WID-ŊAYAYTA 9

1Sunda-wuralawna ma vaslna buw togolomna. Nan wi mislekŋa mara'a ma dukalawna ka nig ay gaa kay nagata, klena vi ɦuɗuk ma wiŋŋa ay vuli hay ɓalamu. 2Nam mal vun zulla vi ɦuɗuk ma wiŋŋa goyo, no'osna kalay goy hay zulla pa, ki no'osna vi zul ŋol ma kuta nala, fatta hiɗi dukalawna muɗi guriya kay nukŋa vi zulla. 3Baara may goy jar no'osn pa, nam cukay goy kay nagata, donot ay vuli talamu ki donota vi ɦurduwna gaa kay nagata nala. 4Dit diy tisi ala nisi ma li va tam us ma gaa kay nagatɗi, tam us ma ŋulomnaɗi, tam gunɗi kaw, may tam sum sa soona vi Lawna bay tun hay voksina tuta. 5Donot vuli tisi kayni kay ci sumun goyɗi, may kay nisi ma las sumuna ir til vasl, lasta visiya na' ŋray ca ki tina vi ɦurduwta hay li ma na' gi sa'a nala. 6Hay buur namna ɗawni, sumuna ma gar mitta, may nisi ma fa' noŋɗi, haysi ma dar mitta, may mitta ma pir goy kisiya. 7Baar namna sli kulumay ma tuwam ganay gan' kay duura nala, va ka kulo kalamu ŋray ca ki bogoray ma ora nala, vokomu ki vok sumuna nala, 8ɗuŋus ma kalamna ki ɗuŋusna vi boyna nala, siyamu ki siy zlona nala. 9Ŋoŋŋa ka kalamu ki ŋoŋ ma kawayn nala, suwana vi zlamiyamu ki suwana vi kekena hay li ma kulumayn ŋolo jaŋ vun duura nala. 10Giɗerem ŋray ca ki giɗer ɦurduwta hiɗi jalaŋŋa nala. Donota vuli tam giɗeremu kay las sumuna ir til vasl. 11Mulla ma tuni voksina mi sunda vi zul ma wiŋŋa, semda valamu hay vun Hebren ala Abadon, hay vun Grekŋa semda valam ala Apoliyoŋ.

12Joota ta jewta kalawa. Ɗuwgiya, joota tara'a ma' lo ka co bugol kayni.

13Sunda-wuralawna ma karkiyana buw togolomna. Nam hum dit kep may goy tam miyok ma fiɗina vi giwin-ma-ɗifinna ma ora ma ka coli vok ir Lawna pa, 14dit na'ta di tam sunda-wuralawna ma karkiyana ma ka buw togolomna ala: Sunda-wuralawna sa fiɗina sa ka juni kel niy-lum ma ŋolla Eufrata naŋ ma butsi goyo. 15Ki kayn nala sunda-wuralawna sa lakay ŋom leera, buura, tilla hiɗi busata butis goyo kay ci gal ma ɦidina vi sumun goyo. 16Ŋaɓta vi sum sa li duura sa ɓey kay kulumayna nisi miliyoŋ kis-ma', human hum ŋaɓta na'ta. 17Hay slen ma vul tuwam kiranu, nan wi kulumayna hiɗi nisi sa ɓey kalamna, ŋoŋŋa visiya slaw keŋ', bufu kaw ki sufre nala, yam kulumayna ay ki yam-zlona nala, kuta hiɗi no'osna hiɗi sufre kalay goy hay vunam pa. 18Bakmara namna ma ɦidina hiɗi kuta hiɗi sufre hiɗi no'osna ma kalay goy hay vunsi pana ci gal ma ɦidina vi sumun goyo. 19Kay donota vi kulumay namna ka hay vunamu, hay giɗeremu kaw; giɗerem sli guyn nala, yalam ka'a kaw, nam li sumun joo ŋol kayn hiɗi yalamu. 20Sum segena sa bakmara namna may cisi goyɗina min ham kay sle ma nisi lumnaɗi; dok-dok nisi ka girif fuliyana, hiɗi lawayn ma yoray hiɗi ora, ma yoray hiɗi doorona, hiɗi wayna, hiɗiyna hiɗi guna kaw, ma as ɗuwɗi, ma as poyɗi kaw; 21ci-matta, gul-yalda, poyta waata hiɗi kulda visiya kaf, nisi min ham ka'ɗi.

Currently Selected:

WID-ŊAYAYTA 9: Massana

Highlight

Copy

Compare