ŊAƁTA 14

Sum sa Israyella ŋel gatta

1Sumun kaf mun ciriyn giti-giti', nisi tiy hay henjeta. 2Gurona vi Israyel kaf ŋurnay kat Musus hiɗi Aaron, sumun kaf ka disi ala: Numa may mitay hay nagata vi Egipte numaɗi kay mige? Numa may mit muma hay fuldaɗi kay mige? 3Ma-Vatɗin naray hay nagat na'ta kay sumun ma cay goy hiɗi kew-gaferaŋa noŋ kayn kay mige? Ɗawni boyna vaya hiɗi guro-ŋolona vaya sumun ma vurumsiya! La nay hot hay Egipte kayn ma ŋaana ɗisu? 4Nisi ka di jar-tuwsiya: Tunay sa ma ŋol kep kaya, hotay hay Egipte.

5Musus hiɗi Aaron dab voksi gaa'a, kayni kir gurona vi Israyel sa tokayn kafe. 6Kuɗ nisi sa tuɗ fek nagatna ki Yosuwa goora vi Nun hiɗi Kaleb goora vi Yefune nala, nisi jet sligara visi goyo, 7nisi ka di tam gurona vi Israyel ki kayn nala: Nagata ta numa ŋuy haya'a kay feka'ta kayn ti naga ta ŋaa ŋolo, na' jifiya. 8La Ma-Vatɗin lay slugotawa ni, nam ma naray hay nagat na'ta, nam ma vulay naga na'ta: Na' ti nagat ta miira hiɗi yumda ka riŋ goy haya. 9May nigi ma ŋel vun Ma-Vatɗinɗi, ligi nar kay sum sa hay naga na'taɗi, nay ma parsi goy ki us ɦawa nala, ŋus ma kisin may loɗi, Ma-Vatɗin ka hiɗi naya, nigi ma li nar kisiɗi.

10Sum sa tokayn kaf ka di ala gisi hiɗi goorhoyona, may ɗuw na kayni, gajijita vi Ma-Vatɗin ɗek tuwa' kulo kay yam guɗukŋa, goy haraŋ kir gurona vi Israyel kafe. 11Ma-Vatɗina hot di mi Musus ala: Sumun kayni ma ɗuwan birek-cek ki kayn nala ta-ta dok-doko vat lancitige? Nisi ma lak bay vi hayanu ki kayn nala dok-doko ta-ta lancitige? Hiɗi ɗekka ta nan la' jarsit kayn pet kaw? 12Nan min watsi hiɗi bakmarana, nan ma vatsi goyo; may naŋu nan ma laŋ jafaŋ ŋolo, dono'o kaw suwsi nisiya. 13Musus di tam Ma-Vatɗina: Sum sa Egipten wi ala sumuna vaŋu naŋ yawsiyay goy jarsi goy hiɗi donota vaŋu, 14labar namna nisi vum mi sum sa hay nagat na'ta kaw. Nisi wi ala naŋ Ma-Vatɗina, naŋ ka jar sumuna vaŋu, naŋ ɗek tuwaŋ goy kirsi haraŋi, naŋ Ma-Vatɗina, ɗugulla vaŋ ka col gaa kisiya; hay falayta naŋ poy voksi hay ɗugulla, henjeta hay kut ta mokayta kaw. 15La naŋ min ci sum nisin goyo ki sa kep ɦawa nala, sum sa hum labara vaŋŋa ma di ɗawn ala: 16Ma-Vatɗina donota valam mayɗi, kay nar sum nisin hay nagata ta nam yi va kalamu kay vulsiya, nam vatsiyawa goy hay fulda. 17Wulin kayni Bum-Sumuna, ɗekaŋ donota vaŋ goyo hiɗi ŋolda vaŋu, ki naŋ kay tuwaŋ kaw di ala: 18Ma-Vatɗina may muɗ ɦiy koloyɗi, ŋaata valam suwiya, nam vul gida kay jiw-zlata hiɗi ŋel-vunda; may sa ma li joo nam hinim goy sle'ɗi, jiw-zlata vi sumayna nam ka kitata va' kay gurona tam jafsi voksi ɦidi kaw fiɗi kaw.

19Vulaŋ gid kay sulukŋa vi sumun tani, kuɗ ŋolda vi slugota vaŋu, ki naŋ vul giday mi sumun lakŋi tun cawi hay Egipte pa ta-ta tani nala. 20Ma-Vatɗin di'e: Nan min vulsi gida, ki naŋ joban nala. 21May nan ka iriya, gajijita vanu ma hob yam nagat kaf. 22Nisi kaf sa wi gajijita van hiɗi irsiya, hiɗi ɗekka ta nan la' hay Egipte, hiɗi hay fulda kaw, sa nemanawa sem doogo, sa min human vunan noŋɗina, 23nisi kaf kayni, nagat ta nan yi va kanu kay vula' mi sumaysita, nisi sa ɗuwan birek-cek kaf kayni as wi naga na'taɗi. 24Kay sa ma sunda van Kaleb ŋusta ta hayamta na' ir va'a, nam hum kuɗ dita van noŋ kafe, nan ma naram hay naga na'ta ta nam ay haya'ta, gurona valam ma lak haya'a. 25Sum sa Amalekŋa hiɗi sa Kanaaniyan ka gaa hay liyn ma beɗna: Jifin ɗawni nigi ma ŋuy goyo, tuɗgi hay fulda, tuɗgis tam niy-lum ma slawna.

26Ma-Vatɗina di tam Musus hiɗi Aaron ala: 27Sum sa joon tani nan ma hinsi ŋurnay katan nala ta-ta lancitige? Ŋurnayta vi gurona vi Israyel ta nisi ka ŋurnay katanta nan huma'awa. 28Naŋ ma disiya: Ma-Vatɗin di ala nam ka iriya, nam min li tigiya ki nigi law hay humam nala. 29Nigi ma mit goy hay fulda, nigi sa li ŋaɓta vigi goyn kaf, sa tun caw tam busat dok-ma' ta-ta voko, nigi sa ŋurnay katanna 30Nagata ta nan yi va kan kay vulgiya nigi ma cuk haya' noŋɗi, ma kal haya' ɗawni si Kaleb goora vi Yefune hiɗi Yosuwa goora vi Nun tuta. 31May guro-ŋolona vigiya, sa nigi di ala sumun ma vatsi goyona, nan ma cuksi kulo hay nagat na'ta, nisi ma wi nagat na'ta ta nigi ŋula'ta. 32Nigi hayɗin ma mitgi goy hay fulda. 33Gurona vigi ma ŋuy hiɗi farayn hay fulda ir busat dok-fiɗi, nisi ma ziy ŋel-vunda vigiya, ta-ta nigi sumaysi ma vat goy hay fulda kaf tuta. 34Ki hay li ma nigi tuɗ fek nagata, nigi li buur dok-fiɗi nala kaw, nigi ma ziy jiw-zlata vigiya ir busat dok-fiɗi kaw; busat kep kay buur kep; nala nigi ma wi wurakŋa vi noy ma nigi noyan goyna. 35May nan Ma-Vatɗina, nan da'awa, sum nisi sa joona sa tok tuwsi kanna tani, nan ma lassiya, nan ma ŋalsi goy hay fulda, nisi ma mit goyo.

36Sum sa Musus cuksi kay fek nagata, sa muɗ sumun ŋurnay talamna, sa ŋul nagatna; 37sum nisi sa ŋul nagat kayni, bakmaran co kisiya, nisi miti gaa vok ir Ma-Vatɗina. 38Kuɗ sum nisi sa tuɗ ɗuw nagat kayni, hin kuɗsi iri mi Yosuwa goora vi Nun hiɗi Kaleb goora vi Yefune tuta.

39Musus tuɗ labar kayni mi gurona vi Israyel kaf, sumun kaf tun caw Yor ŋolo. 40Nisi fok kulo graw culum culum jik kulo hay sin hiɗiyta, nisi di'e: Numa humiya, numa min tuɗ hay liyn ma Ma-Vatɗin di kalamna, kay numa li sulukawa. 41Musus di'e: Nigi raw dita vi Ma-Vatɗin goyo kay mige? Kayni may asɗi, 42jikgi kuloɗi, kay Ma-Vatɗin may jargiɗi, hingi tuwgi vat goy kay sa gawt kiginɗi. 43Kay sum sa Kanaaniyana hiɗi sa Amalekŋa ka vokgiya, nisi ma cigi hiɗi kew-gaferaŋa, kay nigi muɗ ŋorgiyawa mi Ma-Vatɗina, nam ma tun vokgi loɗi. 44Nisi so'ot diksiya kay jik kulo hay sin hiɗiyta, may timgilla vi Bonota hiɗi Musus, ma ka jarsi hay guruna min kalay goyɗi. 45Ki kayn nala sum sa Amalekŋa hiɗi sa Kanaaniyana jikay gaa'a, kay hiɗiyta ta nisi ka lakay ka'ta pa, nisi ci sum sa Israyella, nisi digiɗsi ta-ta hay Horma.

Currently Selected:

ŊAƁTA 14: Massana

Highlight

Copy

Compare