KOLOSENA 1
1
Ɗek-tuwta hiɗi gi-deɓta
Efes 1:15-19; Fil 1:3-6
1Paulus, apostolla vi Yesu Kristu, kuɗ minda vi Lawna, hiɗi ɓasuyna Timotewus, 2tam ɓosiyayn sa peldetna sa viyna hay Kristu sa ka hay Koloseya, slugota tigiya hiɗi toyta vi Lawna Buy pa.
3Numa gi deɓ mi Lawn bum Bum-Sumuna vaya Yesu Kristu, numa'a siɗaw dok-dok kigiya kaw, 4kay numa humi labara kay vida vigiya hay Kristu Yesu, hiɗi ti-kamda vigiya ta nigi la' tam sa peldetna kaf, 5kuɗ cubta-sle'ta ta ka ŋomi kigiya hay wuralawna, kuɗ yoboyna vi gasita, yoboyna vi labara ma firina, ma ɗekay goy tigi jewe. 6Labara ma firina namna coowa tigiya, ki nam ka vuɗ vuɗna, ka wul ŋolo hay nagata kaf nala kaw; nam ka jargiya ki kayn nala, tun caw tam buur ma nigi huma, wi slugota vi Lawna pa kaw, kuɗ gasita, 7Ki hatta ta nigi fa' kuɗ Epafras nirma ma lopna ma hayma kalamna nala; namu mi sunda vi Kristu ma gasina kigiya, 8nam duma ala Ŋusta ka li lopna ma minda hay dikgiya.
Siɗawta vi Paulus, Kristu mi ma jewna
Fil 1:9-11
9Kuɗ kayni numa kaw, tun caw tam buur ma numa hum labara pa, numa ka siɗaw Lawn dok-dok kigiya, numa ka jobom ala nam ma hobgi hiɗi wida kay wi minda valamu, hiɗi yalla hiɗi yamda-wida kaw kuɗ Ŋusta. 10Kay nigi ma poy nagaya vok ir Bum-sumuna, kiram ŋaa'a hay slen kaf, nigi ma vuɗ vuɗna vi lop ma ŋaana kaf, wulgi kulo'o hay wida vi Lawna kaw; 11Muɗgi dono'o hay slen kaf kuɗ donota valamu ta hobay hiɗi gajijita, a nigi ma muɗ goy si sum sa so tuwsiya, ŋal hay zumalda kaw; 12hiɗi firita gigi deɓ mi Bumna, nam ma muɗgiyawa nagay a nigi yaw vocota vi sa peldetna hay haraŋa. 13Nam butayawa goy hay gaŋeraŋa vi jufunda, nam kaliyawa hay mulda vi goora valamu ma hayam kalamna, 14namu ma butayawa goyo, vulay gidawa kay sulukŋa vaya.
15Nam ma tuwam ŋray hiɗi Lawna ma sa wumɗina, nam ma vuɗi jew sle ma kotina kaf. 16Kay hay namu slen kaf ay kotiya, hay wuralawna, gaa kay nagata kaw, slen ma san as wum hiɗi iramu hiɗi slen ma san as wum hiɗi iramɗin kaw, zlamayn-mulda, mulda, mulda ta juni kuɗ mulda, gaŋeraŋa. Slen kaf kotom mi namu, kotom malam namu kaw. 17Nam ay jew slen kaf, slen kaf lakay iri kayn kuɗum namu. 18Namu mi yamda vi tuwna. Tuwna kayni ti Ekklesiyata. Namu mi cawa'ta tunita, ma vuɗi jewe jar sa mitina, kay hay slen pet nam ma mus mi ma jewna. 19Kay Lawna mini ala asta valam kaf ma mus kay goora valamu. 20Kay toy jar slen kaf hiɗi nam kay tuwamu, la sle ma gaa hay nagata, la sle ma kulo hay dukalawna kaw, hay li ma nam li toyta hiɗi namu, hiɗi mitta valamu kulo kay gu-ma-grakŋa.
21Nigi kaw, jewe nigi ay si sum sa pulla, nigi ay si sum sa gawta kuɗ vaara vigiya hiɗi lopna vigi ma joona, 22wulini nam toygi jargiyawa hay mitta valamu hay sliw-tuwamu, kay lakgi peldete bay joota vok iramu, bay va ma joo katgiya, bay law ma joo kigiya kaw. 23La gasi nigi lak hay vida, segi ini gaa'a, piy gaa ɗeŋe kaw, kay nigi ma dol goy gine'e hiɗi cubta-sle'ta vi labara ma firina ma nigi humumnaɗi, labara ma firina ma kusi tam jaf-sumun kaf gaa kay nagata. Labara ma firina ma nan Paulus muɗi sa ma sunda valamna.
Lopna hiɗi duura vi Paulus
Efes 3:1-13
24Wulini nan li firiya hay lasta ta nan ka ca' kuɗgiya, hay sliw-tuwanu nan ka hob vun lasta vi Kristu ta hini bay li hay sliw-tuwna valamu, kayni Ekklesiyata. 25Wulini nan muɗi sa ma sunda va'a, Lawna ganawa sunu kay digi yoboyna valam goy hay liyam kafe, 26kay ŋayayta ta ay ŋayay hay busata ŋolo tam jaf-sumun kafe, may wulini maawa goy haraŋi tam sa peldetna valamu, 27nisi sa Lawna min ɗek kirgiya gajijita hiɗi asta vi ŋayayta na'ta jar sa waana, kayn di ala Kristu haygiya mi cubta-sle'ta vi gajijita. 28Numa di labar goy kayn kalam namu, numa ka di sumuna kaf kirsiya, numa ka hat sumun kaf kaw hiɗi yalda, kay muɗ sumun kaf ɗeŋe hay Kristu. 29Kuɗ na'ta kayni nan ka li lopo, nan ka dur hiɗi gaŋeraŋa valamu ma ka li lop hayan dono'o.
Currently Selected:
KOLOSENA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001