KAL-GOYTA 26

Ɗekka kay inda vi tabernaklena

1Kay kotta vi tabernaklena, naŋ ma lum hiɗi tapina doogo ma kotay hiɗi baraw haɓna ma duɓarayna, hiɗi sligar ma tuwam ɗoy zim-zimna, ma tuwam cih-cihna, hiɗi ma slaw keŋŋa, naŋ ma kot keruben ŋaa'a ŋolo, laksi kulo kalamu. 2Tapi ma kepna fiyokka valam ma li ir goldoŋ dok-ma' yam glafandi, buɗukka valamu ma li ir goldoŋ fiɗi; tapin kaf naŋ ma ŋram ki tuwam nala. 3Tapi ma vaslna naŋ ma siram vun tuwamu, tapi hen ma vaslna lo naŋ ma siram vun tuwamu. 4Naŋ ma kot zigew-ŋokŋa ma tuwam zim-zimna, tapi ma siray tam tuwam jewna, naŋ ma cukum goy hay vunam ma vatay goyna, tapi ma siray tam tuwam bugolla kaw naŋ ma cuk zigew-ŋokŋa goy hay vunam ma vatay goyna. 5Naŋ ma cuk zigew-ŋokŋa ma dok-vaslna vun tapi ma jewna, tapi ma bugolla kaw naŋ ma cuk zigew-ŋokŋa dok-vasl goy hay vunam ma vatayna. Zigew-ŋok namna ma li ŋray vun tuwamu. 6Va ma gaɓam talamna dok-vasl naŋ ma kotom hiɗi ora, naŋ ma ci tapin vun tuwam hiɗi namu, ki kayn nala tabernaklen asawa.

7Naŋ ma kot tapina hiɗi ɗuŋus fok-meena, kay nam ma lin mi guɗuk ma viy kay tabernaklena, naŋ ma li tapi namna doogo yam kep. 8Tapi ma kepna fiyokka valam ma li ir goldoŋ dok-ɦidi, buɗukŋa valamu ma li ir goldoŋ fiɗi', nam doogo yam kep kaf ŋaɓta valam ma liys ŋray ca. 9Tapi hen ma vaslna naŋ ma siram vun tuwamu, hena ma karkiyana naŋ ma siram vun tuwamu, ta karkiyat waŋŋi kay kusuɓ vun guɗukŋa. 10Tapi ma siray vun tuwam jewna, naŋ ma cuk zigew-ŋokŋa goy hay vunam vatayn dok-vasl, ma tapay vun tuwam bugolla kaw naŋ ma cuk zigew-ŋokŋa goy hay vunam ma vatayn dok-vasl. 11Naŋ ma kot va ma gaɓna dok-vasl hiɗi wayna va ma gaɓna naŋ ma kalam kalaf hay zigew-ŋokŋa. Naŋ ma tapam ki kayn nala, nam ma as guɗukŋa. 12Tapina ma kot guɗukŋa diram ka goy lo kayni, galla valam ma hin goyna as gum kulo hay ŋor tabernaklena. 13Galam hen ma hin goy ir goldoŋ kep kuɗ fiyokka valamu, galam hen ma hin goy kuɗ fiyokka valam lona kayni, ma gum kay gal tabernaklena ma ma'na kaf kay kusuɓumu.

14Kay guɗuk namna naŋ ma kot borgona hiɗi bak fok-gamalana, ɗom tuwam slawi, li borgona hiɗi bak dofeŋŋa, hot gum kulo kalam lo.

15Naŋ ma kot biremna ma kay tabernaklena; naŋ ma kotom hiɗi gu-kasiyana, lakam kulo mi selemu. 16Birem ma kepna fiyokka valam ir goldoŋ doogo, be'da valamu ma li ir goldoŋ kep hiɗi gali. 17Kal kona hay biremna ma', ŋram vunam vun tuwamu, biremna vi tabernaklen noŋ kaf naŋ ma lum ki kayn nala. 18Naŋ ma kot biremna dok-ma' hay gefem ma gal kayamna. 19Birem ma kepna mok doorot gaa kuɗum ma' kay kona ma' ma kalay hayamna. 20Naŋ ma kot biremna dok-ma' hay gef tabernaklena ma ma'na, hay gal ma gaana, 21doorot moki kuɗum dok-fiɗi kaw, birem ma kepna doorot moki gaa kuɗum ma' ma'. 22Naŋ ma kot biremna karkiya kay dir tabernaklena ma gaana, hay gefem ma gal vulatina. 23Naŋ ma kot biremna ma' kay gef tabernaklena, hay diram ma gaana; 24nam ma li jaɓay ma' hay diram ma gaanay pa, yalam ma kulona ma li juni ŋaa'a hiɗi girliŋ-kawayna; hen ma ma'na ma lakay goy gefemna kaw ma liys nala. 25Biremna ma li glafandi, hiɗi doorot moki gaa kuɗumu, doorota ta mokayta li pet ɗawn doogo yam karkiya, ma' gaa kuɗ birem ma kepna. 26Naŋ ma kot malla ma ŋulon vasl hiɗi gu-kasiyana, kay biremna ma hay gal ma kepna vi tabernaklena. 27Naŋ ma kot malla ma ŋuloŋ vasl lo kay birem ma hay gal ma ma'na vi tabernaklena, malla ma ŋulon vasl lo kay biremna, kay diram ma gaana, hay gal vulatiya. 28Malla ma fiyokŋa ma duɓ jar biremna hay vunam henis pa ta-ta hay vunam hen dab'. 29Naŋ ma kor biremna hiɗi ora, naŋ ma kor ora tam girliŋ-kawayna, ma tap vun malla ma fiyokŋa, naŋ ma kor ora tam malla ma fiyokŋa kaw.

30Naŋ ma li tabernaklena ɗawn ŋray ca ki nan ɗekem kiraŋu kulo kay hiɗiyt nala.

31Naŋ ma kot sligar gaɓayna ma tuwam ɗoy zim-zimna, ma tuwam ɗoy cih-cihna, hiɗi baraw haɓ ma duɓarayna ma li kotay ŋaa'a ŋolo, hiɗi sa kerubena ɗoy talamu. 32Naŋ ma lakam kulo kay dolla fiɗi' ma kotay hiɗi gu-kasiyana, tuwam koray hiɗi ora; dol namna va ma gaɓna ma ciy talamna ma li mi ora, mok doorot gaa selem fiɗi kay nam col ka'a. 33Sligar-gaɓayna naŋ ma kalam hay kaway ma gaɓna. Timgilla vi di-goyta naŋ ma kalam tunum kalaf hayamu may. Lopna vi sligar-gaɓayna kayni kay ɓuraw jar liyn ma peldetna hiɗi liyn ma suwi-peldetna.

34Goɓolokona naŋ ma kuluɓum kulo kay timgilla vi di-goyta hay liyn ma suwi-peldetna. 35Naŋ ma tun tablena goy ŋor sligar-gaɓayna, va ma tun fitilla naŋ ma tunum goy vok tablena ɗiger, hay gal ma kayamna vi tabernaklena; tablena naŋ ma tunum hay gal ma gaana may.

36Hay vun guɗukŋa ma kal kalafna, naŋ ma kot sligar-gaɓayna ma zim-zimna hiɗi ma cih-cihna hiɗi ma slaw keŋŋa, ma hiɗi baraw haɓna ma duɓarayna; kaf ciliy hiɗi ɓamta. 37Naŋ ma kot dolla hiɗi gu-kasiyan vasl kay sligar-gaɓayna, naŋ ma korom tuwam hiɗi ora, sle ma gaɓam talamna mi ora, naŋ ma yor wayn vasl kay mokom gaa kuɗumu.

Currently Selected:

KAL-GOYTA 26: Massana

Highlight

Copy

Compare