كُورِنْتُوسْ اللّْوّْلَى 16
16
الْفَصْلْ سْطَّاشْ
الْمُعَاوَنَة لْكْنِيسْةْ أُورْشَلِيمْ
1أَمَّا مْنْ جِهْةْ الجّْمِيعْ دْيَالْ التَّبَرُّعَاتْ لْلْخُوتْ الْمْقَدّْسِينْ، دِيرُو حْتَّى نْتُمَ كِيفْ وْصِّيتْ الْكْنَايْسْ دْ غَلَاطِيَّة.#روما 15:25،26 2فْالنّْهَارْ اللّْوّْلْ فْكُلّْ سِيمَانَة، كُلّْ وَاحْدْ مْنّْكُمْ خَاصُّه يْخَبِّي عَنْدُه دَاكْشِّي اللِّي وَفّْرْ مْنْ الرّْبَحْ دْيَالُه، بَاشْ مْلِّي نْجِي لْعَنْدْكُمْ مَا تْحْتَاجُوشْ عَادْ تْجَمْعُو التَّبَرُّعَاتْ. 3وْمْلِّي نْوْصَلْ، غَادِي نْصِيفْطْ هَادُوكْ اللِّي خْتَارِيتُوهُمْ، وْنْعْطِيهُمْ رَسَائِلْ بَاشْ يْدِّيوْ التَّبَرُّعَاتْ دْيَالْكُمْ لْأُورْشَلِيمْ. 4وْإِلَا كَانْ ضَرُورِي نْمْشِي حْتَّى أَنَا، رَاهْ غَيْمْشِيوْ مْعَايَ. 5وْغَادِي نْجِي لْعَنْدْكُمْ مْلِّي نْدُوزْ لْمَكِدُونِيَة حِيتْ أَنَا دَايْزْ لِيهَا.#الاعمال 19:21 6وْنْقْدَرْ نْبْقَى مْعَاكُمْ، وْلَا نْدَوّْزْ عَنْدْكُمْ الشّْتْوَا بَاشْ تْعَاوْنُونِي نْكَمّْلْ السّْفَرْ دْيَالِي. 7حِيتْ مَا بْغِيتْشْ نْشُوفْكُمْ دَابَا وْأَنَا دَايْزْ، وَلَكِنْ كَنْتّْمَنَّى نْبْقَى مْعَاكُمْ وَقْتْ طْوِيلْ إِلَا بْغَا الرَّبّْ. 8وْرَانِي غَنْبْقَى فْأَفَسُسْ حْتَّى لْيُومْ الْخَمْسِينْ،#الاعمال 19:8-10 9حِيتْ تّْحَلّْ لِيَّ بَابْ كْبِيرْ لْلْخْدْمَة، وْالنَّاسْ اللِّي كَيْضَادُّو كْتَارْ.
10وْإِلَا جَا تِيمُوتَاوُسْ، تّْهَلَّاوْ فِيهْ بَاشْ يْحَسّْ بْالْأَمَانْ مْعَاكُمْ، عْلَاحْقَّاشْ حْتَّى هُوَ كَيْخْدَمْ لْلرَّبّْ بْحَالِي.#1كورنتوس 4:17 11مَا يْحْتَقْرُه حْتَّى وَاحْدْ، وَلَكِنْ عَاوْنُوهْ وْصِيفْطُوهْ عْلَى خِيرْ لْعَنْدِي، حِيتْ كَنْتّْسَنَّاهْ مْعَ الْخُوتْ.
12أَمَّا مْنْ جِهْةْ خُونَا أَبُلُّوسْ، رَانِي طْلَبْتُه بْزَّافْ بَاشْ يْجِي لْعَنْدْكُمْ مْعَ الْخُوتْ، وَلَكِنْ مَا بْغَاشْ يْجِي دَابَا، وْرَاهْ غَيْجِي مْلِّي تْكُونْ عَنْدُه شِي وْجْبَة.
الْوْصِيَّاتْ اللّْخْرِينْ وْالسّْلَامْ
13كُونُو عْلَى بَالْ وْتْبْتُو فْالْإِيمَانْ، كُونُو رْجَالْ وْكُونُو قْوِيِّينْ، 14دِيرُو كُلّْ حَاجَة بْالْمْحَبَّة.
15رَاكُمْ كَتْعَرْفُو بْلِّي عَائِلْةْ اسْتِفَانُوسْ هُمَ اللّْوّْلِينْ اللِّي آمْنُو بْالْمَسِيحْ فْأَخَائِيَة، وْعْطَاوْ حْيَاتْهُمْ بَاشْ يْخَدْمُو الْمُومْنِينْ. عْلِيهَا كَنْطْلَبْ مْنّْكُمْ آ الْخُوتْ، #1كورنتوس 1:16 16بَاشْ حْتَّى نْتُمَ تْطِيعُو اللِّي بْحَالْهُمْ، وْݣَاعْ اللِّي كَيْشَارْكُو مْعَاهُمْ فْالْخْدْمَة وْكَيْضْرَبُو مْعَاهُمْ تَمَارَة. 17رَانِي فْرَحْتْ بْالْمْجِي دْيَالْ اسْتِفَانُوسْ وْفُرْتُونَاتُوسْ وْأَخَائِيكُوسْ، عْلَاحْقَّاشْ هُمَ اللِّي نَابُو عْلِيكُمْ فْغْيَابْكُمْ، 18حِيتْ هْنَّاوْ خَاطْرِي وْخَاطْرْكُمْ، إِيوَا تّْهَلَّاوْ فْبْحَالْ هَادْ النَّاسْ.
19كَيْسَلّْمُو عْلِيكُمْ كْنَايْسْ آسْيَا، وْأَكِيلَا وْبِرِيسْكِلَّا كَيْسَلّْمُو عْلِيكُمْ بْزَّافْ فْالرَّبّْ مْعَ الْكْنِيسَة اللِّي كَتّْجْمَعْ فْدَارْهُمْ.#الاعمال 18:2 20ݣَاعْ الْخُوتْ كَيْسَلّْمُو عْلِيكُمْ. سَلّْمُو عْلَى بْعْضِيَّاتْكُمْ بْبُوسَة مْقَدّْسَة.
21وْأَنَا بُولُسْ كَنْسَلّْمْ عْلِيكُمْ بْخَطّْ يْدِّي.
22إِلَا كَانْ شِي وَاحْدْ مَا كَيْبْغِيشْ الرَّبّْ رَاهْ مْلْعُونْ! مَارَانْ أَتَا، آجِي يَا رَبّْنَا.
23نِعْمَةْ الرَّبّْ يَسُوعْ تْكُونْ مْعَاكُمْ. 24وْالْمْحَبَّة دْيَالِي لِيكُمْ كُلّْكُمْ فْالْمَسِيحْ يَسُوعْ.
Currently Selected:
كُورِنْتُوسْ اللّْوّْلَى 16: MSTD
Highlight
Share
Copy
Want to have your highlights saved across all your devices? Sign up or sign in
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved