KAL-GOYTA 24

Musus jik kulo kay hiɗiyta Sinay

1Lawna di tam Musus: Naŋ ma jikay kulo'o katanu, naŋu hiɗi Aaron, Nadab hiɗi Abihu, hiɗi sa maariyana vi Israyel kuɗgi dok-siɗiya kaw, goy gine'e pa nigi ma dab vokgi gaa'a. 2Musus valam kep ma co tan goboyo, segen hayɗin as co goboyɗi, sum sa noŋ kafna as jik kulo kay hiɗiyta hiɗi namɗi. 3Musus hotiya, nam visi labara kay dita vi Lawna hiɗi gatta valam kaf tam sumuna. Sumun noŋ kaf hot dit hiɗi del ma kepna ala nisi min li kuɗ va ma Lawn dumna. 4Musus ɗo dita vi Lawn kaf gaa'a. Bugolda nam fok kulo hay graw culum culum'; nam in giwin-ma-ɗifinna gaa kuɗ hiɗiyta, nam jak hiɗiyn kulo doogo yam ma', kay jafna vi Israyel sa doogo yam ma'na. 5Nam cuk sum sa joriyona jar gurona vi Israyella, kay li ɗifin ma ŋal-goyna, kay li ɗifin hiɗi luwayna, kay li ɗifinna vi lop ma slugona kaf tam Ma-Vatɗina. 6Musus ɓurawam busuwam gaa ma', galam hena nam ɦokom hay tasa ŋulona, galam hena nam hokom kay giwin-ma-ɗifinna. 7Nam sli ɗerwella vi bonota, nam jaŋam goy hay hum sumuna; nisi di'e: Slen ma Lawn dum kafna numa ma li kuɗumu, numa as ŋomomu kaw. 8Musus sli busuwna, nam yamam goy kay sumun kaf, nam di'e: Kayni mi busuwna vi bonota ta Lawna juna' hiɗi nigiya kuɗ yoboyn kayni kaf.

9Musus jik kulo kay hiɗiyta hiɗi Aaron, Nadab hiɗi Abihu, hiɗi sum sa maariyana vi Israyel sa dok-siɗiyan kaf kaw. 10Nisi wi Lawna vi Israyel gaa kuɗ selemu, van ay ki hiɗiyna safir ma kotay ŋaa'a ma wile'e, ki dukalawn ka goy kotay cet-cete nala. 11Nam min li va ma joo tam sa ŋulona vi gurona vi Israyel noŋɗi. Nisi wi Lawna, nisi ti'e, ci'e kaw.

12Ma-Vatɗina di tam Musus: Jikaŋay kulo tanu kay hiɗiyta, colaŋ tani, nan min vulaŋ hiɗiy ma beɗayna, gatta hiɗi dita vanu ka haya kay hat sa Israyella. 13Musus fokay kulo'o, hiɗi Yosuwa ma sunumna, nam jiki kulo'o kay hiɗiyta vi Lawna. 14Nam di tam sa maariyana: Nigi ma cubma' tani, ta-ta numa ma hotay katgiya. Aaron hiɗi Hur ma hin katgi tani; la lawta vi sa ka hiɗi niramna, nam ma tuɗ kayn katsi nisiya. 15Musus jik kulo kay hiɗiyta, ɗugulla ŋuy yam hiɗiyta. 16Gajijita vi Ma-Vatɗina jikay gaa'a kay hiɗiyt Sinay, ɗugulla ŋuya' ya'a ir buur karkiya. Hay buurta siɗiyata, Ma-Vatɗina yi Musus ay goy jar hiɗiyn pa. 17Gajijita vi Lawn na'ta gurona vi Israyel ka ɗuwa' kulo kay hiɗiyna ki kuta-ŋalta nala. 18Musus kal kulo jar ɗugulla, nam jik kulo kay hiɗiyna. Musus li buur kulo kay hiɗiyn dok-fiɗi.

Currently Selected:

KAL-GOYTA 24: Massana

Highlight

Copy

Compare