MIKKA 4
4
Israyel ma fi tun-sukka
1Liyn ma co'o,
hay buur ma cawn ɗawni,
hiɗiy ta hay ziyda vi Ma-Vatɗina
ma inis kulo kay sin-hiɗiy hegena,
ya' ma day kulo suw hiɗiy hegen kaf,
sumun ŋolo ma dak kulo ka'a.
2Jaf-sumun ŋolo ma co haya,
nisi ma di'e:
Nigiyaya, jikaygi kulo kay hiɗiyta vi Ma-Vatɗina,
Nigiyaya, jikaygi kulo hay ziyda vi Lawna vi Yakub,
kay nam ma hatay hagata valamu,
kay nay ma poyay hay hagata valamu ta gurayta,
kay goy hay Siyon pa,
Gatta vi Ma-Vatɗina ma kalay goyo,
yoboyna vi Ma-Vatɗina ma kalay goy hay Yerusalem pa kaw.
3Nam ma ka kitat kay jaf-sumun ŋolo,
nam ma poŋ ir lawta jar naga ŋulo ma donona,
ma goy ginena.
Kew-gaferaŋa visi nisi ma zlam goy ɗugum ma zumu,
kaway-ma-duura visi nisi ma zlam goy hirami,
naga tara ta as fok kulo'o
kay tuɗ dur naga tara hiɗi kew-gaferaŋa loɗi,
sa as hum labara vi duura loɗi kaw.#4:3 Ɗuw hay Es 2:4.
4Nisi ma li ziy ɗawni,
gigekaw gaa kuɗ gulda-guldana hiɗi gu-gumna valamu valamu.
Sa ma as hiwirsi yisi ma li loɗi.
Kay vun Ma-Vatɗina Ma-vatɗina vi vok-ma-duura daawa goyo.
5Jaf-sum segen poy kuɗ lawayna visi ma waana,
May numa'a, numa ma poy hay semda vi Ma-Vatɗina
Lawn dok-dok ta-ta hay vatɗita.
6Ma-Vatɗina di'e:
Hay buur namna ɗawni,
sa dirlayna nan ma yawsi kulo diganu,
sa digiɗiy-goyna sa nan hinsi vun lastana nan ma hot toksiya.
7Dirsi ma hinina ma biya ɗawn goy hay sa dirlayn pa,
nagat ma fi dono ɗawn kuɗ sum sa ay noyay goyna,
Ma-Vatɗina ma ti mul kisiya kulo kay hiɗiyt Siyon,
tun cawis hay liy namna pa ta-ta hay vatɗita.
8Naku Yerusalem, gulmunna vi farayna,
hiɗiyta vi goot-cata vi Siyon,
mulda vag ka co'o,
mulda vag ta jewt ma hotay tagu,
kayn ti mulda vi goot-cata vi Yerusalem.
9Wulini lo nak tiya kay mige?
Wulini tuw-tit ŋolo ki cata ta ka puk nala,
kayni kay mul may kagɗi su?
Kay sa ma vulag gatta may loɗin su?
10Nak goot-cata vi Siyon, tiyag ŋolo,
ziyag tuw-tita ki cata ta ka puk nala,
kay wulini nak ma kal goy hay hoyok-ziyna,
kay tuɗ li ziy goy hay sinena,
nak ma kal ta-ta hay Babilon.
Ɗawni nak ma fi butta-goyta.
Ɗawni mi liyn ma Ma-Vatɗina
ma butag goy hay ɓam sa gaw kagŋa.
11Wulin kayn jaf-sumun ŋolo
tok tuwsiyawa kay duragu,
nigi ka di'e ala:
Nay muɗa' liwis muɗu,
iray cuk kay Siyon ca'.
12May nisi may wi varta Ma-Vatɗinɗi,
nisi may wi va ma hayamnaɗi,
nisi may wi ala nam toksi kayni,
ki san tok yam wan gaa hay muɗakŋ nalaɗi.
13Nigi guro-boy sa hay Siyonna,
yawgi kulo'o, taygi alkamarena,
nan ma ligi ki miyok ma kawayn nala,
ki tirek ma wayna nala,
jaf-sumun ŋolo nigi ma taysi gaa kuɗ segiya,
farayna visiya nigi ma muɗum goy ir manu,
muɗum mi Bum-Sumuna ma kay nagat kafna.
14Wulin kayni nigi guro-boy sa hay vokŋa,
tokgi vok-ma-duura vigiya,
sumun ka ŋuyaya,
nisi ka ci sa ma ka kitata vi Israyel kulo kiramu hiɗi zugulla.
Currently Selected:
MIKKA 4: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
