EZEKIYEL 44

Girifta hay Tempel ma wulina

1Nam tuɗan tam vun-ziyna ma goy jiya vi liyn ma peldetna, ma iram ay muɗi hay gal kuɗuwna. Nam ay dukiya. 2Ma-Vatɗina di tanu: Vun-ziyn zawni ma hin dukiya, as malam goyɗi, sa as jik hayamɗi kaw. Kay Bum-Sumuna Ma-Vatɗina vi Israyel jiki haya. Nam ma hin dukiya. 3May mulla hayɗini, nam as mus gaa hay liy namna, kay ti funa vok ir Ma-Vatɗina, nam as jik hay hagata vi diɓira vi vun-ziyna, nam hot jikay goy hay haga na'ta lo.

4Nam tuɗan kat vun-ziyn ma gal gaana, vok ziyda. Nan ɗuw na kayni, gajijita vi Ma-Vatɗina ka hob ziyda vi Ma-Vatɗina. Nan dab vokan gaa kay nagata. 5Ma-Vatɗina di tanu: Goora vi sana, tun ŋalda vaŋu, ɗuwaŋ hiɗi iraŋu, humaŋ hiɗi humaŋu kaw kay sle ma nan min daŋu kay slen kaf ma diya kay ziyda vi Ma-Vatɗina hiɗi gatta va' kafe; tun ŋalda vaŋu kay liyn ma kal kalaf hay ziyda kaf, hiɗi liyn ma kal-goyna vi liyn ma peldetna. 6Naŋ ma di tam sa ŋel-gatta sa hay jafna vi Israyel kaf ala: Bum-Sumuna Ma-Vatɗin ka di ala: Nan makawa kay liwista vigi kafe, nigi jaf Israyella. 7Sum sa pulla sa bay ka-gosay hay diksiya hay sliwsiya kaw, nigi marsi kalaf hay liyna van ma peldetna kay muɗ ziyda van goy liwisi. Hay li ma nigi ka mar funa vanu, mul-sliwna hiɗi busuwna kaw, bonota ta jarayta nigi ja' goyo hiɗi slen ma liwisna vigi kafe. 8Nigi kay tuwgiya min kot tuw slena van ma peldetnɗi, nigi tun sum nisin hay baŋalgiya kay li lopna vanu hay liyna van ma peldetna.

9Ki kayn nala Bum-Sumuna Ma-Vatɗina di'e: Sa ma pulu ma bay ka gosaya hay dikamu, bay ka gosay hay sliwamu kaw as kal kalaf hay liyna van ma peldetnaɗi, sa ma pul ma ka jar sa Israyella as kal kalafi hay liyna van ma peldetnaɗi kaw. 10Kay sum sa Levitna sa vi tuwsi goy gine hiɗi nanu, hay li ma sum sa Israyella viy goyo, cal goy gine hiɗi nanu kay tap kuɗ lawayn ma waana visiya, nisi ma ziy nekka vi joota visiya. 11Nisi ma lin si sa gut guti ɦawa hay ziyna van ma peldetna, nisi ma lak hay vun-ziyna kay li lop hay vun-ziyna, faray ma sumun maramu kay ŋalam goy ɗifini, hiɗi ɗifin ma ɦawana kaw nisi ma ŋatsita, nisi ma lak vok sumuna kay sunsiya. 12Kay nisi ay lakay vok lawayn ma waana kay sun sumuna, kay nisi cuk jafna vi Israyel gaa hay sulukŋa, nala nan halafsiya hiɗi ɓan kulo sliya, kay nisi ma ziy nekka vi joota visiya. Din mi Bum-Sumuna Ma-Vatɗina. 13Nisi ma co kulo tam liyn ma ɗifinna van goboyɗi, nisi ma co goboy tam ziyna van ma peldetnaɗi, tam liyna van ma suwi peldetnaɗi kaw; nisi ma ziy zumalda vi zulota visiya hiɗi liwista visiya ma nisi li'e. 14Nan ma vulsi ŋomda vi ziyda, nisi ma li lopna hiɗi lop ma as lum hay ziy na'ta kafe.

15May muliyan-sa-ɗifinna sa Levitna gurona vi Sadok, nisi sa kot tuw liyna van ma peldetna, hay li ma sa Israyel cal goy gine hiɗi nanu, nisi hayɗin ma co goboy tanu kay sunanu, kay li ɗifin tanu hiɗi mul-sliwna hiɗi busuwna. Din mi Bum-Sumuna Ma-Vatɗina.

16Nisi hayɗini ma kal kalaf hay liyna van ma peldetna, nisi ma co tam tablena vanu kay sunanu, nisi ma kot tuw lopna vanu. 17Nisi ma ɗut katamul barawn kisiya; hay li ma nisi ka li lop hay vun wur-daŋŋa ma kalafna, lebo hay li ma nisi ka li lop hay ziyda, nisi as cuk sligar ma hiɗi ɗuŋus fok-dimin tisiɗi. 18Nisi ma ɗut katamul ma ciliy hiɗi barawn kulo kisiya, cuk kalesoŋ ma koti hiɗi barawn kuɗsiya, kantina ma mar zalla nisi as junum fursiɗi. 19Hay li ma nisi ma cukay goyo kay tuɗ hay wur-daŋ ma goy jiyna, hay wur-daŋŋa ma goy jiyna kat sumuna, sligar ma nisi li lop hiɗi namna nisi ma fokom goyo, nisi ma lakam hay ziy ma kalafna vi liyn ma peldetna; nisi ma cuk sligar mara tisiya, kay a ir sumuna ma ŋaf hiɗi sligar ma peldetnaɗi. 20Nisi ma wel ɗuŋussi goyɗi, nisi ma hin ɗuŋussi wulɗi kaw; may nisi ma ka ɗuŋussi goyo. 21Mul-ma-ɗifinna marige kaw as ci vinɗi hay li ma nam min kal hay wur-daŋŋa ma kalafna. 22Cata visi ta nisi sla'ta ma lin ti cata ta duhultaɗi, ma lin ti cata ta jufa' ga' goytaɗi kaw, may nisi ma yawsi si boy sa waya tuwa hay jafna vi Israyel, lebo ti cata duhulta ta ay ti cata vi mul-ma-ɗifinna. 23Nisi ma hat sumuna vanu kay poŋ ir sle ma peldetna hiɗi sle ma ɦawana, nisi ma ɗek sumuna kay poŋ ir sle ma gesayna hiɗi sle ma bay-gesna. 24Hay li ma ci-wayt ka'a, nisi ma gi dirsi kuɗ gasita, nisi ma ka kitat kuɗ dita vanu. Nisi ma li kuɗ gatta hiɗi ɗota-gatta vanu hay yuldeta van kaf, nisi ma li sabatna van goy peldete. 25Mul-ma-ɗifinna as tuɗ tam sa ma mitinɗi, kay nam ma muɗ tuwam liwisɗi; nam as muɗ tuwam liwis kayni kuɗ bulumu, sulumu, goora valamu lebo goota valamu, kuɗ ɓasulumna lebo ɓasulumta ta bay sli goy tuwa. 26Hay li ma nam por tuwamawa, nisi ma ŋa buur kalam siɗiya. 27Hay buur ma nam min kal hay liyn ma peldetna, nam ma mar ɗifinna ma kay sulukŋa valamu. Din mi Bum-Sumuna Ma-Vatɗina.

28Kayni ti vocota ta nisi ma fi'e: Nan ma lin ti vocota visiya. Nigi ma vulsi galla hay Israyelɗi, nan ma lin mi galla visiya. 29Nisi ma ti vunsi hiɗi vulda, hiɗi ɗifin ma kay sulukŋa, hiɗi ɗifinna vi jiw-zlata, slen kaf ma teli kay sa tun ɓalam talamɗi hay Israyel kaf nam visiya. 30Vun-jaf ma jewna vi sle ma nigi zumumna kaf, hiɗi sle ma nigi yawam goyna kaf nam vi muliyan-sa-ɗifinna; nigi ma vul vun-jaf ma jewna vi futuwna vigiya mi muliyan-sa-ɗifinna, kay bolda ma mus kay ziyna vigiya. 31Layna hiɗi muur ma mit goy kay tuwamu lebo jeti goyona, muliyan-sa-ɗifinna as a mutumɗi.

Currently Selected:

EZEKIYEL 44: Massana

Highlight

Compare

Copy