KAL-GOYTA 16

Ŋurnayta vi sa Israyella hay fulda vi Sin

1Tokŋa vi gurona vi Israyel fokis hay Elim pa, nisi co hay fulda vi Sin, ta ka jar Elim hiɗi Sinay. Kayni hay buurta doogo yam vaslta vi til ma ma'na vi kalta-goyta visi hay nagat Egipte pa. 2Tokŋa vi gurona vi Israyel kaf tun caw ŋurnay kat Musus hiɗi Aaron hay fulda. 3Gurona vi Israyel di tisiya: Hay li ma numa ay hay nagat Egipten kayn sliwn ka dak-dak, fun kaw suwma suwi goyo. Lali numa mit miti ɗawni kayn ŋaa'a suwa; may wulini sum sa ŋol ki kayn nala, nigi marsi goy mit hay fulda kay mayta kayn kay mige?

4Ma-Vatɗina di tam Musus: Nan min hin fun si gaa kisiya, nam ma yakay kulo dukalawn pa nisi ma cuk goyo kay yawam hay buurta buurta a as tina visiya, kay nan min waksiya, kay nan min ɗuwa la nisi tuɗ kuɗ gatta vanu lebo tuɗi su? 5Tin ma nisi yawamay hay buurta karkiyat ɗawni, hay li ma nisi kotomawa, nam ma muɗ ŋol sem ma' suw ma nisi ka yawam hay buurta kafna.

6Musus hiɗi Aaron di tam gurona vi Israyel kaf ala: Vulatin ɗawni nigi ma wi ala kalgiyay goy hay nagat Egipte kayn mi Ma-Vatɗina. 7Hay grawt ɗawni, nigi ma wi gajijita vi Ma-Vatɗina, kay nam hum ŋurnayta vigiya ta talamtawa. Kay numa lakŋi si sarige a nigi ŋurnay katma'a? 8Musus di'e: Vulatini Ma-Vatɗin min vulgi sliw ma tina, grawt ɗawni nam min vulgi fun ŋol suw asa, kay nam hum ŋurnay ma nigi ka ŋurnay talamnawa; kay numa lakŋi si sarige a nigi ŋurnay katma'a? Ŋurnayta vigi kayn kat Ma-Vatɗina!

9Musus di tam Aaron: Daŋ tam tokŋa vi gurona vi Israyel kaf ala: Nisi ma lak vok Ma-Vatɗina, kay nam hum ŋurnayta visiyawa. 10Hay li ma Aaron ka law tam vokŋa vi sa Israyel kayni, nisi muɗ irsi hay gal ma fulla. Ɗuw na kayni, gajijita vi Ma-Vatɗina ɗek tuwa' goy hay ɗugulla.

11Ma-Vatɗina di tam Musus ala: 12Nan hum yor-tuwta vi gurona vi Israyellawa. Naŋ ma disi ala, hay vulatita nisi ma ti sliwna, hay graw culumta nisi ma ti funa may, nala nisi ma wi ala nanu mi Ma-Vatɗina Lawna visiya.

13Hay vulatita, gaɓurumna co ŋolo nam hob guɗukŋa visi noŋ kafe; co graw culumta kayni, maɗayn ka giy ŋolo goy gal guɗukŋa visiya.

14Hay li ma maɗayn vatawa, slen ma guray vertetet' ma ki mogoy ma haɓna nala kaw ka kay yam nagata. 15Gurona vi Israyel ɗuw na kayni, nisi ka di tuwsi jar-tuwsi ala: Nam kayni mi meloge? Kay nisi may wi va namnaɗi. Musus disiya: Nam kayni mi funa ma Ma-Vatɗina vulgiya kay ti'e: 16Humgiya, Ma-Vatɗina vulgi hagat ala, gigekaw ma yaw kayni ŋray gaf tina valamu valamu. Kay sa ma kepna nigi as yaw ir goto kep kep, ŋram kay sum sa vo hay ziyna vigina; gigekaw as yaw kay sum sa ka vo hay ziyna valamu valamu. 17Sum sa Israyella li ki kayn nala, nisi yaw kayni, segen yaw ŋolo, segen yaw kiɗaya may. 18Bugol kayni nisi ŋaɓam goyo hiɗi gotona, nisi sa yaw ŋolla nam may kisi ŋolɗi, nisi sa yaw ir kiɗayna, nam may kiɗa goy kisiɗi. Gigekaw yaw kayni gaf tina valamu valamu.

19Musus disiya: nigi ma hin mara bur kulo'o kay cub grawtɗi. 20Nisi min hum vun Mususɗi, sum segen hinim bura kay cub grawta; nala juful cukumu, nam muɗ hisa. Musus dikam muɗ ɦiy kat sum nisina. 21Hay graw culumta kaf, gigekaw yaw kayn kay as tina valamu valamu; hay li ma fatta tun caw ti'e, nam ɦuwal goyo may.

22Hay buurta karkiyata, nisi yaw sem ma' ma' kay sa ma kepna, kayn di ala goto ma' kay sa kep. Sa ŋulona vi farana mar labar namna tam Musus. 23Musus disiya, Ma-Vatɗin vul hagatiya, jifin ɗawni mi buur ma tun sukŋa, buur ma sabatna ma vuli goy mi Ma-Vatɗina; nigi ma kot slena vigiya ma nigi min tumna, diram ma hin goyna nigi ma ŋayam kulo'o ta-ta grawta. 24Nisi hinim kulo'o ta-ta grawta ki Musus vulsi hagat nala, nala nam may buw goy loɗi, juful may cuk jaramɗi kaw. 25Musus disiya: Vaydi nigi ma tumu, kay kayni mi buur ma sabatna, kay vaydi nigi as fi mara goy vor loɗi. 26Nigi ma yawamu ir buur karkiya, may hay buurta siɗiyata, buurta ta sabatna, nigi as fumɗi.

27Hay buurta siɗiyata, segen cuk goyo kay yawamu, may nisi fum noŋɗi. 28Ki kayn nala Ma-Vatɗina di tam Musus: Vun-ma-gatna vanu hiɗi slen ma nan dum dina, nigi ma rawam goyo ki kayn nala dok-doko ta-ta lancitige? 29Nigi ma vi goy kigi ala nan vulgit hay buurta karkiyata, nam ir buur ma'. Nan min kayn ala gigekaw ma mus hay liyna valamu valamu hay buurta siɗiyata tun selem goy hay liy maraɗi. 30Ki kayn nala nisi tun suksiya hay buurta siɗiyata.

31Tin namna gurona vi Israyel tunum selem ala «manna»#16:31 Manna hiɗi vun Hebrena min di ala: nam kayni mi mige? Nam sli wal degen nala; nam haɓaya, nam ti ŋray ca ki hambul ma kotay hiɗi yumda nala.

32Musus di'e: Humgi va ma Lawn di'e: Nigi ma hob goto kep hiɗi manna, ŋomom kulo'o kay jafna vigi ma bugolgina, kay nisi kaw ma wi funa ma nan vulgita ti'e hay fulda, hay li ma nan yawgiyay goy hay Egipte pana. 33Bugol kayni Musus di tam Aaron, naŋ ma sli dowayta kepe, naŋ ma sel manna haya'a ir goto kepe, naŋ ma tunum vok ir Ma-Vatɗina. Kay nam ma li ŋomiya kay jafna vigi ma bugolgina. 34Ki Ma-Vatɗina vul hagata tam Musus nala, Aaron tunum vok liyn ma di-goyna, kay nam ma li ŋomiya.

35Gurona vi Israyel ti manna ir busat dok-fiɗi, ta-ta hay li ma nisi co hay liy ma ziyna, nisi ti manna ta-ta hay cota visi kulo vun Kanaan dab'. 36Gotota ta nisi ya' omer kayni mi gal-ma-doogona vi dutta ta kusta.

Yor-tuwta hay Refidim

Currently Selected:

KAL-GOYTA 16: Massana

Highlight

Copy

Compare