ŊAƁTA 25
25
Nisi girif lawayn ma waana hay fulda vi Mowab
1Sa Israyella ka lakay hay Sittim; nisi tun caw li tuwsi viyuw hiɗi guro-boyna vi Mowab. 2Guro-boy sa Mowabna yi sumuni hay ɗifinna vi lawayna visiya; sumun ti'e, dab voksi gaa vok lawayna visiya. 3Israyella jun tuwsi tam Baal-Pewor, nala Ma-Vatɗina muɗ ɦiya kat sa Israyella.
4Ma-Vatɗina di tam Musus: Tokaŋ sa ŋulona vi Israyel kafe, sa li joona naŋ ma ɓalsi kulo kat guna vok ir Ma-Vatɗina goy hay fatta, kay ɦiyda vanu tam sa Israyella ma vat goyo. 5Musus di tam sa ka kitana vi Israyel: Sa kuɗgi gigekaw ma ci sumuna valamu sa jun tuwsi tam Baal-Pewor.
6Ɗuw na kayni, sa mara jar gurona vi Israyel kep co'o, nam mar cata Madiyanta kuɗum kepe jar guro-biyomna, Musus hiɗi gurona vi Israyel kaf wi kayni, kay nisi kaf ka tokay vun guɗuk ma fi-tuwna kay tiya. 7Hay li ma Fineyas goora vi Eliyazar, goor-ŋolona vi mul-ma-ɗifinna Aaron wi kayni, nam fok kulo'o jar tokŋa, sli yakat hay ɓalamu. 8Nam tap kuɗ sa namna hay guɗukŋa valamu, sana hiɗi cata nam jiksi haysi ma' pete, nala bakmaran vat goyo jar sa Israyella. 9Sum sa bakmaran cisin noŋ pet co birim dok-ma' yam fiɗi.
10Ma-Vatɗina di tam Musus ala: 11Wulin kayni, ɦiyda van ta tam gurona vi Israyella, Fineyas goora vi Eliyazar, goor-ŋolona vi Aaron vata'awa goyo, kay jar sa Israyel kayni, ciwerta van ka hay dikamu, hay ɦiyda vanu, nan may vat sa Israyel goy noŋɗi. 12Kuɗ kayni naŋ ma di ala nan min vi bonota ta toyta hiɗi namu. 13Bonot na'ta ma hin kalamu hiɗi jafna valam ɗawni, ti bonota vi ɗifin ma vatɗina, kay nam li ciwer ŋolo kay Lawna valamu, kay nam li poorawa kay gurona vi Israyel.
14Sa ma Israyel namna ma nisi cum goy hiɗi goota ta Madiyanta yum Zimri, nam mi goora vi Salu; mi sa ma ŋolla hay jafna vi Simeyon. 15Cata ta Madiyanta ta ca' hiɗi namta ya 'ala Kozbi, goota vi Sur, nam mi ma ŋolla vi sum sa may goy hay jafna vi Madiyan pa.
16Ma-Vatɗina di tam Musus ala: 17Sa Madiyanna naŋ ma lassi ki sa gaw kaŋŋa nala, cisi goyo; 18kay nisi ɗek tuwsi goyo ki sa gaw kigin nala, kay nisi ɗutgi goyo hiɗi mileta visiya hay lawta vi Pewor, hiɗi lawta vi Kozbi ta ɓasusita, goota vi sa ma ŋolla vi Madiyan, ta fi mitta hay liyn ma bakmaran li'e kuɗ lawta vi Pewor.
Ŋaɓta mara lo bugol kalta visi goy hay fulda
19Bugol bakmara namna kayni,
Currently Selected:
ŊAƁTA 25: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
