كُورِنْتُوسْ التَّانِيَّة 11
11
الْفَصْلْ حْضَاشْ
بُولُسْ وْالرُّسُلْ الْكْدَّابِينْ
1مْصَّابْ تْصَبْرُو شْوِيَّة عْلَى الْحْمَاقْ دْيَالِي! إِيِّهْ، صْبْرُو مْعَايَ! 2رَانِي كَنْغِيرْ عْلِيكُمْ غِيرَة مْنْ اللَّهْ، حِيتْ خْطَبْتْكُمْ لْرَاجْلْ وَاحْدْ، وْقَدّْمْتْكُمْ عْزْبَة نْقِيَّة لْلْمَسِيحْ. 3وَلَكِنْ كَنْخَافْ بْاللِّي كِمَا غْرَّاتْ اللّْفْعَى حَوَّاءْ بْالْحِيلَة دْيَالْهَا، غَيْفَسْدُو عْقُولْكُمْ وْيْبَعّْدُو عْلَى الْمْحَبَّة الصَّادْقَة وْالنّْقِيَّة اللِّي فْالْمَسِيحْ. 4حِيتْ كُونْ جَا شِي وَاحْدْ وْخَبّْرْكُمْ عْلَى شِي يَسُوعْ آخُرْ مْنْ غِيرْ اللِّي خَبّْرْنَاكُمْ عْلِيهْ، وْلَا كُونْ قْبَلْتُو شِي رُوحْ آخُرْ مْنْ غِيرْ الرُّوحْ اللِّي خْدِيتُوهْ، وْلَا شِي إِنْجِيلْ آخُرْ مْنْ غِيرْ هَادَاكْ اللِّي قْبَلْتُوهْ، كُونْ رَاهْ غَتّْحَمّْلُوهْ بْزَّافْ. 5حِيتْ مَا كَنْشُوفْشْ بْلِّي نَاقْصَانِي شِي حَاجَة عْلَى الرُّسُلْ الْكْبَارْ، 6وَلَكِنْ إِلَا كْنْتْ مَا كَنْعْرَفْشْ نْهْضَرْ مْزْيَانْ، رَاهْ مَا كَتْنْقَصْنِيشْ الْمَعْرِفَة، وْحْنَا بَيّْنَّا لِيكُمْ مْزْيَانْ هَادْ الْأُمُورْ بْطُرُقْ مْخْتَلْفَة. 7وْلَا وَاشْ غْلَطْتْ مْلِّي طِيّْحْتْ مْنْ شَانِي بَاشْ يْعْلَى شَانْكُمْ نْتُمَ، عْلَاحْقَّاشْ خَبّْرْتْكُمْ بْإِنْجِيلْ اللَّهْ بْلَا خْلَاصْ؟ 8رَاهْ خْدِيتْ مْنْ كْنَايْسْ خْرِينْ الْخُلْصَة عْلَى وْدّْ خْدَمْتِي لِيكُمْ. 9وْمْلِّي كْنْتْ مْحْتَاجْ وْأَنَا عَنْدْكُمْ، مَا تَقّْلْتْ عْلَى حْتَّى شِي وَاحْدْ، حِيتْ الْخُوتْ اللِّي جَاوْ مْنْ مَكِدُونِيَة عْطَاوْنِي دَاكْشِّي اللِّي كْنْتْ مْحْتَاجْ لِيهْ. وْهَكَّا مَا تَقّْلْتْشْ عْلِيكُمْ، وْعَمّْرِي مَا غَنْتَقّْلْ عْلِيكُمْ.#فيليبي 4:15-18 10وْبْالْحَقّْ دْيَالْ الْمَسِيحْ اللِّي فِيَّ، رَاهْ حْتَّى وَاحْدْ فْمَنْطَقَةْ أَخَائِيَة مَا يْقْدَرْ يْحَيّْدْ لِيَّ هَادْ الْإِفْتِخَارْ. 11عْلَاشْ؟ وَاشْ حِيتْ مَا كَنْبْغِيكُمْشْ؟ رَاهْ اللَّهْ عَارْفْ. 12وَلَكِنْ دَاكْشِّي اللِّي كَنْدِيرُه غَنْبْقَى نْدِيرُه، بَاشْ مَا نْعْطِيشْ الْوْجْبَة لْهَادُوكْ اللِّي بَاغْيِينْ الْوْجْبَة بَاشْ يْبَيّْنُو بْلِّي حْتَّى هُمَ بْحَالْنَا فْالْأُمُورْ اللِّي كَيْفْتَخْرُو بِيهَا. 13حِيتْ بْحَالْ هَادُو، رَاهُمْ رُسُلْ كْدَّابِينْ وْغْشَّاشِينْ، وْكَيْبَيّْنُو رَاسْهُمْ بْحَالْ الرُّسُلْ دْيَالْ الْمَسِيحْ. 14وْمَا عَنْدْنَا عْلَاشْ نْتّْعَجّْبُو، حِيتْ الشِّيطَانْ بْرَاسُه بَيّْنْ رَاسُه بْحَالْ مَلَاكْ النُّورْ. 15إِيوَا مَاشِي شِي حَاجَة كْبِيرَة إِلَا مَا بَيّْنُوشْ الْخْدَّامَا دْيَالُه رَاسْهُمْ بْحَالْ الْخْدَّامَا اللِّي كَيْدِيرُو الْأُمُورْ اللِّي كَتْرْضِي اللَّهْ، وْهَادُو رَاهْ الْعَاقِبَة دْيَالْهُمْ فْاللّْخْرْ غَتْكُونْ عْلَى حْسَابْ أَعْمَالْهُمْ.
الْعْدَابْ اللِّي قَسَاهْ بُولُسْ عْلَى وْدّْ الْخْدْمَة دْيَالْ الْمَسِيحْ
16كَنْعَاوْدْ نْݣُولْ لِيكُمْ: حْتَّى حَدّْ مَا يْفَكّْرْ بْلِّي رَانِي حْمَقْ. وْحْتَّى إِلَا كْنْتْ ݣَاعْ حْمَقْ، غِيرْ قْبْلُونِي، بَاشْ نْفْتَخْرْ حْتَّى أَنَا شْوِيَّة. 17دَاكْشِّي اللِّي كَنْݣُولُه، رَاهْ مَاشِي الرَّبّْ اللِّي بْغَانِي نْݣُولُه، وَلَكِنْ كَنْݣُولُه بْحَالْ شِي حْمَقْ عَنْدُه الزّْعَامَة بَاشْ يْفْتَخْرْ. 18وْحِيتْ بْزَّافْ دْ النَّاسْ كَيْفْتَخْرُو عْلَى حْسَابْ الدَّاتْ، إِيوَا حْتَّى أَنَا غَنْفْتَخْرْ. 19نْتُمَ اللِّي بْعْقَلْكُمْ رَاكُمْ كَتْصَبْرُو بْالْفَرْحَة مْعَ اللِّي مَا عَنْدْهُمْ عْقَلْ. 20وْفْالْحَقِيقَة، رَاكُمْ كَتْصَبْرُو مْعَ كُلّْ وَاحْدْ كَيْدِيرْكُمْ بْحَالْ الْعْبِيدْ، وْلَا كَيْسْتَغْلّْكُمْ، وْلَا كَيْسْرَقْكُمْ، وْلَا كَيْتّْكَبّْرْ عْلِيكُمْ، وْلَا كَيْضْرَبْكُمْ عْلَى وْجْهْكُمْ. 21رَانِي حْشْمَانْ نْݣُولْ بْلِّي كْنَّا ضْعَافْ فْأَيّْ حَاجَة دْرْنَاهَا مْعَاكُمْ، وَلَكِنْ ݣَاعْ اللِّي كَيْفْتَخْرُو بِيهْ هَادُوكْ، وْهْنَا كَنْتّْكَلّْمْ بْحَالْ شِي وَاحْدْ حْمَقْ، كَنْفْتَخْرْ بِيهْ حْتَّى أَنَا. 22وَاشْ هُمَ عِبْرَانِيِّينْ؟ حْتَّى أَنَا. وَاشْ هُمَ إِسْرَائِيلِيِّينْ؟ حْتَّى أَنَا. وَاشْ هُمَ مْنْ تْرِّيكْةْ إِبْرَاهِيمْ؟ حْتَّى أَنَا. 23وَاشْ هُمَ خُدَّامْ دْيَالْ الْمَسِيحْ؟ كَنْتّْكَلّْمْ بْحَالْ شِي حْمَقْ، رَاهْ أَنَا حْسَنْ مْنّْهُمْ، فْتَمَارَة تْكَرْفَصْتْ كْتَرْ مْنّْهُمْ وْفْالْحَبْسْ قَاسِيتْ كْتَرْ مْنّْهُمْ، وْفْالضَّرْبْ صْبَرْتْ كْتَرْ مْنّْهُمْ، وْوْصَلْتْ لْلْمُوتْ بْزَّافْ دْيَالْ الْمَرَّاتْ.#الاعمال 16:23 24صَوّْطُونِي لِيهُودْ خَمْسَة دْ الْمَرَّاتْ، فْكُلّْ مَرَّة تْسْعُودْ وْتْلَاتِينْ ضَرْبَة. 25تْلَاتَة دْ الْمَرَّاتْ تّْضْرَبْتْ بْالْعْصِي، وْمَرَّة وَحْدَة تّْرْجَمْتْ بْالْحْجَرْ، وْتْلَاتَة دْ الْمَرَّاتْ تّْهَرّْسَاتْ بِيَّ السّْفِينَة، وْدَوّْزْتْ لِيلَة وْنْهَارْ فْوَسْطْ الْبْحَرْ.#الاعمال 16:22؛ الاعمال 14:19 26وْفْالسّْفَرْ دْيَالِي الْكْتِيرْ تّْعَرّْضْتْ لْلْخَطَرْ فْالْوِيدَانْ اللِّي كَيْفِيضُو، وْتّْعَرّْضْتْ لْلْخَطَرْ مْنْ الشّْفَارَا، وْالْخَطَرْ مْنْ لِيهُودْ وْمْنْ اللِّي مَاشِي يْهُودْ، وْتّْعَرّْضْتْ لْلْخَطَرْ فْالْمْدُونْ وْفْالْخْلَا وْفْالْبْحَرْ وْتّْعَرّْضْتْ لْلْخَطَرْ مْنْ شِي خُوتْ مُنَافِقِينْ،#الاعمال 9:23؛ الاعمال 14:5 27وْقَاسِيتْ مْنْ الْعْيَا وْتَمَارَة وْمْنْ كْتْرَةْ السّْهِيرْ، وْتّْقْهَرْتْ بْالجُّوعْ وْالْعْطَشْ وْقَلّْةْ الْمَاكْلَة، وْمْنْ الْبَرْدْ وْقَلّْةْ اللّْبَاسْ. 28وْزْيَادَة عْلَى هَادْشِّي، كَنْهَزّْ الْهَمّْ كُلَّ نْهَارْ لْلْكْنَايْسْ كُلّْهُمْ. 29شْكُونْ اللِّي ضْعَافْ فْالْإِيمَانْ وْمَا ضْعَافِيتْشْ مْعَاهْ؟ وْشْكُونْ اللِّي طَاحْ فْالدّْنُوبْ وْمَا تّْحْرَقْتْشْ عْلِيهْ؟ 30إِيوَا إِلَا كَانْ خَاصّْنِي نْفْتَخْرْ، رَاهْ غَنْفْتَخْرْ بْالْأُمُورْ اللِّي كَتْبَيّْنْ الضُّعْفْ دْيَالِي. 31وْاللَّهْ بُو رَبّْنَا يَسُوعْ، اللِّي مْبْرُوكْ عْلَى الدّْوَامْ، كَيْعْرَفْ بْلِّي مَا كَنْكْدَبْشْ. 32وْالْحَاكْمْ دْيَالْ دِمَشْقْ اللِّي تَحْتْ السُّلْطَة دْيَالْ الْمَلِكْ الْحَارِتْ، آمْرْ بَاشْ يْعَسُّو عْلَى الْمْدِينَة بَاشْ يْشَدُّونِي،#الاعمال 9:23-25 33وَلَكِنْ الْخُوتْ حَطُّونِي فْسْلَّة وْنْزّْلُونِي مْنْ وَاحْدْ الشَّرْجَمْ فْالسُّورْ، وْهَكَّا هْرَبْتْ مْنْ يْدِّينْ الْحَاكْمْ.
Currently Selected:
كُورِنْتُوسْ التَّانِيَّة 11: MSTD
Highlight
Share
Copy
Want to have your highlights saved across all your devices? Sign up or sign in
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved