LAW MA NIR-NIRAMNA 13
13
1Goor ma yalla hum ɗekka vi bulumu,
may sa ma burahta may hum gattaɗi.
2Kuɗ vuɗna vi dita vi vunna,
gigekaw ti va ma ŋaa'a,
may tin ma sum sa di newta garamna kayni ti waskayta.
3Sa ma ŋom vunamu ŋom ciwta valamu,
may yoboy ma dak-dakŋa tuɗaŋ hay ba-goyta.
4Sa ma zulomda darta valam may hobɗi;
may sa ma li lopna hayam ma hoba.
5Sa ma ɗigera ka gaw hiɗi yoboy ma sinna;
may sa ma joona muɗ tuwam puru,
nam ɓulak diki kaw.
6Ɗigerta ŋom sa ma dikam ɗigera,
may joota slew sa ma sulukŋa.
7Sa hena li tuwam ki nam faraya nala,
may va valam mayɗi,
sa hena li tuwam hawi,
may nam ka hiɗi slena.
8Sa ma farayna, farayn as butum goy vun lawta,
may sa ma hawna li nar kay lawtaɗi.
9Haraŋa vi sum sa ɗigera firi dik sa'a,
may fitilla vi sum sa joona tew goyo.
10Sli-yamda kulota mar ci-wayta,
may yalda ka hiɗi sa hum gatta.
11Faray ma fum hiɗi hagata gunita raŋ goyo,
may sa ma hurok farayn hiɗi ŋali ŋali li faray ŋolo.
12Varta ta ɓuraway gaata muɗ dik san moyo,
may varta ta hay liya'ta ti guna vi irita.
13Sa ma burah yoboyna ma wurak ŋolo,
may sa ma li nar kay vun-ma-gatna ma fi wurakŋa.
14Hatta vi sum sa yalla na' mi guna vi irita,
na' suɗaŋ goyo hay jawta vi mitta.
15Varta ta ŋaata vuɗ slugota,
may hagata vi sa di newta dabta va' mayɗi.
16Sa ma yalla marige kaw li hiɗi wida,
may sa ɦay-ɦayna pat dir to'ofta valam goyo.
17Sa ma di sunda joona tupa kay joota,
may sa ma di sunda hay liya'na mar yerta-goyta.
18Hawta hiɗi zulota kay san gigekaw ma noy hatta goyo,
may sa ma humam jak kay gatta ma fi suburta.
19Darta ta vuna' hobay kulota na' ŋaa'a kay ciwta,
may musta ta gine hiɗi joota kayni liwis kir sa ɦay-ɦayna.
20Sa ma poy hiɗi sum sa yalla muɗ yali,
may sa ma vi bonota hiɗi sa ɦay-ɦayna ma fi lasta.
21Joota ka kuɗ sa sulukŋa,
may ŋaata mi wurakŋa vi sum sa ɗigera.
22Sa ma ŋaana vocota valam co ta-ta tam gurona vi gurona valamu,
may sa ma sulukŋa farayna valamu muɗ goy vi sa ma ɗigera.
23Sine ma sa ma hawna zumumna li wan ŋolo,
may wa namna ba goyo kuɗ bay-ɗigerta valamu.
24Sa ma tel libetna goyo kay goora valamu may minimɗi,
may sa ma min goora valamu gar kay watamu.
25Sa ma ɗigera ti'e, hob kaw,
may sa ma joona as hobɗi dok-doko.
BIBALDA TA PELDETTA © L'Alliance Biblique du Cameroun, 2001