 49,25-26.
Currently Selected:
ISAIAS 54: EAB
Highlight
Share
Copy
Want to have your highlights saved across all your devices? Sign up or sign in
Elizen Arteko Biblia (EAB) Biblia en Euskara, Traducción Interconfesional) Copyright © Sociedad Bíblica de España, 2008 Utilizada con permiso