ŊAƁTA 13
13
Sum sa ɗuw gul liyn doogo yam ma' cuki hay Kanaan
1Ma-Vatɗina di tam Musus ala: 2Cukaŋ sum sara'a kay nisi ma tuɗ fek nagata Kanaan, nagata ta nan min vula' mi gurona vi Israyel. Kuɗ jafna vi sumaysi kaf kayni ma vilek sa kuɗ sa ŋulon jarsi kep kep. 3Musus cuksis hay fulda vi Paran pa, kuɗ dita vi Ma-Vatɗina; sum nisin kaf si sa ŋulona vi Israyel. 4Kayni mi semda visiya: Hay jafna vi Ruben mi Samuwa goora vi Zakkur;
5hay jafna vi Simeyon mi Safat, goora vi Hori;
6hay jafna vi Yuda mi Kaleb, goora vi Yefune;
7hay jafna vi Isakar mi Yigwal, goora vi Yosef;
8hay jafna vi Efrayim mi Hoseya goora vi Nun;
9hay jafna vi Benyamin mi Palti, goora vi Rafu,
10hay jafna vi Zabulon mi Gaddiyel, goora vi Sodi;
11hay jafna vi Yosef, hiɗi jafna vi Manase mi Gaddi, goora vi Susi;
12hay jafna vi Dan mi Amiyel, goora vi Gemalli;
13hay jafna vi Aser mi Setur, goora vi Mikayel;
14hay jafna vi Neftali mi Nakbi, goora vi Vofsi;
15hay jafna vi Gad mi Gewel, goora vi Maki.
16Kayni si sum nisina sa Musus cuksiya kay fek nagata. Hoseya goora vi Nun, Musus kaam selem ala Yosuwa.
17Musus cuksi kayni kay fek nagata Kanaan. Nam ka disi ala: Yawgiyays tan pa jikgi hay gal ma kayamna, nigi ma jik kulo kay hiɗiyna, 18Nigi ma peɗgi nagata: La na' nanige kla, la sum sa haya'na nanige kla, la nisi dono'o lebo maŋaya kla, la nisi kiɗaya lebo ŋolo kla; 19nagat ta nisi haya'ta na' ir nanige kla; la na' ŋaa'a lebo joo kla; la hoyok-ziy ma nisi ka lakay hayamna ir nanige kla, la tuwam goy ɦawa'a lebo gulmun giy talamu kla; 20nagat ta nisi lakay haya'ta, la na' buɗuku lebo hebiya kla, la gu ka haya'a lebo mayɗi kla. Ligi tuwgi kursuli ŋolo, vuɗna vi sle ma hay nagatna nigi ma yawamaya. Kayni hay liyna vi gulda-gulda ma niy vokŋa.
21Nisi kaliya, nisi fek nagata, tun cawis hay fulda vi Sin pa ta-ta Rehob, hay hagata vi Hamat. 22Nisi jik hay gal ma kayamna, nisi co ta-ta hay Hebron, liyn ma Ahiman, Seskay hiɗi Talmay sa gurona vi Anak ka hayna. Hebron ini ir busat siɗiya jew Sowan hay Egipte. 23Nisi co ta-ta hay liyn ma beɗna vi Eskol, nisi ka ɓam gulda-guldana hiɗi vuɗn humamu, nisi gaɓam kay zugulla, sum sa ziyimna ma', nisi yaw vuɗna vi gu-grenadinna hiɗi gu-gumna kaw. 24Liyn namna nisi tunum selem ala liyn ma beɗna vi Eskol, kuɗ vuɗna vi gulda-guldana ma gurona vi Israyel kaam hay liy namna. 25Nisi ɗuw gul liyn ta-ta buur dok-fiɗi, bugol kayni nisi hotaya.
26Hay hotta visiya, nisi kalay tam Musus hiɗi Aaron, hiɗi gurona vi Israyel kaf, hay Kades, hay fulda vi Paran. Nisi vulsi labara, nisi vi labar mi sumun kaf lay, nisi vulsi vuɗ gu ma hay naga na'atan kirsiya. 27Kayni mi labar ma nisi vum mi Mususna: Numa tuɗi hay nagat ta naŋ cukma haya'ta. Na'a ti nagat ta miira hiɗi yumda ka riŋ goy haya' gasi. Vuɗna vi sle ma haya'n yawni. 28May sum sa haya'na nisi gaŋeraŋi, hoyok-ziyn gulmun ŋuyi talamu, nam ŋulo'o; gurona vi Anak kaw numa wisi ay haya. 29Sum sa Amalekŋa ziyna visi cuki hay gal ma kayamna; sum sa Hetiyena, sa Yebusiyena hiɗi sa Amoriyana ka cuki kulo kay hiɗiyna; sum sa Kanaaniyana ziyna visi ka cuki kel niy-lum ma ŋolla, kuɗ fiyokŋa vi niy-lumna Yordan.
30Sum sa tun caw ŋurnay tam Mususna Kaleb bassi gaa'a. Nam di'e: Tuɗaya, slay nagata, nay ma kol ka'a.
31May sum segen sa tuɗ hiɗi namna di'e: Nay as tuɗ dur sum nisinɗi, kay nisi dono suwaya. 32Nisi tun caw muɗ nagat na'ta bis kir gurona vi Israyel. Nisi di'e: Nagat na'ta numa ŋuy haya' kay peɗa' kayni, sum sa min lak ziy haya'na na' ŋalsi goyo, sum sa numa wisi ay kafna, si sum sa fiyok ŋolo; 33sum sa fiyokŋa sa gurona vi Anak, sa hay jafna vi sa fiyokŋa numa wisi aya, numa ɗuw tuwma voksi kayni ki baara ɦawa nala.
Currently Selected:
ŊAƁTA 13: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
