KOLOSENA 4
4
1Nigi sumay ziyna, ligi ŋaa'a tam sa gorvona vigiya, vulsi slena visi goy ŋaa'a hay liyamu, kay nigi ma wi ala, nigi kaw mulla vigi ka hay wuralawna.
Gi-deɓta vi Paulus ta cawta
Efes 6:18-20; 5:14-17
2Sogi tuwgi hay siɗawta, lakgi jiger hay lop ma slugona, 3siɗawgi kuma'a kaw, kay a Lawna mal vun ziyn goyo kay yoboyna ma numa kusumna, kay numa fi di goy kay ŋayayta vi Kristu, kuɗ ŋayayta vi Kristu na'ta, nan ka juni hay jaɓna wulini. 4Kay nan fi di goy haraŋi hay liyam ɗiger.
5Poygi hiɗi yali vok ir sum sa goy jiyna, bagi liyna vigi goy ɦawaɗi. 6Hin dita vigi li dok-dok hobay hiɗi slugota, zek kuɗa'a, kay nigi ma wi yal ma hot dit mi gigekaw hay liya'a.
7May Tikikus ma vigi labara vanu. Namu mi ɓasun ma hayan kalamna, niran ma sunda hay Bum-Sumuna, sa ma sunda ma gasina vi Bum-sumuna. 8Nan gumis kayni kiran ta, kay nigi ma wi lakŋa vuma'a, a nam ma teŋgi irgi hay Bum-Sumuna kaw. 9Nan gumis hiɗi Onesimus ɓasun ma gasina ma hayan kalamna, sa ma hay jafgiya kaw, nisi ma vigi labara kay slen ma ka li tani kafe.
10Aristarkus niran ma daŋgayna gigi deɓe, hiɗi Markus goora vi nasum Barnabasna, nam ma nigi humi labara kalamu, la nam coysawa tigiya ni, nigi ma vum hiɗi firita. 11Yesus ma yum Yustus kaw gigi deɓe. Jar sa kaay gosayna, li lop hiɗi nanu kay mulda vi Lawn kayn si nisi yawni tuta, nisi vulan kursulita ŋolo.
12Epafras ma hay jafgina ka gigi deɓisa. Namu mi sa ma sunda vi Kristu Yesu. Dok-dok nam ka dur kigiya hay siɗawta valamu, kay nigi ma lak ɗeŋe, wi minda vi Lawna goy haraŋi kaw. 13Nan li di-goyta kayni kigi ala nam mak tuwam ŋolo kigiya, kay sum sa hay Lawdikiya hiɗi nisi sa hay Hiyeropolis kaw. 14Lukas doktora ma hayan kalamna gigi deɓe, hiɗi Demas kaw.
15Gigi deɓ mi ɓosiyayna sa ka hay Lawdikiya, hiɗi Nimfas, hiɗi sa ekklesiyana sa ka vo hay ziyna valamu kaw.
16Ɗerwelda kayni hay li ma nigi jaŋa'awa goy jargi jaŋŋa, nigi ma li a na' ma jaŋis goy hay ziyda-Lawna vi Lawdikiya kaw. Ɗerwelda ta may goy Lawdikiya pata nigi ma jaŋa' goy jargi kaw. 17Nigi ma di tam Arkipus ala, nam ma li ŋali hiɗi lopna ma Bum-Sumun vulumtina, nam ma hobom vunam ŋaa'a.
18Nan Paulus gigi deɓe hiɗi ɗota van nan kay tuwanu. Humgi ma gigi kay jaɓna vanu, Slugota mus hiɗi nigi musge.
Currently Selected:
KOLOSENA 4: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001