LOPNA 2
2
Buur ta pantekotta
1Hay li ma buur yuldeta vi Pantekotta coowa, nisi ay dakay kaf hay liyn kepe. 2Ɗuw na kayn suwan may wuralawni pa ki bir ma ŋolla nala, nam hob ziyda ta nisi lakay haya'ta. 3Sin ki kuta nala ma ɓuraway goy tam tuwam pa, ɓet mus kay gige gige jarsiya. 4Nisi kaf hob hiɗi Ŋusta-Peldetta, tun caw law hay vun mara'a mara'a, kuɗ vulda ma Ŋusta vul tisi a di'e.
5May hay buur namna, Yudiyana sa viy kuɗ Lawna ay tokay hay Yerusalem, nisi may goy jar jaf-sumuna sa gaa kay nagat kuɗulu. 6Kuɗ suwana ma lina, sumuna ŋolo tokay ɦir', nisi viy goy diwiŋ', kay nisi humsi kus yoboyna gigekaw hiɗi vunna mara'a mara'a. 7Nisi lak ɦuŋgur', muɗi ɦuyum kaw, di ala: Ɗuwgiya sum sa lawn lakŋi nisi kaf say si sum sa Galileyan ɗisu? 8Nay as a hum gige gige hay vunna ma nay vuɗi hayamna kayni ir litige? 9Partena hiɗi Medena, Elamitna hiɗi sum sa hay nagata Mesopotamiya, hay Yudiya hiɗi Kapadokiya, Pontus hiɗi Asiya. 10Frigiya hiɗi Pamfiliya, Egipte hiɗi nagata hay Libiya gal Sirene, hiɗi sum sa may Rom pana, sa Yudiyana hiɗi sa vi kuɗ vida vi sa Yudiyana kaw, Kretena hiɗi sa Arabna, 11nay humsi kus yoboyna kay lop ma ŋulona vi Lawna hay vunna vay kayn litige? 12Nisi pet lakay ɦuŋgur', viy goy diwiŋ', tun caw di tuwsi jar-tuwsi ala: Van kayni ɗek mige? 13Segena buraha di'e: Nisi hobawa hiɗi vin ma jibetna.
Ɓakŋa vi Peter
14Peter fok kulo'o hiɗi sa doogo yam kepna, siwel hiɗi delem kulo'o, law tisi ala: Nigi sa Yudiyana, hiɗi nigi kaf sa ka lakay hay Yerusalem, wigi van kayni, jakgi humgi gaa tam yoboyna vanu! 15Sumuna tani say ɦoyay hiɗi vinna ki nigi var naɗi, kay nay ka hay leer ma ɦidina vi falayta tuwa. 16May kayni mi va ma di goy hay vun sa ma jobta-Lawna Jowel ala:
17Van ma li nala hay buur ma cawna,
din mi Lawna,
Nan ma ɦok Ŋusta van goy kay sumun kaf,
Guro-jufayna hiɗi guro-boyna vigiya ma di vun-jobta,
Sa joriyona vigiya slen ma vul tuwam kirsiya,
Sa maariyana vigiya kaw duwayt ma disiya.
18Awa, sa sunda vanu sa jufayna hiɗi sa boyna,
hay buur namna ɗawni,
nan ma ɦok Ŋusta van goy kisiya,
Nisi ma di goy kay slen ma vokŋa kaw.
19Nan ma li slen ma ŋulona kulo hay wuralawna,
hiɗi ɗekka gaa kay nagata kaw,
Busuwna, kuta hiɗi ɗugulla vi no'osna;
20Fatta ma muɗ jufunu,
Tilla ma muɗ busuwu kaw,
Jew a buurta vi Bum-Sumuna ma'a,
Buurta ta ŋolda hiɗi gajijit kuɗa'ta.
21Nala gigekaw ma yi sem Bum-Sumuna ma fi su'da.#2:21 Ɗuw hay Jwl 3:1-5.
22Nigi sum sa Israyella, humgi yoboyn kayni, Yesu ma Nasaretna, sa namna Lawn ɗekem goy vokgiya hiɗi ɗekka, gul-yalda hiɗi sle ma li sa ɦuyumna, ma Lawna lum hiɗi namu jargiya, ki nigi kay tuwgi wi nala; 23nam ma, Lawna hay ŋaɓta hiɗi wida-vokomta vulum goyo, nigi cum goyo, hay li ma nigi ɓalam kat gu-ma-grakŋa hiɗi ɓam sa jiw-zlata, 24Lawna dayam kulo'o, hay li ma nam butum goy hay tuw-tita vi mitta, kay donota vi mitta as kay vum gaaɗi. 25Kay David di goy kalam ala:
Nan wi Bum-Sumuna vok iran dok-doko,
kay nam ka musi gal ɓan ta jufta,
kay nan ma geɗ noŋɗi.
26Kay na'ta dikan li firiya,
vunan ka di firita goyo,
Sliw-tuwna vanu kaw ma tun suk hay sle'ta;
27kay naŋ ma hin ciwta vanu hay liyna vi sa mitinɗi,
naŋ ma hin ma peldetna vaŋu kay wi lo'da-goytaɗi kaw.
28Naŋ vulanu kay wi hagata vi irita,
Naŋ ma hoban hiɗi firita vok iraŋu.#2:28 Fi kayni hay Nul 16:8-11.
29Ɓosiyonna, nigi vulan hagata kay nan fi di goy tigi hiɗi gasita, kay buy David, nam ma mitiya, piya kaw, ma yam-usta valam ka ta-ta vaydi jaraya kaw. 30Ki nam ay mi ma jobta-Lawna, nam wi kaw ala Lawna ma vul deŋga hiɗi va ma yi kamna, kay nam ma mus kep kuɗ jafna valamu kay zlamda-mulda valamu, 31nam di yoboyn goy voko kay dayta-kulota vi Kristu, a nam ma hinis gaa hay liyna vi sa mitinɗi, a sliw-tuwna valamu ma wi lo'da-goyta noŋɗi kaw. 32Yesu namna Lawn dayam kulo'o, numa kaf as li di-goyta kay kayni. 33Hay li ma wulini nam ka musi hay ŋolda hay gal ɓam ta jufta vi Lawna, nam fi Ŋusta-Peldetta tam bumni pa, ta di-goyta li goy ka' jewe, nam ɦoka'awa goyo, ki nigi ka wa'a, ka huma' nala kaw. 34Kay David may kal kulo wuralawnɗi, may nam kay tuwam di ala:
Bum-Sumuna di tam Bum-Sumuna vanu:
Musaŋ hay gal ɓam ta jufta vanu
35Ta-ta nan ma muɗ sa gawt kaŋŋa,
goy mi va ma naŋ tun sem kamna.#2:35 Ɗuw hay Nul 110:1; 1 Kor 15:25.
36Kay na'ta jafna vi Israyel ma hum goy gasi ala Lawna lum goy Bum-Sumuna hiɗi Kristu kaw, kayni mi nam Yesu ma nigi ɓalam kulo kat gu-ma-grakŋa.
Vokŋa vi sa viyna sa tun jewna
37Hay li ma nisi hum dit kayni, na' geɗsi diksi ŋolo, nisi ka di tam Peter hiɗi sa apostolayna sa hena ala: Ɓosiyoma'na, numa ma li mige? 38Peter disiya: Hamgiya, gigekaw jargiya ma fi baptisma hay semda vi Yesu Kristu, kay gida vi sulukŋa vigiya; nala nigi ma fi vulda vi Ŋusta-Peldetta. 39Kay deŋga kayni vuli tigiya, kay gurona vigiya, kay sa ka goy gine'e kaw, lo kay vokŋa ma ŋolla ma Bum-sumuna Lawna vaya ma yumina kaw.
40Hay yoboyna mara'a mara'a ŋolo, nam li di-goyta tisiya, vulsi teŋ-irta, disi kaw ala: Nigi ma suɗ tuwgi goyo kay jaf ma gunin tani. 41Nisi sa vi kuɗ yoboyna valamu fi baptisma; hay buur namna kayni, sumuna sa cuk ay vunsiya ay goboy birim ɦidi.
42Nisi so tuwsi hay hatta vi sa apostolayna, hay tapta-kepta, hay ɓuraw-funa hiɗi siɗawta kaw. 43Narta vi gige gige kaf, kay sa Apostolayna li slen ma muɗ san ɦuyumna hiɗi ɗekka ŋolo. 44Nisi sa viyna kaf tapay kepe, slena visiya tapay kepe kaw. 45Nisi gus farayna hiɗi slena visi goyo, nisi ɓuraw sle ma nisi fumay kuɗumna kay sumun kaf, kuɗ va ma san minimna minimna. 46Hay buurta kaf hay so-tuwta, nisi lakay hay Tempella, hay varta kepe, nisi li ɓuraw-fun vutoŋo, ti tina visiya hiɗi firita vi dikga ma ŋal klasna kaw. 47Nisi subur Lawna, sumuna kaf di ŋaata kisiya, hay buurta kaf Bum-Sumuna ka tap sa suɗina jar sa ekklesiyana.
Currently Selected:
LOPNA 2: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001