SA LEVITNA 3
3
Ɗifinna vi lop ma slugona
1La san min li ɗifin tam Ma-Vatɗina kuɗ lop ma slugona, la nam min lum ɗifin mi putu, la mi ma jufu lebo ta ca'a kaw, nam ma vulum vok ir Ma-Vatɗin ɗawni, mi ma moy may talamɗina. 2Nam ma tun ɓalam kalamu, nam ma ŋatam goy vun guɗuk ma fi-tuwna, muliyan-sa-ɗifinna gurona vi Aaron ma yam busuwn goy tam giwin-ma-ɗifinna kafe. 3Ɗifinna vi lop ma slugona nam ma ŋalam hay kuta vok ir Ma-Vatɗina, mul ma tam ruwatna hiɗi mul ma tapay talamna kafe. 4Glesna ma ma'na, mul ma ŋuyi talamna, ma ŋuyi tam furta, mul ma kay dukka, nam ma poŋom iram ma vun glesna goyo. 5Gurona vi Aaron ma ŋalam kulo kay giwin-ma-ɗifinna, cukum kay guna ma ka kulo kay giwin-ma-ɗifinna. Kayni mi ɗifin ma ŋalay hay kuta, hista valam ŋaa ŋolo kir Ma-Vatɗina.
6La nam lum ɗifin mi ɦuwa, la mi ma jufu, la ti ta ca'a kaw, la mi ɗifinna vi lop ma slugona, nam ma vulum mi ma moy may talamɗina. 7La nam min lum ɗifin mi goor ɦu-dimiya, nam ma naram vok ir Ma-Vatɗina. 8Nam ma tun ɓalam kay va ma lum ɗifinna, nam ma ŋatam goy vun guɗuk ma fi-tuwna; muliyan-sa-ɗifinna, gurona vi Aaron ma yam busuwn goy tam giwin-ma-ɗifinna kafe. 9Ɗifinna vi lop ma slugo namna nam ma lum vok Ma-Vatɗin ɗawni, nam ŋalay hay kuta: Mul-sliwna, giɗerta noŋ kafe, nam ma poŋa' ira goy hiɗi yam-ŋoora, mul ma kay ruwatna hiɗi mul ma tapay talamna kafe. 10Glesna ma ma'na, hiɗi mul ma talamna, ma ŋuyi tam furta, mul ma kay dukka, nam ma ɓurawam jaram goy hiɗi glesna. 11Muliyan-sa-ɗifinna ma ŋalam kulo kay giwin-ma-ɗifinna, kayni mi tin ma ɗifinna ma ŋalay hay kuta vok ir Ma-Vatɗina.
12La nam lum ɗifin kayn mi ɦu-mee'e, nam ma naram vok ir Ma-Vatɗina. 13Nam ma tun ɓalam kay va ma nam min ŋatamna, nam ma ŋatam goy vok guɗukŋa ma fi-tuwna, gurona vi Aaron ma yamam busuwam goy tam giwin-ma-ɗifinna kafe. 14Va ma nam ŋatamna, nam ma lum ɗifini, ŋalam hay kuta vok ir Ma-Vatɗina; mul ma ka ŋuyi tam ruwatna hiɗi mul ma tapay talamna kafe. 15Glesna ma ma'na, mul ma ka ŋuyi talamna, ma ka ŋuyi tam furta, mul ma tam dukŋa, nam ma kaam jaram ma goboy tam glesna goyo. 16Muliyan-sa-ɗifinna ma ŋalam kulo kay giwin-ma-ɗifinna. Mul namna kaf kayni mi tina vi ɗifinna ma ŋalay hay kuta, hista valam ŋaa'a ŋolo kir Ma-Vatɗina.
17Kayni ti gatta ta hini dok-dok kay jafna vigiya, hay liyn kaf ma nigi li ziy hayn ɗawni, nigi ti mul-sliwnɗi, ti busuwnɗi lay.
Currently Selected:
SA LEVITNA 3: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
