AMOS 2
2
1Ki kayn nala Ma-Vatɗina di'e:
Kuɗ jiw-zlata ta ɦidita vi sum sa Mowabna,
kuɗ ta fiɗit noŋo,
nan min hot bugolan tam ɦiyda vanɗi,
kay mul ma Edomna nisi ŋalam zokom goy noŋ heses'.
2Nala nan min gi kuta hay Mowab,
na' ma ŋal ziy ma mulda vi Keriyot,
Mowab ma ɓulak goyo jar suwana ma ŋolla,
jar luluna vi duura hiɗi suwana vi togolomna.
3Sa ka kitana visiya nan ma vatsi goyo,
muliyana visi kaw nan ma vatsi goy hiɗi nisi kafe,
Din mi Ma-Vatɗina.
4Ki kayn nala Ma-Vatɗina di'e:
Kuɗ jiw-zlata ta ɦidita vi sum sa hay Yudana,
kuɗ ta fiɗit noŋ kaw,
ɦiyda van as hot bugola' noŋɗi,
Kay nisi noy della vi Ma-Vatɗin goyo,
kay nisi may ŋom gatta valamɗi,
kay nisi hin tuwsi viy goyo hiɗi sinda,
sinda ta sumiyaysi ay tapay haya,
5nan ma gi kuta kat Yuda,
na' ma ŋal ziy ma mulda vi Yerusalem goyo.
6Ki kayn nala Ma-Vatɗina di'e:
kuɗ jiw-zlata hidita vi sum sa Israyella,
kuɗ ta fiɗit kaw,
nan min hot goy bugolan tam ɦiyda vanɗi,
kay sum sa ɗigera nisi gussi goy hiɗi gurjuta,
sum sa hawna nisi muɗsi goy hiɗi tuguru ma cukum semna.
7Nisi ka hiɗi darta ta-ta tam butuw ma gaa kay nagatna,
ka ka kulo kay sum sa hawna,#2:7 Gal ma jewna vi 7 tani may hum haraŋ noŋɗi.
nisi curoɗ sa maŋayna.
bumna hiɗi goora tap kuɗ tuwsiya kay tuɗ gar goot-cat ka kepta,
kay nisi min muɗ semda van ta peldetta goy liwisi.
8Nisi bur gaa kat giwin-ma-ɗifin kayni,
baram gaa kuɗsi mi sligar ma nisi deŋem kay sa hawna.
Sum sa nisi tun kitat kisina nisi yaw dolayn kisiya,
cum kalaf hay ziyna vi lawayna visiya.
9May hiɗi na'ta kayni,
nan vat sum sa Amoriyan goy voksiya,
sum sa fiyok ŋolo ki gu-gamna nala,
dono ŋolo ki gu-ɦoyna nala kaw.
Vuɗna visi ma kulo humsina nan ma ɓulakam goyo,
so'olsi ma gaana nan ma patam kulo'o may.
10May nigiya, yawgi ay goy hay Egipte pa mi nanu,
nan tun vokgi hay fulda ir busat dok-fiɗi,
kayni kay vulgi nagata vi sa Amoriyana,
11Nan cuk sum sa jobta-Lawna guro-migina,
nan cuk sum sa kemeleŋŋa jar gurona vigi sa joriyona.
Lebo may naɗi su? Gurona vi Israyella!
Din mi Ma-Vatɗina.
12Nigi vul dolay ma cina mi sum sa li tuwsi kemeleŋŋa,#2:12 Sa kemeleŋŋa Kayni si sa gi tuwsi ɗifin mi Bum-Sumuna. Ɗuwgi hay Ŋɓ 6.
nigi di tam sa jobta-Lawna ala nisi di law ma voksinɗi.
13Wulin kayn nan min kirapgi gaa'a,
ki keke ma hobi hiɗi yam-wan hayamna lut yam nagat gaa nala.
14Sa ma koloyna fi a pir jaŋ loɗi,
sa ma donot ka talamna dono na'ta as a gutum loɗi,
sa ma kursulina as a suɗ tuwam goy loɗi.
15Sa ma wi duur ma hiɗi ɓarawta as a fi donot loɗi,
sa ma jaŋ koloyo ma suɗ may loɗi,
sa ma ɓe kay kulumna ma suɗ tuwam goy kay tuwamɗi,
16sa ma dono suw sum sa wi duur kafna,
ma pir jaŋi hay buur namna ɗawni,
Din mi Ma-Vatɗina.
Currently Selected:
AMOS 2: Massana
Highlight
Share
Compare
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001
