كُورِنْتُوسْ التَّانِيَّة 2

الْفَصْلْ التَّانِي

1عْلَى هَادْشِّي قَرّْرْتْ مَا نْرْجَعْشْ لْعَنْدْكُمْ عَاوْتَانِي، بَاشْ مَا نْتّْسَبّْبْشْ لِيكُمْ فْالْحُزْنْ مَرَّة خْرَى. 2حِيتْ إِلَا تْسَبّْبْتْ لِيكُمْ فْالْحُزْنْ، شْكُونْ هَادَا اللِّي غَيْفَرّْحْنِي مْنْ غِيرْ اللِّي تْسَبّْبْتْ لِيهْ فْالْحُزْنْ؟ 3وْرَانِي كْتَبْتْ لِيكُمْ هَادْشِّي بَاشْ مْلِّي نْجِي لْعَنْدْكُمْ، مَا يْحَزّْنُونِيشْ هَادُوكْ اللِّي كَانْ خَاصّْ نْفْرَحْ بِيهُمْ، وْأَنَا مْتْيِقّْنْ بْلِّي الْفَرْحَة دْيَالِي هِيَ الْفَرْحَة دْيَالْكُمْ كُلّْكُمْ. 4حِيتْ كْتَبْتْ لِيكُمْ، وْقَلْبِي عَامْرْ بْالْهَمّْ وْالْغَمّْ وْأَنَا كَنْبْكِي بْالدّْمُوعْ، مَاشِي بَاشْ تْحَزْنُو، وَلَكِنْ بَاشْ تْعَرْفُو مْحَبّْتِي الْكْبِيرَة لِيكُمْ.

سَامْحُو لْلِّي غْلَطْ

5إِلَا تّْسَبّْبْ شِي وَاحْدْ فْالْحُزْنْ، رَاهْ مَا تّْسَبّْبْشْ فِيهْ لِيَّ أَنَا، وَلَكِنْ لِيكُمْ كُلّْكُمْ، وَاخَّا غِيرْ شْوِيَّة بَاشْ مَا نْتَقّْلْشْ عْلِيكُمْ. 6بْحَالْ هَادَا، رَاهْ بَرَكَا عْلِيهْ غِيرْ الْعِقَابْ بَاشْ عَاقْبُوهْ الْأَغْلَبِيَّة فِيكُمْ. 7وْعْلِيهَا رَاهْ بْالْعَكْسْ، خَاصّْكُمْ تْسَامْحُوهْ وْتْوَاسِيوْهْ، بَاشْ مَا يْغْرَقْشْ فْكْتْرَةْ الْحُزْنْ. 8دَاكْشِّي عْلَاشْ كَنْطْلَبْ مْنّْكُمْ بَاشْ تْزِيدُو تْبَيّْنُو لِيهْ الْمْحَبَّة دْيَالْكُمْ. 9حِيتْ هَادْشِّي عْلَاشْ كْتَبْتْ لِيكُمْ، بَاشْ نْعْرَفْ بْالْبُرْهَانْ وَاشْ كَتْطِيعُونِي فْكُلّْ حَاجَة. 10رَاهْ اللِّي سَامْحْتُوهْ حْتَّى أَنَا سَامْحْتُه. حِيتْ إِلَا سَامْحْتْ عْلَى شِي حَاجَة، رَاهْ كَنْدِيرْ هَادْشِّي عْلَى وْدّْكُمْ قُدَّامْ الْمَسِيحْ، 11بَاشْ مَا يْخْدَعْنَاشْ الشِّيطَانْ، حِيتْ حْنَا عَارْفِينْ النِّيَة دْيَالُه.

النّْصَرْ فْالْمَسِيحْ

12وْمْلِّي وْصَلْتْ لْمْدِينْةْ تَرْوَاسْ بَاشْ نْخَبّْرْ بْإِنْجِيلْ الْمَسِيحْ، وْتّْحَلّْ لِيَّ الْبَابْ بَاشْ نْخْدَمْ لْلرَّبّْ،#الاعمال 20‏:1 13مَا كَنْتْشْ هَانِي فْخَاطْرِي، حِيتْ مَا لْقِيتْشْ خُويَا تِيطُسْ، وْتّْوَادْعْتْ مْعَ الْخُوتْ وْسَافْرْتْ لْبْلَادْ مَكِدُونِيَة.

14وَلَكِنْ كَنْشْكَرْ اللَّهْ اللِّي كَيْدِّينَا دِيمَا فْطْرِيقْ النّْصَرْ فْالْمَسِيحْ، وْكَيْسْتَخْدْمْنَا فْكُلّْ مُوضْعْ بَاشْ تْفُوحْ الرِّيحَة دْيَالْ الْمَعْرِفَة دْيَالُه. 15عْلَاحْقَّاشْ حْنَا الرِّيحَة الْمْزْيَانَة دْيَالْ الْمَسِيحْ لْلَّهْ، مْنْ بِينْ هَادُوكْ اللِّي نْجَاوْ وْهَادُوكْ اللِّي غَيْتّْهَلْكُو. 16عَنْدْ شِي وْحْدِينْ رِيحَة دْ الْمُوتْ اللِّي كَتْدِّي لْلْمُوتْ، وَلَكِنْ عَنْدْ لْخْرِينْ رِيحَة دْ الْحَيَاةْ اللِّي كَتْدِّي لْلْحَيَاةْ. إِيوَا شْكُونْ اللِّي قَادْرْ يْدِيرْ هَادْ الْأُمُورْ؟ 17حِيتْ حْنَا مَاشِي بْحَالْ بْزَّافْ دْ النَّاسْ كَنْتَاجْرُو بْكْلَامْ اللَّهْ، وَلَكِنْ رَاهْ نِيّْتْنَا مْزْيَانَة، كَنْتّْكَلّْمُو مْنْ اللَّهْ قُدَّامْ اللَّهْ وْحْنَا فْالْمَسِيحْ.

Currently Selected:

كُورِنْتُوسْ التَّانِيَّة 2: MSTD

Highlight

Copy

Compare