رِسَالَةْ تْسَالُونِيكِي اللّْوّْلَى 4

الْفَصْلْ الرَّابْعْ

الْحَيَاةْ اللِّي كَتْرْضِي اللَّهْ

1وْدَابَا آ الْخُوتْ، رَاكُمْ تْعَلّْمْتُو مْنَّا كِيفَاشْ تْعِيشُو بَاشْ تْرْضِيوْ اللَّهْ، وْهَادْشِّي هُوَ اللِّي كَتْدِيرُو، وَلَكِنْ دَابَا كَنْطْلْبُو مْنّْكُمْ وْكَنْتّْرَجَّاوْكُمْ فْإِسْمْ رَبّْنَا يَسُوعْ بَاشْ تْزِيدُو تْدِيرُوهْ كْتَرْ. 2حِيتْ رَاكُمْ كَتْعَرْفُو الْوْصِيَّاتْ اللِّي عْطِينَاكُمْ مْنْ عَنْدْ الرَّبّْ يَسُوعْ. 3وْرَاهْ اللَّهْ بْغَاكُمْ تْعِيشُو مْقَدّْسِينْ، وْتْبَعّْدُو عْلَى الْفْسَادْ، 4وْكُلّْ وَاحْدْ فِيكُمْ خَاصُّه يْعْرَفْ كِيفَاشْ يْسْتَخْدَمْ الدَّاتْ دْيَالُه بْالْقَدَاسَة وْالشَّرَفْ، 5وْمَا يْعِيشْ فْالشَّهْوَة الْفَاسْدَة بْحَالْ الشّْعُوبْ اللِّي مَا كَيْآمْنُوشْ بْاللَّهْ وْمَا كَيْعَرْفُوهْشْ. 6وْحْتَّى وَاحْدْ مَا يْآدِي خُوهْ وْلَا يْضَرُّه فْهَادْشِّي، عْلَاحْقَّاشْ اللَّهْ غَيْعَاقْبْ كُلّْ مْنْ كَيْدِيرْ بْحَالْ هَادْشِّي كِيفْ ݣْلْنَا لِيكُمْ مْنْ قْبَلْ وْنَبّْهْنَاكُمْ. 7حِيتْ اللَّهْ مَا خْتَارْنَاشْ بَاشْ نْعِيشُو مْنْجُوسِينْ، وَلَكِنْ بَاشْ نْعِيشُو مْقَدّْسِينْ. 8عْلَى هَادْشِّي، رَاهْ اللِّي مَا كَيْقْبَلْشْ هَادْ الْوْصِيَّاتْ مَاشِي مَا كَيْقْبَلْشْ النَّاسْ، وَلَكِنْ مَا كَيْقْبَلْشْ اللَّهْ اللِّي كَيْعْطِيكُمْ الرُّوحْ الْقُدُسْ دْيَالُه.

9أَمَّا بْالنّْسْبَة لْمْحَبَّةْ الْخُوتْ، رَاكُمْ مَا مْحْتَاجِينْشْ نْكْتَبْ لِيكُمْ عْلِيهَا، حِيتْ نْتُمَ بْرَاسْكُمْ تْعَلّْمْتُو مْنْ اللَّهْ كِيفَاشْ تْبْغِيوْ بْعْضِيَّاتْكُمْ. 10وْرَاكُمْ بْالصَّحْ كَتْبْغِيوْ ݣَاعْ الْخُوتْ اللِّي فْمَكِدُونِيَة كُلّْهَا. وَلَكِنْ كَنْطْلْبُو مْنّْكُمْ آ الْخُوتْ تْدِيرُو كْتَرْ مْنْ هَادْشِّي، 11وْتْرَدُّو بَالْكُمْ بَاشْ تْعِيشُو هَانْيِينْ، وْتْدِّيوْهَا فْدَاكْشِّي اللِّي كَيْهَمّْكُمْ، وْتْخَدْمُو بْدْرَاعْكُمْ كِيفْ وْصِّينَاكُمْ، 12بَاشْ تْعِيشُو مْحْتَرْمِينْ قُدَّامْ النَّاسْ اللِّي مَاشِي مُومْنِينْ، وْمَا تْحْتَاجُو لْحَدّْ حْتَّى فْشِي حَاجَة.

الرّْجُوعْ دْيَالْ الرَّبّْ

13بْغِينَاكُمْ آ الْخُوتْ تْكُونُو عَارْفِينْ آشْ غَيْجْرَا لْهَادُوكْ اللِّي مَاتُو، بَاشْ مَا تْحَزْنُوشْ بْحَالْ النَّاسْ لْخْرِينْ اللِّي مَا عَنْدْهُمْ رْجَا. 14حِيتْ إِلَا كَنْآمْنُو بْلِّي يَسُوعْ مَاتْ وْتّْبْعَتْ مْنْ الْمُوتْ، رَاهْ كَنْآمْنُو بْلِّي حْتَّى هَادُوكْ اللِّي مَاتُو غَيْبْعَتْهُمْ اللَّهْ مْعَ يَسُوعْ. 15وْهَادْشِّي اللِّي كَنْݣُولُوهْ لِيكُمْ رَاهْ هُوَ كْلَامْ الرَّبّْ: حْنَا اللِّي غَنْبْقَاوْ حَيِّينْ حْتَّى لْلْمْجِي دْيَالْ الرَّبّْ مَا غَادِيشْ نْسَبْقُو هَادُوكْ اللِّي مَاتُو. 16عْلَاحْقَّاشْ الرَّبّْ بْرَاسُه غَادِي يْنْزَلْ مْنْ السّْمَا مْلِّي يْتّْسْمَعْ صُوتْ قْوِي، وْصُوتْ رَئِيسْ الْمَلَايْكَة وْصُوتْ الْبُوقْ دْيَالْ اللَّهْ، وْهَادُوكْ اللِّي مَاتُو وْهُمَ كَيْآمْنُو بْالْمَسِيحْ غَيْتّْبَعْتُو هُمَ اللّْوّْلِينْ. 17مْنْ بَعْدْ حْنَا اللِّي بَاقْيِينْ حَيِّينْ، غَنْتّْخَطْفُو مْعَاهُمْ فْالسّْحَابْ بَاشْ نْتّْلَاقَاوْ مْعَ الرَّبّْ فْالسّْمَا، وْهَكَّا غَنْكُونُو دِيمَا مْعَ الرَّبّْ. 18عْلَى هَادْشِّي شَجّْعُو بْعْضِيَّاتْكُمْ بْهَادْ الْكْلَامْ.

Currently Selected:

رِسَالَةْ تْسَالُونِيكِي اللّْوّْلَى 4: MSTD

Highlight

Copy

Compare