EZEKIYEL 45

Ɓurawta vi nagata

1Hay li ma nigi ma li ŋaɓta kuɗ ɦayta kay ɓuraw nagat jargi voco'o, nigi ma yaw gal mara'a, tunum goy ir vi Ma-Vatɗina, galla ma peldetna hay nagata. Liy namna fiyokka valam ma li ir goldoŋ birim dok-ma' yam vasl, buɗukŋa valamu ir goldoŋ birim doogo, nam ma lin mi liy ma peldetna kalaf hay ir liyna valamu. 2Kuɗ liy namna nigi ma ŋa goldoŋ kis-vasl hay gefem fiɗi pete, kay liyn ma peldetna, nigi ma ŋa goldoŋ dok-vasl kay liy ma hini goy ɦawana hay galam kafe. 3Kuɗ liyn namna ma fiyokka valamu ir goldoŋ birim dok-ma' yam vasl, buɗukka valam ir goldoŋ birim doogo kayni, nigi ma ŋa liyn mara goyo kay liyn ma peldetna, kay liyn ma peldet suwina. 4Nam ma lin mi liyn ma peldetna vi nagata, nam ma lin mi liyna vi muliyan-sa-ɗifinna sa li lop hay liy ma peldetna, nisi sa co goboy vok ma Ma-Vatɗina kay li lopna valamu; kayni ma lin mi ziyna visiya, liyna ma tuni goy valamna kayni liy ma peldetna.

5Goldoŋ birim dok-ma' yam vasl kuɗ fiyokka, goldoŋ birim doogo kaw kuɗ buɗukka, ma lin mi galla vi sa Levitna sa ka li lop hay Ziyda, hiɗi ziy ma kalafn dok-ma'.

6Nigi ma ŋa liyn goldoŋ birim vasl kuɗ buɗukamu, ir goldoŋ birim dok-ma' yam vasl kuɗ fiyokomu, ŋray dig liyn ma ŋaɓam goyo kay liyn ma peldetna, nam ma li mi ir galla vi hoyok-ziyna, nam ma li vi sum sa Israyella kafe.

7Nigi ma hin liyn goy ɦawa'a hay gal ma ma'na vi ir liyn ma peldetna vi hoyok-ziyna mi mulla. Hinim kuɗ fiyokka vi liyn ma peldetna, hiɗi fiyokka vi ir liyn ma hini mi hoyok-ziyna, hay gal ma vulatina ta-ta hay vulatiya, hay gal ma kuɗuwna ta-ta fiyokka valam ŋray dig gal ma kepna jar hen ca, fokay hay jaara ma vulatin pa ta-ta tam jaara ma kuɗuwna. 8Kayni ma lin ti nagata valamu, ir galla valamu hay Israyel; muliyana vi Israyel ma yaw slen hay ɓam sumunɗi. May nisi ma hin nagata mi sa Israyella kuɗ jafna visiya visiya.

Lop ma mulla as lumna

9Bum-Sumuna Ma-Vatɗina di ala: Asawa nata, muliyana vi Israyel, hingi ɦawlata hiɗi vurumta goyo, ligi gasita hiɗi ɗigerta, butgi sumuna van goy ɓam curo'da vigiya. Din mi Bum-Sumuna Ma-Vatɗina.

10Slena vigi ma ŋa slena nigi ma kotom hay hagamu, dutta-kusta vigi ma li hay haga'a, gasasta ta ŋa mula ma li hay haga'a kaw. 11Dutta-kusta hiɗi gasasta ta ŋa mula ŋaɓta valam ma li ŋray ca: Gasasta ta ŋa mula ma lin mi gal-ma-doogona vi goor-birmilla, dutta-kusta ma lin ti gal ta doogota vi goor-birmilla kaw, ŋaɓta valamu ma li ŋray ca kuɗ goor-birmilla. 12Sikella ma li ir gera dok-ma'. Minna vigiya ma li ir sikel dok-ma', sikel dok-ma' yam vasl, sikel doogo yam vasl.

13Kayni mi vulda ma nigi ma yawam goyna: Gal ma karkiyana vi dutta-kusta vi alkamarena hay goor-birmilla nigi ma yawam goyo, gal ma karkiyana vi dutta-kusta vi orgena hay goor-birmilla nigi ma yawam goyo kaw. 14Ŋaɓta vi mula, kay gasasta vi mula kepe, gal-ma-doogona vi gasasta kay kor kepe, ma ŋray ca hiɗi goor-birmilla ma gasas doogona. Kay gasas doogo kayni ir goor-birmil kepe.#45:14 ŋaɓta kaf cani nay may wa' ŋaaɗi. 15Jar faray ma ɗorayna vi Israyel kayni, kuɗ farana vi fok-dimi ma kis-ma'na, nigi ma vi jaram kepe, kay li ɗifin ma ŋal-goyna hiɗi ɗifinna vi lop ma slugon hiɗi namu, kay nam ma lin mi ɦu-dimi ma poora vigiya. Din mi Bum-Sumuna Ma-Vatɗina. 16Sum sa hay nagata kaf ma li vulda na'ta kay mulla vi Israyel. 17Mulla ma li ɗifin ma ŋal-goyna, vulda hiɗi niy ma yamam goyna hay yuldena, hay til ma wulina, hay sabatna, hay buur ma yuldena jar jafna vi Israyel kaf; nam ma li ɗifin ma kay sulukŋa, vulda, ɗifin ma ŋal-goyna, ɗifinna vi lop ma slugona kaw, kay poora kay jafna vi Israyel.

Poora vi liyn ma peldetna

18Bum-Sumuna Ma-Vatɗina ka di ala: Hay buurta jewta vi til ma jewna, naŋ ma vi put-guju ma joriyo kepe ma moy may talamɗi, naŋ ma yaw sulukŋ goy kay liyn ma peldetna. 19Mul-ma-ɗifinna ma yaw busuwna vi ɦu ma ŋatam kay ɗifin ma kay sulukŋa, nam ma tunum kulo tam vun-ziyda, hay gef giwin-ma-ɗifinna fiɗi pete, tam dolla vi vun-ziyda vi wur-daŋŋa ma kalafna. 20Naŋ ma li ki kayn nala kaw hay buurta siɗiyata vi tilla, kay san ma li suluk bay varta bay wida kaw; ki kayn nala nigi ma li poora kay Ziyda.

21Hay buurta doogo yam fiɗita vi til ma jewna, nigi ma li Paskata. Kayni ti yuldeta ta ir buur siɗiya. Nigi ma ti fun-bay-kufna. 22Hay buur namna ɗawni, mulla ma li ɗifin ma kay sulukŋa hiɗi put-guju kep, kay por tuwamu, kay por sumuna kaw. 23Jar buur ma siɗiyana vi yuldet lakŋi, nam ma li ɗifin ma ŋal-goyna tam Ma-Vatɗina hiɗi luway-jufay siɗiya, hiɗi fok-gamala siɗiya kaw ma moy may talamɗi, ŋat ɦu-ŋek kep hay buurta buurta kaw, kay ɗifin ma kay sulukŋa. 24Nam ma vul futuwna ir dutta-kusta kepe kay put kep kep, hiɗi dutta-kusta kay ɦu-gamala kep kep. Doŋdoloŋ ma mula kay dutta-kusta kep kepe.

25Hay buurta doogo yam vaslta vi til ma siɗiyana, hay yuldeta, nam ma li ɗifin namna ma kay sulukŋa ir buur siɗiya lo. Difin ma ŋal-goyna ŋray ca, vulda vi mula ma li ŋray ca nala kaw.

Currently Selected:

EZEKIYEL 45: Massana

Highlight

Compare

Copy