ESAYA 63
63
Buura vi job-yamna
1Nam ma may goy hay Edom pa,
hay Bosra pa,
hiɗi sligar ma tuwam ɗoyna,
hiɗi sligar ma wilena,
col kulo hiɗi yalam tuni kulo tiriŋ',
hobay hiɗi donota kaw,
nam kayni mi gige?
Kayni mi nanu ma ka law hiɗi gasita,
mi nanu ma ka hiɗi gaŋeraŋa kay suɗ sa'a.
2Sligara vaŋ slaw keŋe kay mige?
Sligar ma cuki taŋŋa
ki sligara vi sa ma kesl gulda-guldan nala kay mige?
3Nan ay van kep kay kesl gulda-guldana,
sa mara'a jar sumuna ay hiɗi nanɗi;
nan keslsiya hay ɦiyda vanu,
nan kirapsi gaa'a hay ɦiyda van ta ŋolta,
busuwna visi yam goyo tam sligara vanu,
sligara van kaf tuwam goɓa.
4Kay buura vi job-yamda ay ŋomi hay dikanu,
sa nan gussina busata visi coowa.
5Nan ay ɗuwa, sa ma gutan mayɗi;
nan hini van kepe, sa ma gut kuɗan mayɗi,
May ɓan gutanawa,
may ɦiyda-ŋolda vanu gutawa kuɗanu.
6Nan kirap sumun gaa'a hay ɦiyda vanu,
nan ɦoysi goyo hay ɦiyda-ŋolda vanu,
nan yamsi busuwsi goy gaa kay nagata.
Gi-humda kay ŋaata vi Lawna
7Nan min gi hum sumuna,
kay lopna ma ŋaana vi Ma-Vatɗina,
suburta vi Ma-Vatɗina,
kuɗ ŋaata kaf ta Ma-Vatɗina li taya.
Nan min di goyo kay ŋaata valamu
ta ŋolda tam jafna vi Israyel,
ŋaata ta nam li tisiya kuɗ slugota valamu,
hiɗi lopna valam ma ŋaana ŋol dak-daki.
8Nam di'e: gasiya, nisi si sumuna vanu,
gurona sa bay ɗutta,
namu mi ma su'da visi jew pa.
9Hay li ma nisi ka vun-zlata kaf,
nam may gi sa mara'a kay butsi goyɗi,
butsi goyn mi nam kay tuwamu,
hay minda valamu hiɗi slugota valamu,
nam kay tuwamu mi ma gussina,
namu mi ma gut kuɗsiya,
ziysi kaw, hay buur ma jewn kaf.
10May nisi ŋel gatta,
nisi muɗ ŋusta peldetta valam yora,
nala nam muɗ goy mi sa ma gawt kisina,
nam gi diram kay dursiya may.
11Ki kayn nala sumuna valamu
humsi gisi kay buur ma jewna hiɗi Musus:
Numa ma hawsi ay goy hay niy-lumna pa ka arige?
Hiɗi sa ma ŋomda vi farayna valamu?
Namu ma tun Ŋusta-Peldetta valamu jarsiya ka arige?
12Hay gal ma jufna vi Musus,
nam geɗ gilaŋatam ma wilena,
nam mun niyn goy voksi wilik',
kay semda valam ma tiya ta-ta hay vatɗita.
13Nam ɦawsi goloŋo hay zul ma wiŋŋa,
ki kulumna hay fulda nala,
nisi may sli zlaraŋgaɗay noŋɗi.
14Ki muura ma jik gaa hay lokŋa nala,
ŋusta vi Ma-Vatɗina kalsiyawa hay tun-sukka,
ki kayn nala kaw naŋ tunawa vok sumuna vaŋu,
kay semda vaŋu ma tiya hiɗi gajijita.
15Kulo hay wuralawna pa, ɗuwaŋu,
goy hay ziyna vaŋ ma peldetna ma gajijina pa,
hunayta vaŋu hiɗi musta jigerta vaŋu muɗ muɗtige?
Gulaŋ ma ɓiraŋ jititna hiɗi slugota vaŋu,
naŋ telemawa goy kan su?
16Buma'a kayni mi naŋu,
buma'a Abraham may wuma' noŋɗi,
Israyel kaw numa may kiram noŋɗi.
May naŋu, Ma-Vatɗina,
naŋ mi buma'a,
naŋu mi ma hay vatɗita pa yaŋ ala ma butma goyna.
17Ma-Vatɗina,
Naŋ calma goy gine'e hiɗi hagata vaŋu kay mige?
Naŋ muɗma dikma ɗeŋe,
kay numa ma li nar kuɗaŋɗi kayn kay mige?
Hotaŋiya, kuɗ sa sunda vaŋu,
kuɗ jafna vi vocota vaŋu.
18Sumuna vaŋ sa peldetna sli nagat kayn ir liyn neeɗa ɦawa;
sa gaw kuma'na tay liyna vaŋ ma peldetn gaa'a.
19Numa jew ɓa-ɓa ki sum sa naŋ may ti mul kisiɗi nala,
ki sum sa semda vaŋ may yiy tisiɗi nala.
Haha! Lali naŋ haw dukalawn goyo kay jikay gaa'a klasige!
Hiɗiyn ɗawni ma geɗ vokaŋu.
BIBALDA TA PELDETTA © L'Alliance Biblique du Cameroun, 2001