ESAYA 7
7
Sa ma jobta Esaya law tam Ahas sem ma'
1Hay liyna vi Ahas goora vi Yotam, goora vi Oziyas mulla vi Yuda, Retsin mulla vi Siriya kalay li duura hiɗi Peka, goora vi Remaliya mulla vi Israyel. Nam kalay kay mok Yerusalem, may nam as a dura'ɗi. 2Nisi vul labar namna mi jafna vi David ala: Sum sa Siriyana vokŋa visi ka tuni hay Efrayim. Ahas hiɗi sumuna valamu diksi tun caw visi bat-bat' ki gu ma jar juruna simeɗn vum tuwam bat-bat' nala. 3Ki kayn nala Ma-Vatɗina di tam Esaya: kalaŋay goyo kay ŋaf ir Ahas, naŋu hiɗi Seyar-Yakub goora vaŋu. Goy sin lamna vi goloŋ ma ŋolla. Hay hagata vi sinena vi sum sa muz sligara. 4Naŋ ma di talam ala:
Musaŋ kiliŋ, laŋ nar noŋɗi,
gu-kuɓulusna ma ma'na ma ŋal nukŋ lakŋi,
hin dikaŋ ɓiraŋ vokom noŋɗi.
hin dikaŋ ɓiraŋ vok ɦiyda vi Retsin hiɗi Siriyaɗi,
hin dikaŋ ɓiraŋ kay gurona vi Remaliyaɗi.
5Kay mige Siriya ka var kay laŋ joo'o,
hiɗi Efrayim hiɗi goora vi Remaliya,
nisi ka di ala:
6Tuɗay duray Yuda,
nay ma gi narta kay hoyok-ziyna,
nay ma to hoyok-ziyn gaa'a,
ta-ta sum sa hayamna nay ma yawsi kafe,
bugolda nay ma tun mul kulo hay hoyok-ziy namna,
kayni mi goora vi Tabeel.
7Kayni ti dita vi Bum-Sumuna, Ma-Vatɗina:
Van kayni as liɗi,
van kayni ma co noŋɗi.
8Kay Damas kayni yamda vi Siriya,
Retsin kayni mi yamda vi Damas may.
Hini busat dok-karkiya yam vasl,
Efrayim ma to gaa'a,
nisi ma muɗ mi jaf loɗi.
9Samariya kayni ti yamda vi Efrayim,
goora vi Remaliya kayni mi yamda vi Samariya.
La nigi may col ɗeŋe hay vida vigiɗi,
nigi ma hulot goyɗi kaw.
10Ma-Vatɗina law tam Ahas lo ala:
11Jobaŋ tam Ma-Vatɗina Lawna vaŋu,
kay nam ma vulaŋ ɗekka kepe,
la hay liy ma gaana lebo la hay liy ma Kulo-Jamna kaw,
naŋ ma jobomu.
12Ahas hot dita:
nan may jobɗi,
nan min wak Ma-Vatɗina vanɗi.
13Nala Esaya di'e:
Nigi jafna vi David,
humgi tige:
To ma nigi to sutay sumun kayn may asgiɗi,
nigi joki to sutay Lawn lo kay mige?
14Kuɗ kayni Ma-Vatɗina kay tuwamu ma vulgi ɗekka,
ɗuwgiya goot-cata ma sli haya,
na' ma vuɗ goor kepe,
ma tunum semda valam ala Emmanuel.#7:14 Ɗuw hay Luk 1:31; Mat 1:23.
15Nam ma tum mi mul miira hiɗi yumda,
ta-ta hay li ma nam wi kay noy sle ma joon goyo,
kay vilek sle ma ŋaana.
16May jew a goor wi kay noy sle ma joon goyo,
vilek sle ma ŋaan kaw kayni,
nagata vi muliyan nisi sa ma'na
sa ka laŋ tuwaŋ nari ma noyis goyo,
17May kaŋ naŋ mulla vi Siriya,
kay sumuna vaŋu hiɗi mulda vaŋu,
Ma-Vatɗina ma mar buura ma sa bay wum iram tuwa,
tun caw tam buura ma Efrayim cal goy hiɗi Yuda pa,
18hay buur namna ɗawni,
raw-rawna ma ka goy vun niy-lumna Nil pana,
Ma-Vatɗina ma biwimiya,
yumna ma ka hay Asiriya nam ma biwimiya kaw;
19Nam ma co'o,
nam ma dak gaa hay lokŋa vi fulda,
hay beɗna vi hiɗiyna,
Nam ma mol kulo kay gu-zigiyna kaf,
Nam ma mol kay hatna vi farayn kaf.
20Hay buur namna ɗawni,
Ma-Vatɗina ma job kew-belet ay goy bugol niy-lumna pa,
hiɗi mulla vi Asiriya,
kay wel yamda hiɗi ɗuŋusna goy hiɗi na'a,
nam ma wel jiwera goy kaw.
21Hay buur namna ɗawni,
sa kep ma ŋom put kep,
ŋom fok ma' lay;
22Miira ma li ŋolo ta-ta sumun ma muɗ tum mi yam mula,
kay sumun ma muɗ tum ɗawn mi mul-miira,
kay san gigekaw ma hin hay nagata
ma tum ɗawni mi mul miira hiɗi yumna.
23Hay buur namna, ma muɗ ɗawni,
liyn ma sem gulda-gulda ka piy hayam birimi,
ti gurjut ir sikel birim kep kaw,
ma vulis goy hay ɓam zigiy-olla hiɗi gu-zigiyna.
24Sumun ma cuk kulo hayamu hiɗi barawna,
hiɗi diŋ-diŋ ɓarawta kaw,
kay hin hay nagat ɗawni mi zigiy-olla hiɗi gu-zigiyna.
25Yam-hiɗiyna ma sumun dilaɓam hiɗi ɗugumna,
sa as jik kulo kalam loɗi,
kuɗ narta kay zigiy-olla hiɗi gu-zigiyna:
luwayna sumun ma cukum kulo hayamu,
fok-dimin ma tayam gaa'a.
BIBALDA TA PELDETTA © L'Alliance Biblique du Cameroun, 2001