KOLOSENA 3
3
Irita wulita hay Kristu
Fil 3:18-21; 1 Yoh 3:1-3; Efes 5:3-20
1La nigi dayawa kulo'o hiɗi Kristu, gargi slen ma kulona, hay liyn ma Kristu ka'a, musi hay gal ɓam ma jufna vi Lawna. 2Tungi varta vigi kay sle ma kulona, may kay sle ma gaa kay nagatɗi. 3Kay nigi mitiya, irita vigi ka ŋayay hay Kristu hiɗi Lawna. 4Hay li ma Kristu irita vigiya ma ma goy haraŋi, nigi kaw ma ma goy haraŋi hiɗi namu hay gajijita.
5Kay na'ta ci tuwna vigiya ma vi nagatna goyo: Zlata-bulota, liwista, darta vi sliwna, darta joota hiɗi garta vi farayna, kay kayni mi girifta vi lawayn ma waana. 6Kuɗ sle namna cani, ɦiyda vi Lawna ma kay gurona vi ŋel-gatta. 7Jewe kaw nigi ay poy nala, hay li ma nigi ay lakay hay suluk namna.
8May wulini nigi kaw noygi slen kayni goyo, ɦiyda, dikga ta fok kulota, joota, yaw diira, hiɗi kasla ma liwisna kaw hinim kal goy hay vungiɗi kaw.
9Kagi sin jar-tuwgiɗi, nigi sa fok san ma busaynawa goyo hiɗi lopna valam kafe, 10nigi sa cuk tuw ma wulinawa tigiya, nam ma hot wuli dok-doko, kay hobgi hiɗi wida ŋray hiɗi nam ma lumna. 11Hay tani sa ma Grek mayɗi, sa ma Yudiya mayɗi kaw, sa ma kaay gosay mayɗi, sa ma bay ka gosay mayɗi, sa ma barbar mayɗi, sa ma skita#3:11 «skita» Jaf-sum sa muguru'u. mayɗi kaw, sa ma gorvo mayɗi, sa ma goy buti mayɗi kaw, may Kristu ka kafe hay kafe.
12Kay na'ta ki sa vileki-goyna vi Lawna sa peldetna hiɗi sa hayam kigina nala, cuk kigiya dikga ta tiy kay sumuna, ŋaata, ŋalda, zigin-zlata, cubta-ŋalda. 13Kay nigi ma ziy tuwgi jar-tuwgiya, ligi slugot mi tuwgi jar-tuwgiya, la lawta vi sa ka kay sa hen kaw, nam ma vulum gida ki Kristu vulgi gidawa nala kaw. 14Suw slen pet kayni, cukgi ti-kamda kigiya, kayni mi tapta vi mu'da pasiyakka. 15Hin toyta vi Kristu mus mul hay dikgi kafe, toyta na'ta ta nigi yi ay ta'a kay muɗ goy tuwna ma kepna. Hotgi gi-deɓta mi tuwgiya.
16Hingi yoboyna vi Kristu mus haygi ŋaa ŋolo, hatgi tuwgi jar-tuwgiya, digi tuwgi kir tuwgiya, hiɗi yal ŋolo, hiɗi nulla, nul ma suburta, hiɗi nul ma hay Ŋusta; kuɗ donota vi slugota, gigi nul mi Lawna hiɗi dikgi kafe. 17Sle ma nigi luma kaf, la dita lebo lopna kaw, nigi ma lum kaf hay semda vi Bum-sumuna Yesu, gigi deɓ mi Lawna bumna hay namu.
Ziyna vi sa viyna
Efes 5:22-33; 6:1-9; 1 Pet 2:18-25
18Nigi boyna, humgi kuɗ jufaygiya, kay kayni ŋaa'a kir Bum-Sumuna.
19Nigi jufayna, mingi boyna vigiya, muɗgi joo katsiɗi.
20nigi gurona, humgi kuɗ sumaygiya hay slen kaf, kay kayni ŋaa'a hay Bum-sumuna.
21Nigi sumayna, ɓulak dik gurona vigiɗi, kay nigi ma muɗsi maŋayɗi.
22Nigi sa gorvona, humgi kuɗ mulaygina hay sliwna hay slen kaf, nigi ma li kayni vok irsiya kay jif tuwgi kirsi ɦawaɗi, may hay gasita vi dikgiya, hay narta kuɗ Bum-Sumuna. 23Slen kaf ma nigi min lumna, ligit hiɗi dikgi kaf, ki nigi ka lum kayn mi Bum-sumuna nala, may ki nigi lum kayn mi sa naɗi. 24Wigi ala Bum-Sumun ma wurakgiya, nam ma vulgi vocota valamu, kay na'ta sungi Kristu Bum-Sumuna. 25May sa ma li bay-ɗigerta ma feɗ bay-ɗigerta kaw, kay Bum-Sumuna may poŋ ir saɗi.
Currently Selected:
KOLOSENA 3: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001