FILIPINA 4
4
1Kay na'ta ɓosiyon sa hayan kigina, sa gizangi vanawa kay wigi irgiya lo, nigi sa firita hiɗi bogorayna vanu, sa hayan kigina, lakgi dono'o hay Bum-Sumuna.
Gatta hiɗi teŋ-irta mara'a mara'a
2:1-3; Rom 16:1-4
2Nan gat Evodiya, nan gat Sintike kaw, kay nisi ma fi varta kep hay Bum-Sumuna. 3Awa, naŋ niran ma gasina hay lopna kaw, nan siɗawaŋ kay naŋ ma gut kuɗsiya, nisi sa dur hiɗi nanu hay labara ma firina, Klemaŋ hiɗi nuriyon segena sa hay lopna, sa sesi ɗoy hay ɗerwella vi irita kaw.
4Firigiya hay Bum-sumuna dok-dok, nan min di lo, firigiya.
5Hin sumuna kaf wi ŋalda vigiya, Bum-Sumuna ka goboyo.
6Yorgi tuwgi kay va ne' noŋɗi, may hay slen kaf, hay siɗawta hiɗi giɗel-delta, hay lop ma slugona, ligi siɗawta tam Lawna kaw. 7Toyta vi Lawna ta suw yamda-wida kaf, ma ŋom dikgiya hiɗi varta vigiya hay Kristu Yesu.
8Ɓosiyonna, va ma hinin kayn ala, sle ma gasina kaf, sle ma nagay kay sli-yamda kulota kaf, sle ma ɗigerta kaf, sle ma bay-liwisna kaf, sle ma vi dikŋa kaf, sle ma jif lawta kaf, lopna ma ŋaana hiɗi ma nagay kay suburta, nam kaf kayni ma lin mi varta vigiya; 9va ma nigi hatamiya, fumawa, humumiyawa kaw, hiɗi ma nigi wum hayanu, ligi kuɗumu. Lawna vi toyta ma mus hiɗi nigiya.
Gi deɓta vi Paulus
2 Kor 9:6-15
10Nan firi ŋolo hay Bum-sumuna kay nigi hot zliy varta vigi kulo kan mara lo; nigi var nala, may nigi fi hagatɗi. 11Nan di nala kay slen ma nan minimnaɗi, kay tuwan hatay kay mus firi hay liyn ma nan ka haya. 12Nan wi musta ma hay hawta, nan wi musta ma hay fita ŋolda kaw. Hay slen kaf, hay liyn kaf kaw, nan hatay a mus hobaya, a mus hay mayta-cita, a mus hay fita ŋolda, a mus hay dalana kaw. 13Nan as li slen kaf kuɗ nam ma ka vulan donota. 14Hay na'ta nigi li ŋaa'a kay tap hiɗi nanu hay zumalda vanu.
15Nigi sa Filipina, nigi kay tuwgi kaw wi slen kayni, kay hay tun cawta vi kusta vi labara ma firin pa, hay li ma nan hin Makedoniya aya, ekklesiya tara ta tapay hiɗi nan tayɗi, tapay hiɗi nan kayni ti ekklesiyata vigiya tuta, na' tapay hiɗi nanu hay vulda hiɗi fida kaw. 16Kay hay Tesalonika, nigi vulan sle ma ŋom ŋil tuwan ayawa sem ma'. 17May kayni kay nan ka gar vuldaɗi; va ma nan garam kayni, mi vuɗna ma min li ŋolo, ma may tigi pana. 18Nan fi slen pet, nan ka hay asta ŋolda kaw; nan hobawa, kay nan fi hay ɓam Epafroditus vulda ma may tigi pa, ma ŋray ki urdina ma his ŋaana nala, ɗifinna ma Lawna vumu, ma kiram ŋaa'a kaw. 19Lawna vanu ma vulgi slen ma ŋom ŋil tuwgi petna kuɗ farayna valamu, hiɗi gajijita hay Kristu Yesu. 20Gajijita tam Lawna buya hay vatɗita hay vatɗita. Amen!
21Gi deɓ mi sa peldetna kaf hay Kristu Yesu. Ɓosiyonna sa ka hiɗi nanu gigi deɓe kaw. 22Sa peldetna kaf ka gigi deɓe, suw pet nisi sa ka hay ziyna vi Cesar.
23Slugota vi Bum-Sumuna Yesu Kristu mus hiɗi Ŋusta vigi musge!
Currently Selected:
FILIPINA 4: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001