TIYNA VI YEREMIYAS 3
3
Lasta hiɗi teŋ-irta
1Nanu mi sa ma wi sarta hiɗi zugulla vi ɦiyda valamu.
2Nam tun vokanu,
nam tuɗan hay jufunda,
may hay haraŋaɗi.
3Hay buurta kaf nam ka ton hiɗi way-ɓalamu,
hiɗi ŋor-ɓalamu kaw.
4Nam liwekan sliwanawa,
liwekan ɗigiyanawa kaw,
nam kusan zokonawa.
5Nam gi damnawa kulo katanu,
nam ŋuyanawa hiɗi galakka hiɗi tuw-tita.
6Nam musanawa jar jufunda,
ki nisi sa ay miti jew ɓa-ɓan nala.
7Nam ŋuy gulmunnawa tanu,
kay nan ma kal goyɗi,
nam ɓalanawa gaa'a hiɗi jaɓ ma nekŋa.
8Nan yi ŋolo kay gar sa ma gutanna,
may nam duk vun siɗawta vanawa kafe.
9Nam tos hagatawa vokanu hiɗi hiɗiy ma fiyokŋa,
nam cal hagata vanawa goyo.
10Nam muɗi ki ursena ma baray vokan hay hagata nala,
ki zlona hay liyn ma ŋayayna nala.
11Nam calanawa goyo,
nam jetanawa goyo,
nam ganawa goy vun yorta.
12Nam gan ɓarawta valamu,
colanawa goy vokomu kay ɓen hiɗi na'a.
13Nam jikanawa hay furanu hiɗi ɓarawta vamu.
14Nan muɗi mi va ma sumuna van kaf cen kuɗumu,
hay buurta kaf,
va ma nisi gi nul hiɗi namu.
15Nam hobanawa hiɗi us ma galakŋa,
nam vulan goyo-goyna a ci'e.
16Nam ton siyanawa goyo hiɗi goorhoyona,
nam panawa gaa hay butuw-kuna.
17Naŋ gan iranawa goy gine'e hiɗi sle'ta,
ŋaata yan joka'awa.
18Nan di'e: Donota van kaf vatawa,
cubta-sle'ta van hay Ma-Vatɗina tay loɗi.
19Humaŋ gaŋ kay sarta vanu
hiɗi tulurta van ta goy hay hagata,
mi goyo-goyna hiɗi samna;
20Hay li ma human ganu,
ciwta vanu sutiya' to'o hayan kalafi.
21Wulini nan min var hay dikanu,
kuɗ na'ta nan cub hiɗi sle'ta.
22Kay ŋaata vi Ma-Vatɗina may vat noŋɗi,
slugota valamu ya' ma dab mayɗi;
23Ɗigerta vaŋu na' ŋolo,
naŋ hot la' tam sumuna hay culumta dok-doko.
24Ciwta vanu di ala:
Ma-Vatɗina mi ir ɓurawta vanu,
kuɗ na'ta nan min zamam ɓalamu.
25Ma-Vatɗina li ŋaata valamu tam nisi sa zamam ɓalamu,
nam ŋaa'a kay nisi sa garamna.
26Ŋaa'a ŋolo kay cub hotta vi Ma-Vatɗina hay kiliŋga.
27Ŋa'a kay sana a ziy juk ma nekŋa hay joriyota valamu.
28A nam mus gaa valam kepe,
ŋal kiliŋi kaw,
kuɗ va ma Ma-Vatɗin tunum kalamu.
29Nam ma pi vunam gaa hay butuwna,
bay ba cubta-sle'ta valam kafe.
30Nam ma vul geliyamu mi sa ma tomna,
nam ma hob hiɗi panta.
31Kay Bum-Sumuna may noyay goyo kay dok-dokɗi.
32May, hay li ma nam las sana,
san as muɗ kiram hawi kuɗ ŋaata valam ta ŋolda;
33kay nam las goora vi sana,
nam curoɗom kaw kayni,
may kuɗ minda valamɗi.
34Hay li ma sumun tay sum sa daŋgayna vi nagata gaa kuɗ sesi kafe,
35hay li ma sumun gun gasita vi sana vok ir ma Kulo-Jamna,
36hay li ma sumun slugut sana vun kitata,
Bum-Sumuna iram may wi kaynɗi su?
37Nam ma as di ala van kayni li'e mi gige?
Bum-Sumuna mi ma vul hagata ɗisu?
38Joota hiɗi ŋaata kalay goy kayni
hay ɓam nam ma Kulo-Jamna paɗi su?
39La nala sa ma irina yor tuwam kay mige lo?
Hin san gigekaw yor tuwam kay sulukŋa valamu.
40Ɗuway poyta vay ŋaa'a,
varay ka'a kaw, hotay tam Ma-Vatɗina.
41Yaway dikay hiɗi ɓay kulo'o kat Lawna ma ka kulo wuralawna:
42Numa li sulukawa,
numa ay sum sa ŋel gatta,
may naŋ vulma gid noŋɗi!
43Naŋ ŋuy tuwaŋawa hiɗi ɦiyda vaŋu,
naŋ sluma giɗerma'awa,
naŋ ci sumunawa bay kir hawi.
44Naŋ ŋuy tuwaŋawa hiɗi ɗugulla,
kay siɗawta vuma'a ma co taŋɗi.
45Naŋ muɗmaawa ki va ma liwisi,
ki tugosna nala kaw jar jaf-sum segena.
46Nisi ka mal vunsi goy katma'a,
nisi sa gaw kuma'na kafe.
47Ir ɓurawta vuma'a kayni ti narta hiɗi zulda,
ti vurumta hiɗi ɓulak-goyta.
48Zimiyna jaŋ kiran ki niy-ɓatna nala,
kuɗ ɦo-gaata vi sumuna vanu.
49Iran ka jaŋ zimiya bay tun-suku,
bay jaram ja'a kaw.
50Ta-ta hay li ma Ma-Vatɗina tun ŋalda valamu,
ɗuw ay kulo dukalawn pa;
51Iran ka lasanu kuɗ guro-boyna kaf
sa hay hoyok-ziyna vanu.
52Nisi digiɗanawa ki layta nala,
nisi sa ka' gaw hiɗi nanu bay lawta.
53Nisi ganawa gaa hay zulla iriya,
nisi ko hiɗiynawa gaa kanu.
54Niyna ɗubanawa gaa'a;
nan di ala: Nan baawa goyo.
55Nan yi semda vaŋ naŋ Ma-Vatɗinawa,
gaa hay zul ma wiŋŋa pa.
56Naŋ human delanawa,
naŋ ma duk humaŋu tam tiyta vanɗi,
tam ciriyna vanɗi kaw.
57Hay buur ma nan yi semda vaŋ kayni,
naŋ coowa goboyo,
naŋ di tan ala nan ma li narɗi.
58Bum-Sumuna, naŋ gutawa kay ciwta vanu,
naŋ but irita vanawa goyo.
59Ma-Vatɗina naŋ wi lasta vanawa,
nala naŋ joban yanu.
60Naŋ vi job ma nisi job yisi tannawa kafe,
law ma nisi pum kanna kafe.
61Ma-Vatɗina, naŋ hum ŋulda visiyawa,
law ma nisi pum kanna kafe.
62Ɓakŋa vi nisi sa yaw kulo katanu,
hay buurta kaf nisi ka ŋra lawt kanu.
63Ɗuwaŋ tige,
la nisi lakay gaa'a lebo kulo coliya kaw,
nisi gi nul kayn hiɗi nanu.
64Ma-Vatɗina, naŋ ma hot li tisi ki kayn nala kaw,
kuɗ lopna vi ɓisiya;
65Naŋ ma vulsi hay so'otta-dikga visiya,
be'da vaŋu ma nig kisiya;
66Naŋ ma slisi giɗersi hiɗi ɦiyda vaŋu,
naŋ ma vatsi goyo, gaa kay nagata vi Ma-Vatɗina kafe.
Currently Selected:
TIYNA VI YEREMIYAS 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001