LAW MA NIR-NIRAMNA 16
16
1Sana as var kay li slena hay dikamu,
may hot dita na'a vi Ma-Vatɗina.
2Hagata vi sana kaf vokom ɗigere,
may nam ma fek ŋusta vi sana mi Ma-Vatɗina.
3Hin lopna vaŋ hay ɓam Ma-Vatɗina,
nala slen ma naŋ min lumu vunam ma hoba.
4Slen ma Ma-Vatɗina kotomna kaf dabta valam ka'a,
sa ma joon kaw nam kotom kayni kay buur ma joona.
5Sum sa subur tuwsin kaf liwisi kir Ma-Vatɗina,
may nisi ma hin bay fi kitatɗi.
6Por jiw-zlata hiɗi ŋaata ŋolda,
hiɗi gasita kaw,
hiɗi narta kuɗ Ma-Vatɗina san as cal goy hiɗi joota.
7La poyta vi san ka ŋaa'a kir Ma-Vatɗina,
sa gaw kalamna kaw Ma-Vatɗina muɗsi diksi a minimu.
8Va ma neeɗa hay ɗigerta,
suw faray ma dak-daki may hay bay-gasita.
9Dik sana var kay hagata valamu,
may vulum donot mi Ma-Vatɗina.
10Dita vi Lawna ka hay vun mulla,
nala hay kitata vunam ma di bay-ɗigertaɗi.
11Va ma ŋa nekka hiɗi dutta-kusta
ma hay liyamna kir Ma-Vatɗina ŋaa'a,
buhu ma cuk slen hayna kaw kotom mi namu.
12Lop ma joona liwisi kir muliyana,
kay zlamda-mulda muɗ dono kayni kuɗ ɗigerta.
13Dita vi sum sa ɗigera kir muliyan ŋaa'a,
sumun min sa ma law hiɗi ɗigerta may.
14ɦiyda vi mulla ki sa ma sunda vi mitta nala,
may sa ma yalla sleɗa' gaa'a.
15La vok mulla ka wile'e,
kayni vul irita,
slugota vi mulla ki niy ma si gufulda nala.
16A gar yalla kayni suw ora sem gaage?
A gar yam ta wida kayni suw doorota sem gaage?
17Hagata vi sum sa ɗigera kayni kay cal goyo hiɗi joota;
sa ma min mus jigere hay hagata valamu ŋom ciwta valamu kaw.
18Sli-yam-kulota tuɗ vok ɓulakka,
ŋusta-purcakka tuɗ vok ni-gaata.
19Hot-yamda gaata jar sa yisi hotay gaana,
suw ɓurawta vi sle ma ti ɓuraŋŋa,
hiɗi sa subur tuwsina.
20Sa ma jiɓer yoboyna ma fi halalda,
nala kaw sa ma tun vida valam kay Ma-Vatɗina ma fi bolda.
21Sa ma dikam yali ma yumis ala sa ma ka hiɗi yam ta wida,
vun ma di lumaɗna jor wida.
22Sum sa ka hiɗi yalda fi irita,
sum sa to'ofayna kitata visi kayni ti to'ofta.
23Sa ma dikam yali vunam di sle ma yali kaw,
wulda vi wida valamu ka hay vunamu.
24Yoboy ma ŋaana ŋray ca hiɗi yumda ta jibetta,
kiliŋga vi ciwta yer san goyo.
25San var ala hagata valam kiram ŋaa'a,
may hay dabta ti hagata vi mitta.
26Sa ma li lopna mayta zutum hay lopna,
kay vunam ka zutum hay lopna.
27Sa ma wi vaɗina kot joota kay tuwamu,
dita vi vunamu ki kuta ta ŋalda nala.
28Sa ma joona fok ci-wayta,
sa teflena#16:28 Sa teflena Lebo sa ka sinna. ɓuraw jar boniyom tuwsin goyo.
29Sa ma waskayna ɗut sugolomna,
naram hay hagata joota.
30Sa ma duk iramu kay di yoboy ma gunina,
sa ma mut vunamu, joot hobawa hayam vatiya,
31Votna mi bogoray ma jifiy ŋolo;
san fum kayni hay hagata vi ɗigerta.
32Sa ma muɗ ɦiy koloyɗina suw sa ma donona,
sa ma tel tuwamna suw sa ma kol kay hoyok-ziyna,
33san as li ŋaɓta kuɗ ɦayta hay vun-sligara,
may col lawt kaf kayn mi Ma-Vatɗina.
BIBALDA TA PELDETTA © L'Alliance Biblique du Cameroun, 2001