YAKUB 4

Dur hiɗi minda vi sliwna

1 Pet 5:5-9

1Duura hiɗi cirepta may jargi arige pa? Nam may goy vi minda vi sliwna vigiya ma dur hiɗi ɓetna vi tuwginɗi su? 2Nigi niŋa slena, may nigi fumɗi, nigi ci mati, nigi gar slena, may nigi as fum noŋɗi; nigi cirep tuwgiya, dur tuwgiya kaw, may nigi as fi va noŋɗi, kay mige nigi min garɗi. 3Nigi siɗawa, may nigi fiɗi, kay nigi siɗaw joo'o, kay nigi vatam goy hay minda vi sliwna vigiya. 4Nigi sa bay-gasina, a bonota vi nagata kayni ɦeɗem kat Lawna nigi may wi naɗi su? Kay na'ta sa ma min li bono hiɗi nagata nam ka gaw hiɗi Lawna. 5Nigi var ala ɗot di kayn goy waa'a su? Na' di ala: Ŋusta ta Lawn vula' hayaya nam dara' hiɗi hunayta. 6May nam vul slugota ŋol suwa, kay ɗot di ala:

Lawna ka gaw hiɗi sa subur tuwsina,

may sa hot yisi gaana nam vulsi suburta.#4:6 Ɗuw hay Lmn 3:34.

7Hotgi yigi gaa kuɗ Lawna, may fokgi kulo'o kay Matna, nam ma hingiya, pira kaw. 8Nigiyay goboy tam Lawna, nam ma ma goboy hiɗi nigiya kaw, muzgi ɓigi goyo, nigi sa sulukŋa, porgi dikgi goyo, nigi sa milena! 9Yorgiya, tiygiya, tiygi tuwgiya kaw; hin cenda vigiya muɗ goy tiyta, hin firita vigi muɗ goy yorta. 10Hot yigi gaa vok Bum-Sumuna, nala nam ma sligi yigi kulo'o.

11Ɓosiyonna, digi va ma joo kay tuwgiɗi, la san di va ma joo'o lebo ka kitat kay ɓasulumna, nam ka di joo'o, ka kitat kaw kayni kay vun-ma-gatna. La naŋ ka kitat kay vun-ma-gatna, naŋ may mi sa ma li kuɗ vun-ma-gatnaɗi, may mi sa ma ka kitata. 12Nam ma vul vun-ma-gatna, ma ka kitata kaw ka kepe, mi namu ma as suɗ sana lebo bam goyo; may naŋu, naŋ gige kay ka kitat kay ɓasuŋŋa?

Tam sa gar farayna

13May wulini nigi sa di'e: Vaydi lebo jifini, numa min tuɗ hay hoyok-ziyn ɗawni, lak haya ir busat kepe kay dok yam farayna, 14May va ma min li hay irita vigi grawta nigi may wumɗi. Nigiya ki noosna ma san wum ir liyn neeɗa ɦawa, bugolda may loɗi nala.#4:14 Ɗuw hay Luk 12:18-20; Lmn 27:1. 15May ŋaata nigi ma di ala: La Bum-Sumun min hinma iriya, numa li van kayni lebo van kayni. 16May wulini hay jigal-tuwta vigiya, nigi ka sli yam tuwgi kulo'o, subur-tuwta ta ki kayn nala kafta na' joo'o. 17La san wi kay li ŋaa'a may nam lumɗi ni, sulukŋa valamu ka hay kayni.

Currently Selected:

YAKUB 4: Massana

Highlight

Copy

Compare