KAL-GOYTA 40

Hagat vuliya kay col guɗuk namna kulo'o

1Ma-Vatɗina di tam Musus ala: 2Hay buurta jewta vi til ma jewn ɗawni, naŋ ma in tabernaklena kulo'o. Kayn di ala guɗuk ma fi-tuwna. 3Naŋ ma tun timgilla vi di-goyta hayamu, naŋ ma ŋuyum tuwam hiɗi sligar-gaɓayna. 4Naŋ ma mar tablena, naŋ ma lak slen goy kalamu. Naŋ ma mar va ma tun fitilla, naŋ ma kot fitilla kulo kalamu. 5Naŋ ma tun giwin-ma-ɗifinna ma ora ma ŋal urdina goy vok timgilla vi di-goyta, naŋ ma jun sligar-gaɓayna hay vun tabernaklena. 6Giwin-ma-ɗifinna ma ŋal farayn kalamna naŋ ma colom goy hay vun ma kal kalaf hay tabernaklena, guɗuk ma fi-tuwna. 7Doway-firina naŋ ma tunum jar guɗuk ma fi-tuwna hiɗi giwin-ma-ɗifinna, naŋ ma ɦok niy hayamu may. 8Wur-daŋŋa valamu naŋ ma ŋuyum talamu, naŋ ma jun sligar-gaɓayna goy hay vun wur-daŋŋa. 9Naŋ ma sli mul ma ɦok kamna, naŋ ma yamam goy tam tabernaklena hiɗi slen ma talamna kafe, naŋ ma lum goy peldete hiɗi slen ma hayamna kaf, ki kayn nala nam ma liys peldete. 10Naŋ ma yam mul tam giwin-ma-ɗifinna ma ŋal farayn kulo kalamna hiɗi jakŋ ma talamna kafe, giwin-ma-ɗifinna naŋ ma lum goy peldete, nam ma li goy peldet suwa. 11Naŋ ma yam mul tam doway-firina hiɗi diram ma yori gaana, naŋ ma lum goy peldete. 12Aaron hiɗi gurona valamu naŋ ma narsi kulo goboy tam guɗuk ma fi-tuwna, naŋ ma muzsi goy hiɗi niyna. 13Naŋ ma cuk sligar ma ɗifinna tam Aaron, naŋ ma ɦok mul kalamu, naŋ ma lum goy peldete, kay nam ma hin dok-doko vun lopna vi ɗifinna. 14Naŋ ma mar gurona valam taŋ goboyo, naŋ ma cuksi sligar-tuwn tisiya, 15naŋ ma ɦoksi mul kisiya ki naŋ ɦok mul kay busi nala kaw, kay nisi ma hin li lopna vi ɗifinna dok-doko. Hiɗi mul ma ɦokay kisina, nisi hiɗi jafna visi bugolsi ɗawn ma vi ala lop ma ɗifinna hini hay ɓisi dok-doko. 16Musus li kuɗ slen ma Ma-Vatɗina dumtin kafe.

17Hay buurta jewta vi til ma jewna vi busata ma'ta, tabernaklen inawa kulo'o. 18Musus in tabernaklen kulo'o, nam tunum diram ma gaana, lak biremna hiɗi malla, in dolla kulo'o. 19Nam vi guɗukŋ kulo hay tabernaklena, nam lak borgona ma kotay hiɗi tantan kulo kalamu, ki Ma-Vatɗina vul hagata tam Musus nala.

20Nam sli di-goyta, tuna' kalaf hay timgilla; cuk malla tam timgilla; nam tun goɓolokona kulo kay timgilla may. 21Nam mar timgilla hay tabernaklena, nam lak sligar-gaɓayna ma ɓuraw jar-liyna. Nam kusuɓ tuw timgilla vi di-goyta, ki Ma-Vatɗina vul hagata tam Musus nala.

22Nam tun tablena hay guɗuk ma fi-tuwna, hay gal ma gaana vi tabernaklena, goy ŋor sligar-gaɓayna; 23nam lak fun goy kuɗ tuwamu vok Ma-Vatɗina ki Ma-Vatɗina vul hagata tam Musus nala.

24Va ma tun fitilla nam colom hay guɗuk ma fi-tuwna, goy vok tablena ɗiger, hay gal ma kayamna vi tabernaklena; 25nam kot tuw fitilla, vok ir Ma-Vatɗina, ki Ma-Vatɗina vul hagata tam Musus nala.

26Giwin-ma-ɗifinna ma ora nam colom hay guɗuk ma fi-tuwna, goy vok sligar-gaɓayna; 27nam ŋal urdi ma his fayn kulo kalamu, ki Ma-Vatɗina vul hagata tam Musus nala.

28Nam jun sligar-gaɓayna hay vun tabernaklena. 29Giwin-ma-ɗifinna ma ŋal farayn kulo kalamna nam colom hay vun tabernaklena, hay vun guɗuk ma fi-tuwna, nam ŋal ɗifinna hiɗi vulda-ɦawata kulo kalamu, ki Ma-Vatɗina vul hagata tam Musus nala.

30Doway-firina nam tunum jar guɗuk ma fi-tuwna hiɗi giwin-ma-ɗifinna, niy ma muz-tuwna nam ɦokom hayamu; 31Musus kaw, Aaron hiɗi gurona valam kaw muz sesi hiɗi ɓisi hayamu; 32hay li ma nisi kalay kalaf hay guɗuk ma-fi-tuwna, nisi co goboy tam giwin-ma-ɗifinna kayni, nisi muz tuwsi goyo, ki Ma-Vatɗina vul hagata tam Musus nala.

33Wur-daŋŋa nam kotom kat tabernaklena hiɗi giwin-ma-ɗifinna, nam jun sligar-gaɓayna hay vun wur-daŋŋa. Musus vat lopn kayn ki kayn nala.

Gajijita vi Ma-Vatɗina

34Bugol kayni ɗugulla li kulo guriya kay guɗuk ma fi-tuwna, gajijita vi Ma-Vatɗina hob guɗukŋa. 35Musus may as kay kal kalaf hay guɗuk ma fi-tuwna noŋɗi, kay ɗugulla ka kulo kalamu, kay gajijita vi Ma-Vatɗina ka ŋuyumu kaw. 36Hay li ma gurona vi Israyel ka tuɗ hay fulda kayni, la ɗugul ma gaa kay guɗuk poŋawa kulo'o, nisi kal de. 37La ɗugul bay poŋ kulo'o, nisi kalɗi. 38Hay falayta ɗugulla vi Ma-Vatɗina ka kulo'o kay tabernaklena, hay henjeta kut ka'a. Gurona vi Israyel kaf ka wi kayni hiɗi irsiya hay rogoyta visi kaf.

Currently Selected:

KAL-GOYTA 40: Massana

Highlight

Copy

Compare