MIKKA 5
5
Sa ma su'da ma vuɗ hay Betlehem
1Nak Betlehem Efrata,
nak ti ta goota hay nagat Yuda kafe,
may hay naku sana van ma vuɗa,
nam ma ti mul kay sa Israyella,
namu mi sa ma jafam ay gaa jew ba-ɓa,
ay hay buur ma din-dinna pa.#5:1 Ɗuw hay Mat 2:6.
2Kuɗ kayni nam ma hinsi goyo,
ta-ta hay li ma na'a ta min vuɗ goora
ma vuɗum goy tuwa,
ta-ta hay li ma dir ɓosiyomna sa hinina
ma hoti tam gurona vi Israyel.
3Nam ma vul tuwam goy haraŋi,
nam ma ti mulda hiɗi donota vi Ma-Vatɗina,
hiɗi gajijita vi sem Ma-Vatɗina, Lawna valamu:
Nisi ma lak hay liyn ma va as josi loɗina,
kay semda valam ma tiya wulin pa,
ta-ta hay vun dabaŋ-gu'ta vi nagata.
4Sle'ta mara' ɗawn mi namu.
La sa ma Asiriya coowa hay nagata vaya,
tun selemawa kulo hay ziyna vaya ni,
nay ma zlar sum sa ŋomda kulo kiram siɗiya,
nay ma zlar sa yeriman kulo kiram glafandi may.
5Nisi ma ti mulda kay sum sa Asiriyan hiɗi kew-gaferaŋa,
sum sa hay nagata vi Nimrod nisi ma ti mulda kuɗsi vo'o kaw,
hay li ma sa ma Asiriyan coowa,
tun selemawa kulo nagata vayana,
nam ma butay goy hay ɓalamu.
6Dir sumuna vi Yakub ma tap jar sum sa kisna,
ki maɗayna ma may goy vi Ma-Vatɗina pa nala,
ki niy ma tol gaa hum-usna nala,
nam may zam ɓam saɗi,
kay san asay kay lumɗi.
7Dir sumuna vi Yakub ma tap jar jaf-sumun ŋolo,
jar jaf-sumun ŋolo,
ki zlona jar muuriyana ma kuɗ juruta nala,
ki goor-zlona jar farana vi fok-dimin nala;
hay li ma nam ka capa,
nam tay farayn gaa kuɗ selemu,
nam jet hegen goyo kaw,
sa ma as hulotom goy ɓalam mayɗi.
8Donota vigi ti kay sa gawt kigin tige,
sa gaw kigina vatis goy vatge.
9Ma-Vatɗina di'e, hay buur namna ɗawni,
kulumay ma ka jargina nan ma vatam goyo,
keke-ma-duura vigiya nan ma tom goy kafe.
10Hoyok-ziy ma ŋulona,
ma kay hay nagata vigiya nan ma ɦom gaa kafe,
gulmun ma ŋuyi tigina nan ma ɦom gaa kafe.
11Sum sa li nooyna hiɗi sa li gul-yalda nan ma vatsi goyo.
12Lawayn ma waana ma ka jargiya,
hiɗi slen ma nigi kotom hiɗi ɓigina nan ma tom goyo,
Nigi ma girif gaa vok va ma nigi lum hiɗi ɓigin loɗi.
13Lawayn waana vi Astarte ma ka jargina nan ma ɦom gaa'a,
nan ma to hoyok-ziyna vigi ma ŋulon gaa'a.
14Nan ma job yan ɗawn hiɗi ɦiyda ŋolda,
hiɗi dikan giy ku ŋolo
tam jaf-sumun kaf sa may human vunanɗina.
Currently Selected:
MIKKA 5: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
