WID-ŊAYAYTA 6

Mal-goyta vi soona ma karkiyana ma jewna

1Hay li ma nan ka ɗuwa, goor ɦu-dimina mal soona ma kepna jar soon ma siɗiyana goyo, kepe jar sle ma irina ma fiɗina di hiɗi delem ki law ma bayna nala ala: naŋaya! 2Hay li ma nan ka ɗuwa, iran wi kulum ma haɓna. Sa ma ɓey kalamna diŋ-diŋ ɓarawta ka hay ɓalamu; marayta kep vuli hay ɓalamu, nam kalay goyo ki sa ma kolla nala, kay kola kaw.

3Hay li ma nam mal soona ma ma'na goyo, nan hum della vi va ma irina ma ma'na ka di ala: Naŋaya. 4Kulum mara'a ma slaw keŋ kal ay goyo, sa ma musi kalamna ay vuli talamu kay yaw toyta goy kay nagata, kay sumuna ma ŋat tuwsi goy jar-tuwsiya; kew-gaferaŋa ma ŋolo ay vuli hay ɓalamu.

5Hay li ma nam mal soona ma ɦidina goyo, nan hum del va ma irina ma ɦidina ka di ala: Naŋaya. Hay li ma nan ɗuwa, nan wi kulum ma wura'a, sa ma musi kalamna va ma ŋa nekŋa ka hay ɓalamu. 6Nan hum ki della nala goy jar sle ma irina ma fiɗina pa, del namna ka di ala: Ŋaɓta vi alkamarena tasa kep ir denariyus kepe, ŋaɓta vi orgena tasa ɦidi ir denariyus kepe, may mula hiɗi vinna naŋ ma jomɗi.

7Hay li ma nam mal soona ma fiɗina goyo, nan hum della vi va ma irina ma fiɗina ka di ala: Naŋaya. 8Hay li ma nan ka ɗuwa, iran wi kulum ma goɗiya, sa ma musi kalamna yum ala mitta, liyn ma musta vi mitta ka tuɗ kuɗumu. Gaŋeraŋa ay vuli talamu kay gal ma fiɗina vi nagata, kay ci sumun goyo hiɗi kew-gaferaŋa, hiɗi mayta, hiɗi bakmarana, hiɗi muuriya ma siyna gaa kay nagata.

9Hay li ma nam mal soon ma vaslna goyo, gaa kuɗ giwin-ma-ɗifinna nan wi ciwta vi nisi sa fi ŋatta-goyta kuɗ yoboyna vi Lawna, hiɗi di-goyta ta nisi la'ta. 10Nisi siwel hiɗi delsi kulo ŋolo ala: Bum-Sumuna naŋ ma peldetna ma gasina, naŋ ma ka kitata vuma'a hiɗi job yam busuwna vuma hiɗi sum sa gaa kay nagat kaw ɗawn lancitige. 11Sligar ma haɓi vulis tam gigi gige jarsi kafe, dita vulis tisiya kay nisi ma lak ŋal kiliŋ ir liyn neeɗa lo, ta-ta nuroysina sa lopna hiɗi ɓosiyosina sa min fi cita-goyta ki nisi nala ma liys kaf tuwa.

12Hay li ma nan ka ɗuwa, nam mal soon ma karkiyana goyo, ɗuw na kayni, wiira vi nagata li ŋolo, fatta muɗ jufun nil ki sligar ma do'olla nala, tilla muɗ ki busuwna nala. 13Mislek ma dukalawna cuk gaa kay nagata, ki vuɗ gu-gumna yak gaa'a hay li ma simeɗn ma ŋolla geɗem humamu nala. 14Dukalawna ɗuti kulo'o ki san ɗut ɗerwel nala, hiɗiyna hiɗi jokona kaf diram jok goyo, 15muliyan sa gaa kay nagata, sa ŋulona, sa ŋulona vi sojena, sa farayna, sa donona, sa gorvona hiɗi sa goy butina kaf ŋay tuwsi hay zulla vi hiɗiyna, hay hulukŋa vi hiɗiyna kaw. 16Nisi di tam hiɗiyna: cukgiyay gaa kuma'a, ŋayma goy gine'e vok ir nam ma ka musi kay zlamda-mulda, kay ɦiyda vi goor ɦu-dimina kaw. 17Kay buur ma ŋolla vi ɦiyda visiya coowa, sa ma as col digam ɗawn mi gige?

Currently Selected:

WID-ŊAYAYTA 6: Massana

Highlight

Copy

Compare