TITUS 2
2
Lopna ma vo hay ziyna
1 Tim 2:9-15; 1 Pet 3:1-6; Efes 6:5-8
1May naŋu, naŋ ma dum mi yoboy ma tap hiɗi hatta ta gasita. 2Naŋ ma di tam sa maariyana a nisi ma lak ŋali, sum sa hormo'o, hiɗi varta yalda, peldete hay vida, hay minda, hay ŋalda kaw.
3Naŋ ma di tam boy sa busata visi liy ŋolo kay nisi ma poy hiɗi hagata peldetta, di yoboy ma tefleɗi, muɗ tuwsi gorvo vi dolayɗi; nisi ma vul hatta ta ŋaata, 4kay nisi fi hat boy sa gurayna kay min jufaysiya hiɗi gurona visiya, 5a var yali, lak cet-cete, li lop ma vona ŋaa ŋolo, hum kuɗ jufaysiya, kay sa fi ŋul yoboyna vi Lawnɗi,
6Jufay sa joriyona naŋ ma gatsiya nala kaw a nisi ma li yali hay slen pet, 7naŋ kay tuwaŋ kaw ɗek tuwaŋ goy hiɗi lop ma ŋaana a nisi fi sli kuɗaŋu hay lop ma ŋaana, a naŋ ma vul hatta ta gasita, ta nagayta, 8Daŋgi mi yoboy ma hay liyamna, ma sa as di joo kalamɗina, kay sa gawt kaŋŋa ma muɗ zulo'o, a nisi ma fi kay di va ma joo kayɗi.
9Sa gorvona naŋ ma disi kay nisi ma hum kuɗ mulaysin ŋaa'a hay slen pet, li tuwsi kirsi jifiya, ci-way hiɗi nisiɗi kaw. 10a ɦod slen goyɗi, may ɗek lop ma gasina goy dok-doko, kay sli yam hatta vi Lawna ma su'da vay kulo'o hay slen kaf.
Slugota vi Lawna maawa goy haraŋi
Efes 2:1-10; 1 Pet 1:10-21
11Slugota vi Lawna ta su'da vi sumun kaf may goy haya' pata, ɗek tuwa'awa goy haraŋi. 12Na' hataya kay nay ma hin poyta-liwista goyo, nay ma hin darta vi nagat goyo kaw; a nay ma lak hay nagata tanta hiɗi varta ta yali, ɗigere hiɗi poy ŋaa'a kaw, 13Hay li ma nay cub cubta-sle'ta hiɗi ɗek-goyta vi gajijita vi Lawna vay ma ŋolla ma su'da, Kristu Yesu. 14Nam ma vul tuwamawa goy kaya, kay butay goy hay jiw-zlata kaf, lay a nay ma muɗ goy peldete, muɗay si sumuna valamu kay tuwamu, sa ciwer hay lopna ma ŋaana. 15Kay na'ta, kusaŋ yoboyna, vulaŋ gatta, lawaŋ sumuna hiɗi dono'o. Hin sa ɗuwaŋ birek-cekɗi.
Currently Selected:
TITUS 2: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001