AMOS 8
8
Wida vokka kay tikisita ta hiɗi vuɗ-gun haya
1Bum-Sumuna Ma-Vatɗina ɗekan slen kayni kiranu.
Tikisita ay hobay hob' hiɗi vuɗ-gu ma niyina.
2Nam di'e: Amos, iraŋ wum mi mige?
Nan hot dita ala:
Iran wa' ti tikisita ta hobay hiɗi vuɗ-guna ma niyina.
Bugolda Ma-Vatɗina di tanu:
Sumuna van sa Israyella dabta visi niyawa goboyo;
nan ma vulsi gid loɗi.
3Hay buur namna ɗawni,
nul ma nisi gum hay ziy ma mulda visina ma muɗ goy tiyna,
di kayn mi nan Bum-Sumuna Ma-Vatɗina;
sumun ma mit kuɗgi ŋolo.
Ma cuksis goy ŋolo bay sa tiy kisiya.
4Humgi dit kayni,
nigi sa lasgi sum sa maŋayna,
sa vurumgi slen kay sum sa hawna hay nagata.
5Nigi di'e:
Til ma wulina ma kal ɗawn citige?
Kay numa' tuɗ gus wana vuma goyo,
buur ma sabatna kal ɗawn citige?
Kay numa tuɗ mal vun veera vuma goyo.
Tasa ta kusta numa ma daba' dira' kulo'o,
numa ma ɦura' gusa' kulo'o,
va ma ŋa nekŋa numa min muɗum hefteŋe kay ɗut sumuna.
6Bugolda numa ma gus sum sa maŋayna hiɗi gurjuta,
sa hawna numa gussi hiɗi tuguruna,
burana vi wan kaw numa ma gusum goyo.
7Kuɗ kayni Ma-Vatɗina yi va kalamu,
hiɗi sem Ma-Gaŋeraŋa vi Yakub ala:
Lopna visi kayni yan ma jok mara kep jaram noŋɗi.
8Kuɗ joota visiya nagat ma wira,
sum sa haya'na kaf ma lak hay yorta,
Nagat noŋ kaf ma fok kulo ŋolo ki niy-lum ma den nala,#8:8 Ki niy-lum ma den nala Muɗi hay liy hena ala: Ki haraŋa ma fo liyn nala.
na' ma fok kulo'o,
hot cuk gaa'a kaw ki niy-lumna Egipte nala,
9Bum-Sumuna Ma-Vatɗina di'e:
Hay buur namna ɗawni,
fatta ma ɗik gaa hay falay calakka.
Nan ma muɗ yam nagat jufunu hay falay calakka;
10buur ma yuldeta vigiya nan ma muɗum goy buur ma yorta,
nulla vigiya ma muɗ mi nul ma tiyna,
gigekaw ma muɗ cukum talam mi sligar-bolla.
Nan ma kulotgi yigi goy vanay kafe;
nan ma hin nagat hay yorta,
ki goor ma kay bulum kepn mit nala,
va ma co bugol kayni ti ɓulakka ta vatɗita.
11Humgiya, buur ma co'o,
din mi Bum-Sumuna Ma-Vatɗina,
buur namna nan min gi mayta gaa kay nagata,
may ti mayta vi niy ma cina hiɗi fu ma tinɗi,
may mayta hiɗi laata kay hum yoboyna vi Ma-Vatɗina
12Nisi ma mer goyo hay gal liyn mara'a mara'a vi niy-lum ma ŋolla,
hay gal ma gaana ta-ta hay gal ma kuɗuwna,
nisi ma poy hay liy hena hena kay gar yoboyna vi Ma-Vatɗina,
may nisi ma fumɗi.
13Hay buur namna ɗawni,
guro-boy sa ŋaana hiɗi joriyo sa ŋaana laat ma cisi goy mati.
14Kay nisi yi va kisiya hiɗi sulukŋa vi Samariya,
nisi di'e:
Hay semda vi lawayna vaŋu Dan,
hay semda vi girifta vi Beer-Sebata,
may nisi ma cuk gaa'a,
as fok kulo loɗi.
Currently Selected:
AMOS 8: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001