KAL-GOYTA 15

Nulla

1Bugol kayni, Musus hiɗi gurona vi Israyel kaf gi nulla tam Ma-Vatɗina, nisi di'e:

Nan min gi nul tam Ma-Vatɗina,

kay nam ɗek gajijita valamawa goy haraŋi;

kulumayna hiɗi sum sa ɓey kalamna nam vatsiyawa goloŋo.

2Ma-Vatɗina mi donota vanu,

nan as suburum selemu.

Kay namu mi ma suɗan goyna.

Namu mi Lawna vanu.

Nan min tiyim selemu,

namu mi Lawna vi sumiyanu,

nan min tiyim selem kulo ŋolo.

3Ma-Vatɗina mi sa ma wi duur ŋolo

semda valam kayn ala Ma-Vatɗina gasi.

4Keke-ma-duura vi Farawn hiɗi sojena valam kaf nam kosi

goloŋ hay niy-lumna,

sojena valam sa dur gaŋŋa niy-lum ma slawn ligsiyawa.

5Billa sulurawa kulo kisiya,

nisi siriy ta-ta gaa kuɗ niyna ki hiɗiyn nala.

6Awa! Ma-Vatɗina! Ɓaŋ ta jufta ɗek donota va'awa goyo,

awa! Ma-Vatɗina, ɓaŋ ta jufta kirap sa ma gawtawa gaa'a.

7Hiɗi ŋolda vaŋ ta suwita

naŋ ɦo sa gawt kaŋŋa gaa'a,

hay li ma naŋ ɗek ɦiyda vaŋ goyo,

na' ŋalsi goyo ki hoson nala.

8Hay li ma naŋ hin sukŋa vi cinaŋ gi goyo,

niyn tokay kulo yam tuwamu,

niy-ma-riŋŋa tokay kulo yam tuwamu ki gulmunna nala.

Bil ma goy way niy-lumna ɓalay ɗeŋe.

9Sa ma gawt di'e:

Nan ma jaŋ kuɗsiya, nan ma fisiya,

slen ma ɓuraŋŋa ma nan yawam ɗawn nan ma ɓurawamu,

nan ma job yan katsiya, nan ma calsi hiɗi kew-gaferaŋa,

nan ma vatsi goyo.

10May dolay kayni naŋ fo simeɗna vaŋawa kisiya,

niy-lumna kuluɓsiyawa; nisi siri gaa'a ki tuwtana nala

gaa hay niy ma zul ŋolla.

11Ha! Ma-Vatɗina, jar lawayn kaf ma ki naŋ nala mi gige?

Ma peldetta valam wile'e ki naŋ nala,

asay a fi suburta kaw, li ɗekka kaw ki naŋ nala mi gige?

12Naŋ meɗ ɓaŋ ta juftawa goyo, nagat loɗsiyawa.

13Hiɗi slugota vaŋu naŋ tuni vokma'a,

Naŋ but sumuna vaŋawa goyo,

hiɗi gaŋeraŋa vaŋu naŋ ka tuni voksiya,

kay narsi hay liyna vaŋ ma peldetna.

14Hay li ma sumun hum kayni, tuwsi muɗ visi bat-bat':

Narta nig gaa kay sum sa Filistina,

15Muliyana vi Edom tuwsi tun caw cuk narsi;

sum sa duura vi Mowab tuwsi tun caw visi bat-bat;

sum sa hay Kanaan noŋ kaf sutaysi tun caw to'o.

16Narta ŋolda ma co kisiya,

hiɗi gaŋeraŋa vi ɓaŋu nisi ma muɗ numulu ki hiɗiyn nala,

ta-ta hay li ma sumuna vaŋ ma cap goyo, Ma-Vatɗina!

Ta-ta hay li ma nisi ma cap goyo, sumuna vaŋu sa naŋ gussina.

17Naŋ ma tuɗ hiɗi nisiya,

naŋ ma laksi kay hiɗiyta vaŋ ta vocota,

hay liyn ma naŋ kotomu kay musta vaŋu naŋ Ma-Vatɗina.

Hay liyn ma peldetna ma ɓaŋ naŋ Ma-Vatɗina vum bagam gaana.

18Ma-Vatɗin ma li mulu dok-doko ta-ta hay vatɗita.

19Kay kulumayna vi Farawn hiɗi sum sa jaŋamna,

hiɗi keke-ma-duura valam noŋ kaf kalawa goloŋ hay niy-lumna.

Lawn ɗubsiyawa gaa hay niy-lum ma ŋolla.

May niyn ɓet goy kat gurona vi Israyel, nisi tuɗi jaramu.

20Miriyam ta jobta-Lawna, ɓasum Aaronta sli darayn hay ɓa'a, boyn kaf tok tuwsiyay kata'a hiɗi darayna, nisi ka pir nulla. 21Miriyam hot dit tam gurona vi Israyel; gigi nul tam Ma-Vatɗina, kay nam ɗek gajijita valamawa goyo; sum sa jaŋ kulumayna hiɗi sa ɓey kalamna nam kosiyawa goloŋo hay niy lum ma ŋolla.

Sum sa Israyella hay fulda

22Goy hay niy-lum ma slawn pa, Musus kalay hiɗi sum sa Israyella. Nisi tun irsiya hay fulda vi Sur. Bugol tu'da visi hay fulda ir buur ɦidi kayni, nisi may fi niy noŋɗi.

23Nisi co hay Mara; may nisi as a ci niy ma hay Maran noŋɗi, kay nam galaki. Liyn namna yum ala Mara kayni ala galaki. 24Sumun tun caw ŋurnay kat Musus, kay nisi di'e: Nay cum wulin ɗawn mi mige? 25Musus tiy tam Ma-Vatɗina, Ma-Vatɗin ɗekem kay gu mara kepe, nam gum goloŋ hay niyna, niyn muɗ sleɗe. Hay na'ta kayni, Ma-Vatɗina vul gatta mi sum sa Israyella, hay liy namna lo, nam waksiya. 26Nam disiya: La nigi hum kuɗ dita vi Ma-Vatɗina Lawna vigiya, la nigi li slen ma ɗiger vok iramna, la nigi jak humgi tam vun-ma-gatna valamu, la nigi li kuɗ gatta valamu kaw, bakmara ma nan wat sum sa Egipten hiɗi namna nan as maram kigi nigiɗi, kay nanu mi Ma-Vatɗina ma yergi goyna.

27Nisi co hay Elim, ɗawni zulla vi niyn ma jaŋ-goyna ka doogo yam ma', gomon ka dok-siɗiya kaw. Nisi mol gaa hay liy namna, goboy hiɗi niyna.

Currently Selected:

KAL-GOYTA 15: Massana

Highlight

Copy

Compare