WID-ŊAYAYTA 5

Ɗerwella vunam duki gaa hiɗi soon siɗiya

1Bugolda nan wi ɗerwelda hay ɓam nam ma ka musi kay zlamda-mulda, ɗerwel na'ta ɗot ka ɗoy bugola'a, haya'a kaw. Vuna' duki gaa'a hiɗi soon siɗiya. 2Iran cuk kay sunda-wuralawna ma dono ŋolo, ma siwel hiɗi delem kulo ŋol ala: Sa ma nagay kay mal ɗerwelda kayni goyo, kus soona ma vuna'na goyo kaw mi gige? 3May la hay wuralawna, la gaa kay nagata, la gaa kuɗ nagata kaw, sa ma as kay mal ɗerwelda goyo mayɗi, sa ma as kay ɗuwa'a mayɗi kaw. 4Nan tiy ŋolo hay na'ta, kay sa ma nagay kay mal ɗerwel na'ta goyo hiɗi ɗuw haya'a mayɗi. 5San kep jar sa maariyana di tanu: Naŋ ma tiyɗi, ɗuwaŋu, zlona ma hay jafna vi Yuda, sutayna vi David, nam kolawa, nam nagay kay mal ɗerwelda na'ta goyo, hiɗi soona va' ma siɗiyana.

6Goy jar zlamda-mulda hiɗi sle ma irin ma fiɗina hiɗi jar sa maariyana pa, nan wi goor ɦu-dimina coli kulo'o, ki nam ay ŋatay ŋat nala. Nam ka hiɗi miyok siɗiya, ir siɗiya kaw, kayni mi ŋusiyan ma peldetna vi Lawna ma cuki goy gaa kay nagat kafe. 7Nam co'o, sli ɗerwelda goy hay ɓamta-jufta vi nam ma ka musi kay zlamda-mulda.

8Hay li ma nam vi ɗerwelda vina, sle ma irina ma fiɗina, hiɗi sa maariyana sa dok-ma' yam fiɗina girif gaa vok goor ɦu-dimina, gigekaw hiɗi dilla hay ɓalamu ɓalamu, hiɗi tasa ma ora hobay hiɗi urdina, kayni ti siɗawta vi sa peldetna. 9Nisi ka gi nul ma wulina di'e: Naŋ nagawa kay sli ɗerwelda, kay mal soon ma vuna'na goyo kaw, kay naŋ ay ŋataya, hiɗi busuwna vaŋu, sum sa hay jafn kuɗulu, hay vun kuɗulu, sumuna hiɗi jaf-sumun kaf naŋ gussiyawa mi Lawna. 10Naŋ muɗsiyawa muliya'a hiɗi muliyan-sa-ɗifinna vi Lawna vaya, nisi ma ti mul gaa kay nagata kaw.

11Nan ɗuwa, nan hum della vi sunda-wuralawna ŋolo ŋuyi tam zlamda-mulda, sle ma irina hiɗi sa maariyana, ŋaɓta visiya ir miliyoŋ gaage gaage hiɗi birim kis gaage gaage. 12Nisi ka di hiɗi delsi kulo ŋolo ala: Goor ɦu-dimina ma ay ŋataya nagawa kay fi gaŋeraŋa, farayna, yalla, donota, sli-yamda kulota, gajijita hiɗi suburta.

13Slen ma inin kaf, hay dukalawna, gaa kay nagata, gaa kuɗ nagata, gaa kay niy-lumna kaw nan ka humum delem di ala: Tam nam ma ka musi kay zlamda-mulda, tam goor ɦu-dimina kaw, suburta, sli-yamda kulota, gajijita hiɗi gaŋeraŋa hay vatɗita vatɗita.

14Slen ma irina ma fiɗina di'e: Amen! sa maariyana girif gaa'a, subur Lawna.

Currently Selected:

WID-ŊAYAYTA 5: Massana

Highlight

Copy

Compare