LAW MA NIR-NIRAMNA 1
1
GATTA KAY MUS HAY YALDA
1Law ma nir-niramna vi Salomon,
goora vi David, mulla vi Israyel.
2Kay wi yalda hiɗi hatta,
kay hum yoboyna vi yamda-wida;
3kay fi hatta vi varta ŋaata vi gasita,
vi kitata ta hay liya'ta hiɗi ɗigerta;
4kay vul yalda mi sa bay yalla;
kay vul wida hiɗi varta mi sa joriyona.
5Hin sa ma yalla huma,
nala nam ma jor wida valamu,
sa ma ka hiɗi yamda-wida
ma jor wida valam vok suwa,
6kay hum caw law ma nir niramna hiɗi vanbona,
kay hum yoboyna vi sa yalla hiɗi law ma guɗulina.
7Narta kuɗ Ma-Vatɗina kayni tun cawta vi yalla;
sum sa ɦay-ɦayna ɗuw yalla hiɗi ɗek-yalda birek-ceke.
8Goora vanu, humaŋ sle ma buŋ ka hataŋgina,
hatta ta suŋ hataŋu naŋ ma ga' goyɗi.
9kay kayni mi bogorayna vi slugota ma tuni kaŋŋa,
mi komona ma giy delaŋu.
10Goora vanu, la sum sa sulukŋa min ɗutaŋu,
naŋ ma tap kuɗsiɗi,
11La nisi di ala naŋay hiɗi numa'a,
ganay jawt vok sumuna,
ɦokay busuwn goyo,
ganay jawta vok sa ma bay li joota,
12nay ma pisi gaa iri kafe,
ki liyna vi sa mitin nala,
nay muɗsi kaf ki sum sa jik gaa hay zulla nala,
13nay ma fi sle ma ŋaana kuɗ jafam kaf,
nay ma hob ziyna vay hiɗi sle ma nay tum ɓuraŋŋa;
14galla vaŋu ka jarma'a,
slena vay nay ma tapam hay birim kepe!
15Goora vanu,
naŋ ma tun goy hay hagat hiɗi nisiɗi,
vaŋ tuwaŋ goy hay hagata visiya;
16kay sesiya ka jaŋ kat joota,
nisi li koloyo kay ɦok busuw goyo.
17La naŋ gan jawta vok lay ma zlimitna
hay li ma iram ka cuki ka'a,
kayn naŋ mak tuwaŋ ɦawa.
18May nisiya, nisi gan jawta kayni
vok busuwna visi kay tuwsiya,
nisi gan jawta kayni vok ciwta visi kay tuwa'a.
19Nisi sa diksi gar kay fi slena,
van co kisi ki kayn nala,
sum sa vul tuwsi goy hay haramna,
haramna basi goyo.
Yita vi yalda
20Yalda ka siwel goy hay hagata,
na' ka siwel kulo ŋolo hay liyn ma lakka,
21na' ka ciriya hay liyn ma winek ka hayam ŋolo,
hay vun-galana vi hoyok-ziyna, na' ka di dela'a,
22nigi sa bay-yalla,
nigi min bay-yalda nala ta-ta lancitige?
Sum sa burahta diksi ma min burahta ki kayn nala ta-ta lancitige?
Nigi sa ɦay-ɦayna,
nigi ma ka gaw hiɗi yalda nala ta-ta lancitige?
23Muɗgi irgi aya kay hum bayta vanu,
Humgiya, nan ma yam ŋusta van goy kigiya,
nan ma ɗekgi kay yoboyna vanu.
24Kay nan ka yi'e, may nigi humanɗi,
kay nan meɗ ɓan goyo, may sa min tun humamɗi,
25Kay nigi noy gatta van goy kafe,
kay nigi min hum bayta vanɗi,
26Nala nan kaw,
nan ma cena hay li ma nigi ma kal vun zlata,
nan ma pangiya hay li ma ɦuyumda nigawa gaa'a kigiya.
27Hay li ma narta-ŋolda nigawa gaa kigiya ki simeɗ ma biwna nala,
hay li ma lasta ma ŋuygiya ki ɦiwliŋŋa nala,
hay li ma lasta hiɗi sum-zlata ma nig kigiya.
28Hay na'ta nisi ma yanu,
may nan ma hotsi ditɗi,
nisi ma garanu,
may nisi ma fanɗi.
29Kay nisi ka gawi hiɗi wida,
nisi may vilek narta ta kuɗ Ma-Vatɗinaɗi,
30kay nisi min hum gatta vanɗi,
bayta vanu kaf nisi sara' birek-ceke.
31Nala nisi ma ti vuɗna vi lopna visiya,
nisi ma hob haysiya hiɗi gatta visi kay tuwsiya,
32kay sum sa bay-yalla ŋel-gatta visi cisi goyo,
Bay-varta vi sum sa ɦay-ɦayna kaw vatsi goyo.
33May nam ma hum kuɗanu ma fi sle'ta hay ziyna valamu,
nam ma mus ŋal kiliŋ bay li nar kay joo tara kep noŋo.
Currently Selected:
LAW MA NIR-NIRAMNA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001