YAKUB 1

Ɗek-tuwta hiɗi gi-deɓta

1Yakub sa ma sunda vi Lawna, vi Bum-Sumuna Yesu Kristu kaw, tam jafna sa doogo yam ma'na sa meray goyna, gigi deɓe.

Wakka hiɗi nemda

2Ɓosiyonna, wakka tara'a tara'a ta nigi min ŋaf hiɗi na'ta nigi ma ziya' hiɗi firita, 3Kay nigi wi ala wakka vi vida vigiya vuɗ so-tuwta, 4May la nanige kaw so-tuwta hob vun lop ma pasiyakŋa, kay nigi ma muɗ goy pasiyaki, va ma makgi mayɗi. 5May la sa jargiya yalla valam may asɗina, hinim job yalla tam Lawna ma vul hiɗi firita bay lawta, yalla ma vulis talamu kaw. 6May nam ma siɗaw kayni hiɗi vida, bay giriŋi, kay sa ma giriŋa, nam ŋray ca ki billa vi niyn ŋolla ma simeɗn digiɗim vokomu, ɦiwirim kulo'o kaw nala. 7Kay sa ma ki kayn nana ma var ala nam ma fi va hay ɓam Lawnaɗi. 8Kayni mi sa ma dikam ma' ma'na, mi sa ma tulur hay hagata valamu kaw.

9May hin ɓasuki ma hawna subur tuwamu kay ŋolda valamu, 10hin sa ma mayanda subur tuwamu hay hawta valamu kaw, kay nam ma ba ki ɓona vi usna nala. 11Kay fatta day kulo'o hiɗi vidikŋa va'a, na' so usna goyo, ɓona valamu yak goyo, jifiyta valamu vat goyo kaw, sa ma farayna ma hiɗi lopna valam ma nam lumna kaf ma vat goy ɗawn ki kayn nala.

12Sle'ta ka kay sa ma col dono'o hay nemda, kay hay li ma wakka valamu vatawa, nam ma fi bogorayna vi irita ma Lawna ŋaɓam tam nisi sa minimna. 13La hay li ma san ka hay nemda, nam ma di ala Lawn nemanuɗi, kay joota fi nem Lawnɗi, Lawna kay tuwamu nem saɗi kaw. 14May nemda vi san gigekaw, hay li ma darta vi tuwamu naram goyo hiɗi nilamda. 15Kay na'ta, hay li ma darta sli hayawa, na' vuɗ sulukŋa, hay li ma sulukŋa wulawa, nam vuɗ mitta.

Li kuɗ yoboyna vi Lawna

16Ɗutgi tuwgi goyɗi, ɓosiyon sa hayan kigina, 17vulda jifiyta ta ŋaata hiɗi vulda ɦawata ta pasiyakka may kulo wuralawn pa; nam may kulo vi Lawna ma bum haraŋa, Lawn ma mu'ɗina, haraŋa valamu may mu'ɗi kaw. 18Kuɗ minda valamu nam vuɗayawa hiɗi yoboyn ma gasina, kay nay ma muɗ goy vun-jaf ma niy jewna jar sle ma nam lumna.

19Nigi ɓosiyon sa hayan kigina, nigi ma wi ala, san gigekaw ma jak humamu kay hum gosoyo, may di gosoyɗi, muɗ ɦiy gosoyɗi kaw. 20Kay ɦiyda vi sana li va ma ɗigere vok ir Lawnɗi. 21Kay na'ta sle ma ges sana hiɗi lop ma joona kaf nigi ma cukum goyo. Yoboyn ma Lawn pum hay dikgina nigi ma vum hiɗi hot yamda gaata, kay nam as suɗgi goyo.

22May ligi kuɗ yoboyna, nigi ma humum ɦawa'a kay ɗut tuwgi goyɗi. 23Kay la san hum yoboyna, may li kuɗumɗi, nam ŋray ca ki sa ma ɗuw ir tuwamu hay kotoromna,#1:23 Kotoromna mi daraŋgalla lebo suwafana. 24hay li ma nam ɗuw ir tuwamawa, nam kal goy kayni, wulini wulini yalam jok ala nam ay ir nanige. 25May nam ma cuk iramawa hay vun-ma-gatna ma pasiyakŋa, vun-ma-gatna vi butta-goyta, la nam so tuwamu, may kay humum a yalam jok kayn goyɗi, la nam ŋomomu, san kayni ma fi sle'ta hay lopna valam noŋ kafe.

26La san var ala nam vi kuɗ Lawna, may ŋom sinamɗi, may ɗut tuwamu ni, vida valamu kuɗ Lawna muɗi sur waa'a kaw. 27Vida gasita bay gese vok Lawna Bumna kayn ala: Sar guro sa kuyuna hiɗi boy sa duhulla hay lasta visiya, ŋom tuwaŋu kay liwisna vi nagata kaw.

Currently Selected:

YAKUB 1: Massana

Highlight

Copy

Compare