رِسَالَةْ تِيمُوتَاوُسْ اللّْوّْلَى 3
3
الْفَصْلْ التَّالْتْ
الْمْسْؤُولِينْ دْ الْكْنِيسَة
1هَادْ الْكْلَامْ اللِّي غَنْݣُولْ رَاهْ صَادْقْ: إِلَا بْغَا شِي وَاحْدْ يْكُونْ رَاعِي دْ الْكْنِيسَة، رَاهْ كَيْتّْمَنَّى مْسْؤُولِيَة مْزْيَانَة. 2عْلَى هَادْشِّي وَاجْبْ عْلَى الرَّاعِي دْ الْكْنِيسَة يْكُونْ مَا عْلِيهْ لُومْ، مْزَوّْجْ بْمْرَاة وَحْدَة، رْزِينْ، بْعَقْلُه، مْحْتَرْمْ، كَيْضَايْفْ النَّاسْ الْبْرَّانِيِّينْ، قَادْرْ يْعَلّْمْ،#تيطس 1:6-9 3وْمَا يْكُونْشْ سْكَايْرِي، وْلَا كَيْجْبَدْ الصّْدَاعْ، وَلَكِنْ يْكُونْ ضْرِيّْفْ، وْمْهَدّْنْ، وْمَا يْكُونْشْ قَلْبُه عْلَى الْفْلُوسْ، 4وْيْكُونْ مْسَيّْرْ دَارُه مْزْيَانْ، وْيْكُونُو وْلَادُه مْرَبّْيِينْ وْخَاضْعِينْ لِيهْ بْاحْتِرَامْ. 5حِيتْ إِلَا كَانْ شِي وَاحْدْ مَا كَيْعْرَفْشْ يْسَيّْرْ دَارُه، كِيفَاشْ غَادِي يْتّْهَلَّى فْكْنِيسْةْ اللَّهْ؟ 6وْخَاصّْ الرَّاعِي دْ الْكْنِيسَة مَا يْكُونْشْ جْدِيدْ فْالْإِيمَانْ، بَاشْ مَا يْتّْنْفَخْشْ بْالْكِبْرْ وْيْنْزَلْ عْلِيهْ الْعِقَابْ اللِّي نْزَلْ عْلَى إِبْلِيسْ. 7وْخَاصّْ تْكُونْ السُّمْعَة دْيَالُه مْزْيَانَة بِينْ النَّاسْ اللِّي مَاشِي مُومْنِينْ، بَاشْ مَا يْلُومُه حَدّْ وْمَا يْطِيحْشْ فْالْمْصِيدَة دْيَالْ إِبْلِيسْ.
الْمُدَبِّرِينْ فْالْكْنِيسَة
8وْحْتَّى الْمُدَبِّرِينْ وَاجْبْ عْلِيهُمْ يْكُونُو مْحْتَرْمِينْ، عَنْدْهُمْ كْلْمَة وَحْدَة، مَاشِي سْكَايْرِيَّة، وْمَا كَيْطَمْعُوشْ فْالرّْبَحْ دْ الْحْرَامْ، 9وْخَاصّْهُمْ يْبْقَاوْ مْحَافْضِينْ عْلَى سِرّْ الْإِيمَانْ بْضَمِيرْ نْقِي. 10وْرَاهْ خَاصّْ الْكْنِيسَة تْجَرّْبْهُمْ فْاللّْوّْلْ، وْإِلَا مَا كَانْ عْلِيهُمْ لُومْ، يْقَدْرُو يْوَلِّيوْ مُدَبِّرِينْ. 11وْحْتَّى الْعْيَالَاتْ الْمُدَبِّرَاتْ وَاجْبْ عْلِيهُمْ يْكُونُو مْوَقّْرَاتْ، مَا فِيهُمْشْ النَّمِيمَة، مْرَزّْنَاتْ وْأَمِينَاتْ فْكُلّْ حَاجَة. 12وْرَاهْ خَاصّْ كُلّْ مُدَبِّرْ يْكُونْ مْزَوّْجْ بْمْرَاة وَحْدَة، كَيْعْرَفْ يْسَيّْرْ وْلَادُه وْدَارُه مْزْيَانْ. 13حِيتْ الْمُدَبِّرِينْ اللِّي كَيْخَدْمُو مْزْيَانْ، كَيْكُونُو مْحْتَرْمِينْ عَنْدْ النَّاسْ، وْيْقَدْرُو يْتّْكَلّْمُو بْتِقَة كْبِيرَة عْلَى إِيمَانْهُمْ بْالْمَسِيحْ يَسُوعْ.
السِّرّْ الْكْبِيرْ
14كَنْكْتَبْ لِيكْ هَادْشِّي، وْأَنَا كَنْتّْمَنَّى نْجِي لْعَنْدْكْ دْغْيَا، 15وَلَكِنْ إِلَا تْعَطّْلْتْ، رَاهْ هَادْ الْكْلَامْ غَيْعَاوْنْكْ بَاشْ تْعْرَفْ كِيفَاشْ تْتْعَامْلْ فْبِيتْ اللَّهْ، اللِّي هُوَ كْنِيسْةْ اللَّهْ الْحَيّْ، وْالرّْكِيزَة وْالسَّاسْ دْيَالْ الْحَقّْ. 16وْبْلَا شْكّْ رَاهْ السِّرّْ دْ التَّقْوَى دْيَالْنَا كْبِيرْ:
«اللَّهْ بَانْ فْالدَّاتْ دْيَالْ بْنَادْمْ،
وْالرُّوحْ الْقُدُسْ أَكّْدْ بْلِّي هُوَ حَقّْ،
وْشَافُوهْ الْمَلَايْكَة،
وْتْخَبّْرْ بِيهْ فْوَسْطْ الشّْعُوبْ اللِّي مَاشِي يْهُودْ،
وْآمْنُو بِيهْ النَّاسْ فْالدّْنْيَا،
وْتّْرْفَعْ فْالْعَزّْ لْلسّْمَا».
Currently Selected:
رِسَالَةْ تِيمُوتَاوُسْ اللّْوّْلَى 3: MSTD
Highlight
Copy
Compare
Share
Want to have your highlights saved across all your devices? Sign up or sign in
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved
