HOSEYA 5
5
Ma-Vatɗin min wat Israyel kay sulukŋa visiya
1Humgi dit kayni,
nigi muliyan-sa-ɗifinna.
Tungi ŋalgiya,
Nigi ziyna vi Israyella, jakgi humgiya,
Nigi sum sa hay ziyna vi mulla.
Kay kitat kayni na' ka kaay kigiya,
kay nigi ay muɗi ki jawta ta ganay gaa sem san nala hay Mispa,
Nigi ay muɗi ki luwanda ta ɓalay kulo kay hiɗiyt Tabor nala.
2Hiɗi ɗifin ma nisi lumna,
sum sa bay-gasina sir gaa voksi hay mat ma cina.
May nisi kaf nan ma watsiya.
3Sumuna vi Efrayim nan wisiya,
Sumuna vi Efrayim as ŋay tuwsi kan noŋɗi.
Wulin kayni, nigi sumuna vi Efrayim,
muɗ tuwgiyawa viyuwu,
Sumuna vi Israyel goɓ tuwsiyawa.
4Lop ma nisi lumna as hinsi a hoti tam Lawna visi loɗi,
kay mige ŋusta vi viyuwta ka jarsiya.
Kay mige nisi min wi Lawnɗi.
5Subur-tuwta vi sum sa Israyel ka li di-goyt kisi kay tuwa'a,
sum sa Israyella hiɗi sumuna vi Efrayim ma cuk gaa'a,
kuɗ jiw-zlata visiya;
Yuda ma nig gaa hiɗi nisi lay.
6Hiɗi fok-dimina visiya,
hiɗi luwayna visi lay,
nisi ma tuɗ gar Lawna,
may nisi ma fumɗi:
Kay nan ŋay tuwam goy kisiya.
7Nisi min vi kuɗ Ma-Vatɗinɗi,
kay mige nisi vuɗ guro sa pullawa ŋolo,
wulin kayn til kep ɦawa asay a vatsi goy hiɗi faraysi noŋ kirap'.
8Buwgi togolomna hay Gibeya,
buwgi togolomna hay Rama,
ciriygi kulo ŋolo hay Bet-Aven,
nisi ka bugolaŋu Benyamin.
9Hay buur ma kitat ɗawn Efrayim ma jet goyo,
nan dum tam sumuna vi Israyel kayn mi law ma gasina.
10Sa ŋulona vi Yuda nisi ki sum sa jok jar-liyn goyn nala;
nan ma puruf ɦiyda van goy kisiya ki niyn-ma-riŋŋa nala.
11Sa fi Efrayim muɗi sar ŋolo, sutaysi toy kay kitata,
kay nisi tap kuɗ gat ma sinna.
12Nan ma muɗ tam sa fi Efrayim ɗawn ki fotn nala,
nan ma muɗ tam sumuna vi Yuda ki mil ŋayakŋa nala.
13Sumuna vi Efrayim irsi ka wi joo ma nisi ka lumna,
sa fi Yudana ka wi mil ma tisina;
sa fi Efrayimna ka kal hay Asiriya,
ka giɗel del mul ma Yarebna,
may mul namna ma as kay yergi goyɗi lay,
as li gu vun milla vigiɗi lay.
14Sumuna vi Efrayim nan muɗ tisi ɗawn ki zlon nala,
Sumuna vi Yuda kaw nan ma muɗ tisi ki goor-zlon nala lay.
Nanu, nan ma jetsi goyo,
bugolda nan ma tun iranu,
nan ma yawsiya,
va ma jenna van sa ma as hulotom goy hay ɓan mayɗi.
15Nan ma tuɗa,
nan ma hoti hay ziyna vanu,
ta-ta hay li ma nisi ma di goy hiɗi vunsi ala nisi joo'o,
tun caw garanu,
hay li ma nisi coowa hay vun-zlata,
nisi ma hot yan lo.
Currently Selected:
HOSEYA 5: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
