ESAYA 26
26
Nulla
1Hay buur namna ɗawni,
kayni mi nulla ma nisi ma gumu hay nagata vi Yuda:
Numa ka hiɗi hoyok-ziy ma dono'o;
su'da ta nam vulma'a mi gulmunna
hiɗi damna ma giy tam hoyok-ziy namna.
2Malgi vun-ziyn goyo,
hinsi cuk kalafi nisi jaf-sum sa ɗigera sa ŋom vida visiya.
3Tam nam ma coli ɗeŋe hay varta valamu,
naŋ vulum sle'ta, sle'ta.
Kay nam hin tuwam hay ɓaŋu.
4Hingi tuwgi hay ɓam ma Ma-Vatɗina kay dok-doko,
Kay Ma-Vatɗina, Ma-Vatɗina mi hiɗiyn ma vatɗina.
5Sa ay lakay hay liy ma kulo jamna nam ɦosiyawa gaa'a,
hoyok-ziy ma tuni kulo jamna nam tomawa gaa'a,
nam ɦom ta-ta gaa kay nagata,
ta-ta nam jo tam butuwna.
6Nam tayay gaa'a,
gaa'a sem sum sa hawna,
gaa sem sum sa maŋayna.
7Hagata vi sa ma gasina na'a ti ɗigerta;
naŋu ma ɗigera,
naŋ ka ɗiger hagat goy vok sa ma gasina.
8Nala kaw numa ka zamaŋgi mi ɓaŋ naŋu,
naŋ Ma-Vatɗina,
numa min tuɗ hay hagata vi kitata vaŋu, yaŋu,
yi semda vaŋ hay vunma'a,
kayni mi va ma ciwta vuma'a daramu.
9Ciwta vanu ka daraŋu kay henjeta,
ŋusta vanu kaw ka garaŋ hayan kalafi,
kay hay li ma kitata vaŋu ka gaa kay nagata,
sum sa hay nagatna hat kay li gasita.
10La nay wi haw sa ma joona,
nam hat gasitɗi,
nam kal tuwam hay joota hay nagata ta ɗigerta,
ŋaata vi Ma-Vatɗina ŋalda valam may tuni ka'ɗi.
11Ma-Vatɗina, ɓaŋ kulo fiyoko,
ɓisi as jo talamɗi.
Nisi ma wi ciwerta vaŋu ta naŋ la' kay sumuna,
nisi ma muɗ zulo'o;
ki kayn nala kut ma ŋal sa gawt kaŋŋa.
12Ma-Vatɗina, naŋ vul sle'ta hay dikma'a,
kay slen kaf ma numa lumna hobmat vunam mi naŋu.
13Ma-Vatɗina, Lawna vuma'a,
sa ŋulo sara'a ki naŋ nala ti mulda kuma jewe,
may numa yi semda vaŋ vunma kayni kuɗ slugota vaŋ naŋ kepe.
14Sa mitina as hot iri loɗi,
sa kiwena hot yaw kulo loɗi;
ki kayn nala naŋ coowa,
naŋ vatsiyawa goyo,
slena visi ma hum san as gum kalamna,
naŋ ɦasamawa goy kafe.
15Biyaŋ jaf-sumuna,
naŋ Ma-Vatɗina,
biyaŋ jaf-sumuna,
ɗekaŋ gajijita vaŋ goyo,
jaara vi nagat kaf naŋ ma hotom goy bugolomu.
16Ma-Vatɗina,
nisi garaŋu hay li ma nisi ay vun zlata,
nisi siɗaw taŋu hay li ma naŋ watsiya.
17Ki cata ta hayta ta goboy puka,
ka ci lasi, tiya kaw hay tuw-tita va'a,
nala numa kaw ay goy gine vok iraŋu,
naŋ Ma-Vatɗina.
18Numa kaw sli haya,
numa ci lasta,
hay li ma numa vuɗa,
numa vuɗum mi simeɗna:
numa li va ma suɗ nagat goyɗi,
sum sa haya'na may vuɗi goyɗi.
19Hin sa mitina vigiya hot iriya,
hin sa mitina vanu zliy kulo'o.
Zliygi kulo'o, firigi cah-cah',
nigi sum sa ziyna vigi jar butuwna,
kay maɗayna vaŋu mi maɗayna vi haraŋa,
nagata ma vuɗ nisi sa ay mitina.
20Tuɗgiya, sumuna vanu,
kalgi kulo kay ziyna vigiya,
dukgi vun-ziyn kulo bugolgiya,
ŋaygi tuwgi ir liyn neeɗa ta-ta ɦiyd ma vat goy tuwa.
21Kay Ma-Vatɗina ka kalay goy hay ziyna valam pa,
kay ka kitata kay joota vi sum sa hay nagata,
busuw ma jaŋ gaa kay nagatna yalam ma hin goy ɦawa'a,
sum sa fi cita-goyta nagat ma pisi gaa loɗi.
BIBALDA TA PELDETTA © L'Alliance Biblique du Cameroun, 2001