EZEKIYEL 37

Ezekiyel wi zokŋa

1Ma-Vatɗina kal donota valam hayanu, tuɗ colan goy jar liy ma lokŋa; nam ay hobay cep-cep' hiɗi zokŋa. 2Nam jikan kat zokŋa, kulo talam goboyo. Zok namna ay molay ŋolo, molay gaa hay lokŋa, soy goy ŋolo kaw.

3Nam di tanu: Goora vi sana, zok namna lakŋi hot muɗ iri lo su? Nan hotom dit ala: Bum-Sumuna Ma-Vatɗina, wi kayn mi naŋu. 4Nam di tanu: Daŋ vun-jobta tam zok namna, naŋ ma di talam ala: Zok ma soy goyna, humgi yoboyna vi Ma-Vatɗina. 5Bum-Sumuna Ma-Vatɗina ka di tam zok namna ala: Humgiya, nan min hin sukŋa kal haygiya, nigi ma hot iri lo; 6nan ma si sutayn tigiya, nan ma hin sliwn si tigiya, nan ma bar ɗigiy tigiya, nan ma kal sukŋa haygiya, nigi ma lak iriya. Nigi ma wi ala nanu mi Ma-Vatɗina.

7Nan ka di vun-jobta, ki hagata vuli tan nala. Hay li ma nan ka di vun-jobta, suwan li'e: Slen geɗa, zokŋa ɦur kulo tam tuwam goboyo, hena tam hena. 8Nan ɗuw kayni, sutayna ka siy tam zokŋa. Sliwn tun caw si tam zokŋa, ɗigiyna bur kay sliwna, may sukka tay hayam noŋɗi.

9Nam di tanu: Goora vi sana, daŋ vun-jobta, lawaŋ tam Ŋusta, daŋ vun-jobta, goora vi sana. Naŋ ma di tam Ŋusta ala: Bum-Sumuna Ma-Vatɗina ka di ala: Ŋusta, nagay goy hay gef-liyna ma fiɗin pete, biwag kay sum sa mitin lakŋi, kay nisi ma hot lak iriya. 10Nan di vun-jobta ki nam vulan hagata nala. Ŋusta kal haysiya, nisi muɗ iri lo, lak kulo kay sesiya. Nisi ay mi vok-ma-duura ma ŋolo ŋolo.

11Nam di tanu: Goora vi sana, zok namna kayni mi jafna vi Israyel noŋ kafe. Humaŋu, nisi ka di ala: Zokŋa vuma soowa goyo, cubta-sle'ta vuma vatay goyo, numa baawa goyo. 12Awa ŋaa'a, daŋ vun-jobta. Naŋ ma di tisi ala. Bum-Sumuna Ma-Vatɗina ka di tigi ala: Nan mal vun zulla vigi goyo, nan min daygi kulo hay zulla vigiya, nigi sumuna vanu, nan min hotgiyay hay nagata vi Israyel. 13Nigi ma wi ala nanu mi Ma-Vatɗina hay li ma nan ma mal vun zulla vigi goyo, nan ma daygiyay goy hay zulla vigi pa, nigi sumuna vanu! 14Nan ma tun Ŋusta van haygiya, nigi ma hot lak iriya; nan ma hot lakgi hay nagata vigiya, nala nigi ma wi ala nanu, Ma-Vatɗina, nan di va'a, nan li va'a kaw. Dita vi Ma-Vatɗina.

Mulda vi Israyel ta ma'ta ma hot tapa

15Ma-Vatɗina ka di yoboyn tan ala:

16Naŋu, goora vi sana, slaŋ gu-kuɓulus kepe, ɗoŋ kulo kalam ala: Tam jafna vi Yuda hiɗi tam gurona vi Israyel sa tapay tisin kafe. Slaŋ gu-kuɓulus mara kep lo, ɗoŋ kulo kalam ala: Tam Yosef, guna vi Efrayim, hiɗi tam jafna vi Israyel kaf sa tapay tisina. 17Tapaŋ vun gu-kuɓulus namna kulo tam tuwamu, a nam ma muɗ kulo way-ɓaŋu ki gu-kuɓulus ma kepna nala, kay a nam ma tap kulo way-ɓaŋu. 18Hay li ma sum sa hay jafna vaŋu joboŋawa ala: Va ma naŋ lum kayni naŋ may duma'ti cawamɗi su ni, 19naŋ ma hotsi dit ala: Bum-Sumuna Ma-Vatɗina ka di ala: Fay tuwayawa yo, nan sli guna vi jafna vi Yosef ma ka hay ɓam jafna vi Efrayim hiɗi jafna vi Israyel sa tapay tisina, nan ma tapam vun tuwam hiɗi guna vi Yuda, kay muɗum goy gu ma kepna. Nisi ma tap kepe hay ɓanu. 20Gu-kuɓulus namna ma naŋ ɗo kalamna ɗawni, naŋ ma vum hay ɓaŋu, goy kirsi haraŋ kafe.

21Naŋ ma di tisi ala: Bum-Sumuna Ma-Vatɗina ka di'e: Fay tuwayawa yo, nan yaw sa Israyella goy jar jaf-sumuna sa nisi kalay goy hay nagata visin pa; nan ma tapsi ay goy hay liyn kaf, nan ma hotsiyay hay nagata visiya. 22Nan ma muɗsi goy jaf-sum sa kepna hay nagata, hay hiɗiyna vi Israyel; nisi kaf mulla visi ma li kepe, nisi ma lak dok-dok hay nagat ma' loɗi, ma li ɓuraway goy kuɗ mulda ma' loɗi. 23Nisi ma muɗ tuwsi liwisi hiɗi Lawayna visi ma waana loɗi, kuɗ lawayn ma liwisna hiɗi jiw-zlata visi kaf loɗi; nan ma suɗsi goyo hay liyn kaf ma nisi li ziy haya, ma nisi li suluk haya kaw, nan ma porsiya; nisi ma muɗ si sumuna vanu, nan ma muɗ mi Lawna visiya may. 24Sa ma sunda vanu David ma muɗ mi mulla visiya, nisi kaf sa ma ŋomda visi ma li kepe. Nisi ma tap kuɗ dita vanu, nisi ma li kuɗ ɗota-gatta vanu, ma ŋoma'a kaw. 25Nisi ma li ziy hay nagata ta nan vula' mi sa ma sunda vanu Yakub, nagata ta sumaygi ay li ziy haya; nisi ma li ziy haya, nisiya, gurona visiya hiɗi guro-ŋolona visiya kaw, ta-ta dok-doko. Sa ma sunda vanu David ma li mi mulla visiya dok-doko. 26Nan ma jun bonota ta sle'ta hiɗi nisiya, bonota ta vatɗita ma li jarma'a, nan ma laksi gaa'a, nan ma biyasiya, nan ma tun liyn ma peldetna vanu jarsiya kay dok-doko. 27Liyn ma musta vanu ma tunis jarsiya; nan ma muɗ mi Lawna visiya, nisi ma muɗ si sumuna vanu may,#37:27 Ɗuw hay Slv 26:11-12; Zak 8:8. 28ki kayn nala jaf-sumuna ma wi ala nanu mi Ma-Vatɗina ma muɗ sa Israyel goy peldetna, hay li ma liyn ma peldetna vanu ma tunis jarsiya kay dok-doko.

Currently Selected:

EZEKIYEL 37: Massana

Highlight

Copy

Compare