KAL-GOYTA 33

Lawn vul hagat mi Musus kay nam ma tun goy hay hagata

1Ma-Vatɗina di tam Musus: Naŋu hiɗi sum sa naŋ kalsiyay goy hay nagat Egipte pana, nigi ma tuɗgi goy hay liyn tan pa; tuɗaŋ hay nagata ta nan yi va kan ala nan min vula' mi Abraham, mi Isaak, mi Yakub hiɗi jafna visi sa bugolsina. 2Nan ma gi sunda-wuralawn kep vokaŋu, sum sa Kanaaniyana, sum sa Amoriyana, sum sa Hetiyena, sa Feresiyena, sa Heviyena hiɗi sa Yebusiyena nan ma munsi vokaŋu. 3Tuɗaŋ hay nagat na'ta ta miira hiɗi yumda ka riŋ goy haya, may nan as tuɗis kulo jargiɗi, kay a nan ma ŋalgi goy hay hagatɗi, kay nigi kayni si sum sa yigi ɗeŋ ŋolo. 4Hay li ma sumun hum law ma yoora namna, sutaysi to'o. Sa min cuk sligar ma ŋaa'a talam loɗi. 5Bugol kayni Ma-Vatɗina di tam Musus: Naŋ ma di tam gurona vi Israyel ala nisi kayni si sum sa yisi ɗeŋe. La nan coys jargi ir liyn neeɗa ɦawa kaw, nan ma ŋalgi goyo. Wulin kayni ganna vigi ma tigina nigi ma fokom goyo, nan ma wi va ma nan ma lum hiɗi nigina. 6Gurona vi Israyel fok ganna visi ma tisin goy kaf, nisi ter goy gine'e hiɗi hiɗiyta Horeb.

7Musus yaw tantana, nam vi guɗukŋa goy ir gine neeɗa hiɗi kaŋŋa visiya; nam tunum selem ala guɗuk ma fi-tuwna; nisi kaf sa min job Ma-Vatɗina tuɗ kat guɗuk ma fi-tuwna ma ka goy gine'e hiɗi kaŋŋa visina. 8Hay li ma Musus fok kulo'o kay tuɗ hay guɗuk namna, sumun kaf yaw kulo'o, lak kulo kay sesi vun guɗukŋa visiya, cuk irsi kuɗ Musus, ta-ta Musus kal kalaf hay guɗukŋa tuwa. 9Hay li ma Musus kal kalaf hay guɗukŋa, ɗugul ma no'osna jiki gaa'a coli vun guɗuk namna, nala Ma-Vatɗina ka kus yoboyn hiɗi Musus. 10Sumun kaf wi ɗugul ma no'osna ka col vun guɗukŋa visiya visiya. Nala nisi kaf fok kulo'o dab voksi gaa'a vun guɗuk namna. 11Lawn ka law hiɗi Musus vun-tuwsiya, ki san ka kus yoboyn hiɗi banamna nala. Bugol kayni Musus hot hay kaŋŋa, may ma sunda valam ma joriyona ma yum ala Yosuwa goora ni Nun, nam may kal goy hay guɗukŋɗi.

12Musus di tam Ma-Vatɗina: Humaŋu, naŋ dan ala, sumun tani nan ma tuɗsi goyo, may naŋ min ɗekan kay sa ma tun vokannaɗi kay mige? May naŋ di ala naŋ wan goy ŋaa'a ŋolo, naŋ min lan slugota kaw naɗi su? 13Wulin kayni, la naŋ min lan slugota ni, naŋ ma ɗekan hagata vaŋu, ki kayn nala nan ma waŋu, nala nan ma fi slugot vok iraŋ suwa. Waŋ goy ala sumun tani si sumuna vaŋu.

14Ma-Vatɗin dumu, nan kay tuwanu ma tun vokgiya, nan ma vulgi tun-sukka kaw.

15Musus hot dumu: La naŋ kay tuwaŋ tun vokmaɗi, naŋ ma hinma yaways goy tan paɗi. 16Nan hiɗi sumuna vaŋu, a numa wi goy gasi ala naŋ luma slugotawa kayni, hay li ma naŋ ka tuni vokma'ana ɗisu? Lebo hay li nanu hiɗi sumuna vaŋu irma ma li poŋi goy valamu hiɗi sum sege sa gaa kay nagat kafna ɗisu?

17Ma-Vatɗina di tam Musus: Nan ma li kuɗ va ma naŋ joban kalamna, kay naŋ fi slugotawa vok iranu, nan waŋ naŋ kay tuwaŋu.

18Musus di'e: Hinan wi gajijita vaŋu.

19Ma-Vatɗina hot dumu: Nan hin ŋaata vanu jik vok iraŋ kafe, nan ma ɗekaŋ kay semda vanu ta ala Ma-Vatɗina, nan li slugot tam sa ma nan lum slugotna, nan as wi kir-hawta vi sa ma kiran hawn lay. Ma-Vatɗin di'e: 20Naŋ as a wan vok iranɗi, sa ma wan iranu ma mus iri mayɗi.

21Ma-Vatɗina di'e: Liy hena ka goboy tan tani, colaŋ kulo'o kay hiɗiyna. 22Hay li ma gajijita van ka jika, nan ma ŋayaŋ hay zul hiɗiyna, nan ma bar ɓan kaŋu ta-ta nan jik goy tuwa. 23Hay li ma nan sli ɓanawa goyo, naŋ ma ɗuwan hay bugolanu. May vokan hayɗin naŋ as a wumɗi.

Currently Selected:

KAL-GOYTA 33: Massana

Highlight

Copy

Compare