YOSUWA 4
4
Hiɗiyna ma doogo yam ma'na
1Hay li ma nisi kaf ɦaw Yordan kulo ɦawna, Ma-Vatɗina di tam Yosuwa: 2Yawgi sumun jargi doogo yam ma', sa kep kuɗ jafna jafna. 3Nigi ma disi ala: Nigi ma co hay way Yordan, hay liyn ma muliyan-sa-ɗifinna lak hayna, nigi ma yaw hiɗiyn doogo yam ma', nigi ma tuɗum hay kaŋŋa vigiya kay nam ma bur tigi ɗawni.
4Yosuwa yi sum sa doogo yam ma'na sa nam vileksi jar sa Israyella, kep kuɗ jafna jafna. 5Yosuwa di tisiya: Tuɗgi vok timgilla vi Ma-Vatɗina Lawna vigiya, ɗiger hay way Yordan, gigekaw ma sli hiɗiy pelem kep kep, ŋray dig ŋaɓta vi jaf sa Israyella, 6kay kayni ma li ti ɗekka jargiya. Hay li ma grawta gurona vigi jobgiyawa ala hiɗiyn kayni ɗek mige ni, 7nigi ma hotsi dit ala: Kay niy-lumna Yordan so goyo vok timgilla vi bonota vi Ma-Vatɗina hay li ma nisi ɦaw niy-lumna Yordan kulo'o, hiɗiy namna ma lin mi gi-humda kay dok-dok kat gurona vi Israyel.
8Sum sa Israyella li kuɗ va ma Yosuwa dumna, nisi yaw hiɗiyn goy doogo yam ma' goy jar niy-lumna Yordan pa, ki Ma-Vatɗina di tam Yosuwa nala, kuɗ ŋaɓta vi gurona vi Israyel. Nisi jikis hiɗi namu hay kaŋŋa pa tuɗ lakam ɗawni. 9Yosuwa lak hiɗiyn doogo yam ma' goy way Yordan, hay liyna ma muliyan-sa-ɗifinna sa ziy timgilla vi bonota lak sesi hayna. Hiɗiy namna ka hay liy namna lak' ta-ta vaydi. 10Muliyan-sa-ɗifinna sa ziy timgilla lak hay way Yordan lak, ta-ta sle ma Ma-Vatɗina dum tam Yosuwa kay dum tam sumuna vunam hob kulo kafe, kuɗ slen ma Musus dum tam Yosuwan kafe. Bugolda sumun gos tuwsiya kay ɦaw kulo'o. 11Hay li ma sumun kaf ɦaw kulo ɦawna, timgilla vi Ma-Vatɗina hiɗi muliyan-sa-ɗifinna tun vok sumuna. 12Jafna vi Ruben, jafna vi Gad hiɗi gal jafna vi Manase gan tuwsi kay duura, nisi ɦaw kulo'o, tuni vok sa Israyella, ki Musus diys tisi nala. 13Sumun ir birim dok-fiɗi hiɗi sle-ma-duur hay ɓisiya jik vok ir Ma-vatɗina, tuwsi koti kay duura, nisi sli hagata vi fulda vi Yeriko.
14Hay buur na'ta kayni, Ma-Vatɗina muɗ Yosuwa ŋolo vok ir sa Israyel kafe, nisi hum kuɗum ki nisi hum kuɗ Musus hay buura vi irita valam kafe nala.
15Ma-Vatɗina di tam Yosuwa: 16Vulaŋ hagata tam muliyan-sa-ɗifinna sa ziy timgilla vi di-goyta kay nisi ma hin Yordan jikay kulo'o. 17Ki kayn nala Yosuwa vul hagata tam muliyan-sa-ɗifinna kay nisi ma hin Yordan jikay kulo'o. 18Hay li ma muliyan-sa-ɗifinna sa ka ziy timgilla vi bonota vi Ma-Vatɗina jikay goy hay way Yordan pa jikŋa, hay li ma nisi tun sesi kulo deŋel tunna, niyna vi Yordan hot hay baŋalamna de', nam tun caw jaŋ ki jew nala, nam hob goy hay liyamna.
19Sum sa Israyella ɦaw Yordan kulo kayni hay buurta doogota vi til ma jewna, nisi tun kaŋŋa visi hay Gilgal, hay gal ma kuɗuwna vi Yeriko.
20Hiɗiy namna ma doogo yam ma'na ma nisi yawamay hay Yordan pana, Yosuwa jakam kulo hay Gilgal.
21Nam di tam sa Israyella ala: Grawta hay li ma gurona vigi jobawa tam sumaygi ala hiɗiy namna lakŋi ɗek mige ni, 22nigi ma ɗek gurona vigiya, nigi ma disi ala: Hay li ma sum sa Israyel ɦaw Yordan kulo kayni, niy-lumna so goy voksiya. 23Kay Ma-Vatɗina Lawna vigiya so niy-lumna Yordan goy vokgiya, ta-ta nigi kaf ɦaw kulo'o ki Ma-Vatɗina Lawna vigiya li kat niy-lum ma slawna ma nam som goy vokaya, ta-ta nay ɦaw kulo'o nala. 24Kay a sum sa hay nagat kaf ma wi ala ɓam Ma-Vatɗina ka gaŋeraŋi, kay a nigi ma li nar dok-dok kuɗ Ma-Vatɗina Lawna vigiya.
BIBALDA TA PELDETTA © L'Alliance Biblique du Cameroun, 2001