AMOS 9
9
Slen ma vul tuwam kiram hay caw kafna
1Nan wi Bum-Sumuna ma colay kulo kay giwin-ma-ɗifinna.
Nam di'e:
Naŋ ma ci yam dolla kay ziyd ma geɗa,
toŋ ziyd gaa kisi noŋ kafe,
dirsi ma hinina nan ma vatam goy hiɗi kew-gaferaŋa,
sa jarsi kep kaw ma as pir kay suɗ goyo mayɗi,
sa as suɗ goy kuɗsi mayɗi.
2La nisi jik gaa hay zulla vi sa mitina,
nan ma hulotsiyay goy hiɗi ɓanu,
la nisi jik kulo hay dukalawna,
nan ma jiksiyays gaa'a.
3La nisi tuɗ ŋay kulo kay hiɗiyt Karmel kaw,
nan ma tuɗ garsiyaya, nan ma yawsiya;
la nisi sluɓ gaa kuɗ niy ma ŋolla kay ŋay tuwsi kanu,
ɗawni nan ma vul hagata tam guyna kay calsiya.
4La nisi tuɗ goy gorvo'o vok sa gawt kisina,
ɗawni nan min vul hagata
tam kew-gaferaŋa kay calsi goyo;
nan ma cuk iran kisi ɗawni,
kay lisi ŋaa loɗi,
may kay lisi joo'o.
5Bum-Sumuna Ma-Vatɗina vi vok-ma-duura tun ɓalam tam nagata,
na' ɦo gaa'a,
sum sa haya'na kaf ka hay yorta,
nagata kaf fok kulo'o ki niy-lumna Nil nala,
na' hot gaa'a ki niy-lumna Egipte nala,
6Nam ma ziyn ma musta valam ka ini kulo'o hay dukalawna,
selem cukis gaa kay nagat pana,
nam ma vul hagat tam niy-lumna ma ŋolla,
as jaŋam goy hay nagat kafna,
semda valam ala Ma-Vatɗina.
7Nigi gurona vi sa Israyella,
nigi kiran kayn ŋray ca ki gurona vi sa Etiopiyana nala ɗisu?
Sum sa Israyella nan yawsiyay goy hay nagat Egipte pa,
ki sa Filistina hay Kaftor,
hiɗi sa Siriyana hay Kir nala ɗisu?
Din mi Ma-Vatɗina.
8Ɗuwgiya, Bum-Sumuna Ma-Vatɗina,
iram ka cuki kay jaf-mulda ta li joota,
nan min vata' goyo kay yam nagata.
May hiɗi kayn kaf kaw,
nan ma vat mulda vi Yakub goy kafɗi,
Din mi Ma-Vatɗina.
9Kay ɗuwa, nan min vul hagata,
jar jaf-sumuna kaf nan min pukaɗ jafna vi Israyel kulo'o,
ki san pukaɗ wan hay zlarakŋa nala.
Kep jarsi ma as peŋ goy mayɗi.
10Sum sa li sulukŋa jar sumuna van kaf,
Kew-gaferaŋa ma cisi goyo,
nisi sa di ala joot as coɗi,
joot as fayɗi,
sum nisin kaf kew-gaferaŋa ma calsi goyo.
Deŋga kay tun-sukka
11Hay buur namna ɗawni,
sum sa hay ziyna vi David sa puk gaana nan ma yawsi kulo'o,
nan ma kot jar ziy ma muni goyna,
liyn ma ɦoy gaana nan ma kotom kulo'o,
nan ma kot ziyna ki nam ay jew nala.
12Kay a dir sumuna vi Edom sa hinina ma muɗ goy ir misiya,
hiɗi jaf-sum segena sa semda van ay yiy jarsina kaw,
din mi Ma-Vatɗina, ma min hob vun slen namna kafe.
13Humgiya, buur ma ma'a,
Din mi Ma-Vatɗina,
hay li ma sa ma feɗna jaram as ja hiɗi jaf ma cukum wulin loɗi,
sa ma kesl gulda-guldana,
jaram ma ja goy hiɗi sa ma wasam jafam gaan loɗi,
vin ma jibetna ma kulfut kulo kay yam-hiɗiyna,
hiɗi liyn ma jiŋiliŋŋa.
14Sumuna van sa Israyella,
sa yaway goy gorvona nan ma hotsiyay vo'o,
hoyok-ziyn ma ɦoy gaana nisi ma hot inim kulo'o,
ma lak hayamu.
Nisi ma pi gulda-guldana,
nisi ma ci vinna valamu,
nisi ma pi jardeŋŋa,
ma tum vuɗamu.
15Nan ma pisi gaa kay nagata visiya,
nagata visiya ta nan pisi gaa haya'ta,
ta nan vulsita,
nan as patsi kulo haya' loɗi.
Din mi Ma-Vatɗina, Lawna vigiya.
Currently Selected:
AMOS 9: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001