رِسَالَةْ فِلِيمُونْ 1
1
السّْلَامْ
1مْنْ بُولُسْ، الْمْسْجُونْ عْلَى وْدّْ يَسُوعْ الْمَسِيحْ، وْمْنْ تِيمُوتَاوُسْ خُونَا فْالْإِيمَانْ، لْفِلِيمُونْ خُونَا الْعْزِيزْ اللِّي كَيْعَاوْنَّا فْالْخْدْمَة دْ الرَّبّْ، 2وْلْخْتْنَا فْالْإِيمَانْ أَبْفِيَّة، وْلْأَرْخِيبُّوسْ اللِّي كَيْكَافْحْ مْعَانَا، وْلْلنَّاسْ دْيَالْ الْكْنِيسَة اللِّي كَيْتّْجَمْعُو فْدَارْكْ.#كولوسي 4:17 3النِّعْمَة وْالْهْنَا لِيكُمْ مْنْ اللَّهْ بَّانَا وْالرَّبّْ يَسُوعْ الْمَسِيحْ.
بُولُسْ كَيْشْكَرْ اللَّهْ عْلَى الْمْحَبَّة دْيَالْ فِلِيمُونْ
4دِيمَا كَنْشْكَرْ اللَّهْ مْلِّي كَنْتّْفَكّْرَكْ فْصْلَاتِي، 5حِيتْ كَنْسْمَعْ عْلَى الْمْحَبَّة دْيَالْكْ لْݣَاعْ الْمُومْنِينْ الْمْقَدّْسِينْ، وْالْإِيمَانْ اللِّي عَنْدْكْ فْالرَّبّْ يَسُوعْ. 6وْكَنْطْلَبْ اللَّهْ بَاشْ تْكُونْ الشّْرْكَة دْ الْإِيمَانْ دْيَالْكْ مْعَانَا قْوِيَّة، وْهَكَّا غَيْتّْعَرْفُو الْبَرَكَاتْ دْيَالْ الْمَسِيحْ اللِّي عَنْدْنَا. 7رَاهْ الْفَرْحَة دْيَالِي كْبِيرَة، وْتّْشَجّْعْتْ بْزَّافْ بْسْبَابْ الْمْحَبَّة دْيَالْكْ آ خُويَا، عْلَاحْقَّاشْ فَرّْحْتِي قْلُوبْ الْمُومْنِينْ الْمْقَدّْسِينْ.
بُولُسْ كَيْطْلَبْ مْنْ فِلِيمُونْ بَاشْ يْسَامْحْ أُنِسِيمُسْ
8عْلَى هَادْشِّي، وَاخَّا عَنْدِي الشَّجَاعَة الْكَامْلَة فْالْمَسِيحْ بَاشْ نْآمْرَكْ أَشْنُو خَاصّْكْ تْدِيرْ، 9فَضّْلْتْ نْتّْرَجَّاكْ عْلَى وْدّْ الْمْحَبَّة اللِّي بِينَاتْنَا، أَنَا بُولُسْ الْكْبِيرْ فْالْعْمَرْ، وْاللِّي مْسْجُونْ دَابَا عْلَى وْدّْ يَسُوعْ الْمَسِيحْ. 10كَنْطْلْبَكْ مْنْ جِهْةْ أُنِسِيمُسْ اللِّي وْلَّى وْلْدِي فْالْمَسِيحْ وْأَنَا فْالْحَبْسْ.#كولوسي 4:9 11مْنْ قْبَلْ رَاهْ مَا كَانْشْ صَالْحْ لِيكْ، وَلَكِنْ دَابَا وْلَّى صَالْحْ لِيكْ وْلِيَّ. 12هَانِي غَنْصِيفْطُه لِيكْ، رَاهْ هُوَ بْحَالْ نْفْسِي. 13كْنْتْ بَاغِي نْشَدُّه عَنْدِي بَاشْ يْعَاوْنِّي فْبْلَاصْتْكْ، فْالْوَقْتْ اللِّي أَنَا فِيهْ مْسْجُونْ عْلَى وْدّْ الْإِنْجِيلْ. 14وَلَكِنْ مَا بْغِيتْ نْدِيرْ حْتَّى حَاجَة بْلَا الْمُوَافَقَة دْيَالْكْ، بَاشْ مَا تْدِيرْشْ الْخِيرْ بَزّْزْ وَلَكِنْ بْخَاطْرَكْ. 15يْمْكَنْ تّْفْرَقْ عْلِيكْ أُنِسِيمُسْ لْوَقْتْ قْلِيلْ بَاشْ يْبْقَى مْعَاكْ دِيمَا، 16حِيتْ دَابَا مَا بْقَاشْ عَبْدْ وَلَكِنْ وْلَّى حْسَنْ مْنْ الْعَبْدْ، رَاهْ هُوَ خُو عْزِيزْ بْزَّافْ، بْالْخُصُوصْ عَنْدِي، إِيوَا كِيفَاشْ مَا يْكُونْشْ عْزِيزْ عَنْدْكْ كْتَرْ، حِيتْ هُوَ بْنَادْمْ وْخُونَا فْالرَّبّْ.
17إِلَا كْنْتِ كَتْحْسَبْنِي شْرِيكْكْ، قْبْلُه بْحَالْ إِلَا كْنْتْ أَنَا. 18وْإِلَا ضْلْمَكْ فْشِي حَاجَة، وْلَا كَتّْسَالُه شِي فْلُوسْ، حْسَبْ هَادْشِّي عْلِيَّ. 19وْأَنَا بُولُسْ كَنْكْتَبْ لِيكْ بْيْدِّي: رَانِي غَادِي نْرَدّْ لِيكْ فْلُوسْكْ، وْمَا غَادِيشْ نْفَكّْرَكْ بْلِّي حْتَّى نْتَ مْدْيُونْ لِيَّ بْحْيَاتْكْ. 20إِيِّهْ آ خُويَا، دِيرْ فِيَّ هَادْ الْخِيرْ عْلَى وْجَهْ الرَّبّْ وْفَرّْحْ قَلْبِي فْالْمَسِيحْ. 21رَاهْ عَنْدِي التِّقَة وْأَنَا كَنْكْتَبْ لِيكْ بْلِّي غَادِي تْطِيعْ كْلَامِي، وْرَانِي عَارْفْ بْلِّي غَتْدِيرْ كْتَرْ مْنْ دَاكْشِّي اللِّي كَنْطْلَبْ.
22وْفْنَفْسْ الْوَقْتْ، وَجّْدْ لِيَّ فِينْ نْسْكُنْ، حِيتْ كَنْتّْرَجَّا مْنْ اللَّهْ بَاشْ يْسْتَاجْبْ لْلصّْلَاة دْيَالْكُمْ وْنْرْجَعْ لْعَنْدْكُمْ.
السّْلَامْ
23كَيْسَلّْمْ عْلِيكْ أَبَفْرَاسْ اللِّي مْسْجُونْ مْعَايَ عْلَى وْدّْ الْمَسِيحْ يَسُوعْ،#كولوسي 1:7؛ 4:12 24وْكَيْسَلّْمْ عْلِيكْ مَرْقُسْ وْأَرِسْتَرْخُسْ وْدِيمَاسْ وْلُوقَا اللِّي كَيْعَاوْنُونِي فْالْخْدْمَة دْ الرَّبّْ.#الاعمال 12:12،25؛ 13:13؛ 15:37-39؛ كولوسي 4:10؛ الاعمال 19:29؛ 27:2؛ كولوسي 4:10؛ كولوسي 4:14؛ 2تيموتاوس 4:10؛ كولوسي 4:14؛ 2تيموتاوس 4:11
25وْالنِّعْمَة دْيَالْ رَبّْنَا يَسُوعْ الْمَسِيحْ تْكُونْ مْعَ رُوحْكُمْ.
Currently Selected:
رِسَالَةْ فِلِيمُونْ 1: MSTD
Highlight
Share
Copy
Want to have your highlights saved across all your devices? Sign up or sign in
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved