SA KA KITANA 12
12
Duura hoti vo jar sa fi Efrayimna hiɗi sa fi Galaadna
1Sumuna vi Efrayim tok tuwsiya, nisi kalay hay gal ma gaana, nisi di tam Yefte: Hay li ma naŋ tuɗ dur gurona vi Amon, naŋ min yuma kuɗaŋɗin kay mige? Wulin kayn numa min do kut kuɗ ziyna vaŋu, ŋalaŋ kalaf lay. 2Yefte hotsi dita: Nan hiɗi sumuna vanu ci-wayt fok jarma ŋolo hiɗi gurona vi Amon, hay li ma nan yigiya, nigi may co butan goy hay ɓisiɗi. 3Hay li ma numa wi ala nigi a co gut kuɗmaɗi, numa tun mitma gaa ta', numa mok duura hiɗi gurona vi Amon kil', may Ma-Vatɗina vulsi hay ɓuma'a, wulin kayn nigi min yaway goy vaydi lo kay durma'a kayn kay mige?
4Yefte tok sum sa Galaadna kaf talamu, fok duura hiɗi sumuna vi Efrayim. Sumuna vi Galaad ci sumuna vi Efrayim ŋolo, kay sumuna vi Efrayim di'e: Nigi Galaad yawn si sumuna vi Efrayim hiɗi sumuna vi Manase sa piri goyna.
5Sum sa Galaadna sli giɗer niy-lumna vi Yordan ma sa Efrayimna as jik hayamna; hay li ma sana vi Efrayim coowa hay liy namna, min ɦaw kulo'o ni, sa fi Galaadna jobomu: Naŋ mi sa vi Efrayim su? La nam di ala a'a, 6nisi dumu: Daŋ ala Cibbolet. Nam di ala Sibbolet. Kay vunsi asay a yum goy hay liyamɗi. Nala nisi vumu, kalam goy hay giɗer niy-lumna, ŋatam goy de'. Hay li namna nisi ci sumun birim dok-fiɗi yam ma' jar sumuna vi Efrayim.
7Yefte ma Galaadna ka kitata vi sum sa Israyella ir busat karkiya, bugol kayni nam mita, nisi pum hay hoyok-ziyna vi Galaad mara kepe.
Ibsan
8Bugol Yefte, Ibsan ma Betlehemna ka kitata vi sum sa Israyella. 9Nam vuɗ guro sa jufayn dok-hidi, vuɗ sa boyn dok-hidi lay. Sa boyn nam vulsi goy kuɗ sum sara'a, jar sum sa goyna nam yaw guro-boyn dok-ɦidi mi gurona valamu. 10Nam ka kitata vi sa Israyella ir busat siɗiya. Bugol kayni Ibsan mita, nisi pum hay Betlehem.
Elon
11Bugol Ibsan, Elon ma hay jafna vi Zabulon ka kitata vi sa Israyella. Nam ka kitata visi ir busat doogo. 12Bugol kayni nam mita. Nisi pum hay Ayalon, hay nagata vi Zabulon.
Abdon
13Bugolom namu, Abdon goora vi Hilel ma Piratonna, ka kitata vi sa Israyella. 14Nam vuɗ guron dok-fiɗi, guro-ŋolona valam dok-ɦidi. Kuro ma joriyo ma nisi ɓe kalamna dok-siɗiya. Nam ka kitata vi sa Israyella ir busat glafandi. 15Bugol kayni nam mita, nisi pum hay Piraton, hay nagata vi Efrayim, kulo kay hiɗiyta vi sa Amalekŋa.
Currently Selected:
SA KA KITANA 12: Massana
Highlight
Copy
Compare
Share
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
