2 TESALONIKŊA 1
1
Ɗek-tuwta hiɗi gi deɓta
1Paulus, Silvanus hiɗi Timotewus, tam sa viyna hay Tesalonika, hay Lawna Buya hiɗi Bum-Sumuna vaya Yesu Kristu: 2Lawna Bumna hiɗi Bum-Sumuna Yesu Kristu vulgi slugota tage.
Hay lasta may sa Tesalonikŋa ka ɦur voksiya
1 Tes 1:2-7; Fil 1:3-6; Mat 13:40-43
3Ɓosiyonna, bal ka kuma'a kay gi deɓ mi Lawna dok-dok kigiya, kayni hay liyamu kaw, kay vida vigiya ka wula, minda vigi ta jar-tuwgita, ta sa hena la' kay segena ka muɗ ŋol suwa suwa. 4Lo numa ka subur tuwma kuɗgiya hay tapna vi Lawna, hay so'otta hiɗi vida vigiya, hay lasta hiɗi makka vigi kaf ma nigi ka vum tigina kaw.
5Kayni mi ɗekka kay kitata ɗigerta vi Lawna kigiya, a nigi ma li goy si sum sa nagay kay mulda vi Lawna, na'a ta nigi ka ci las ka'ta. 6Kay kayni ɗigere kir Lawna kay hot lasta kay nisi sa lasgiya, 7kay vulgi migi nigi sa fi lastawa, tun-sukka hiɗi numa'a kaw, hay li ma Bum-Sumuna Yesu ma vul tuwamay goy dukalawni pa hiɗi sunda sa gaŋeraŋa, 8goy jar sin-kuta ma tilekŋa, kay wurak joota vi nisi sa wi Lawnaɗi, hiɗi sa hum kuɗ labara ma firina gatta vi Bum-Sumuna Yesuɗina. 9Kitata ma nisi fum ɗawni mi ɓulakŋa ma vatɗina, goy gine vok ir Bum-Sumuna hiɗi gajijita vi donota valamu, 10hay li ma nam ma ma'a, hay buur na'ta ɗawni, nam ma fi suburta tam sa peldetna valamu, nam ma ɗuw jifiya kir sa viyna kaw; may nigiya, nigi vi kayn kuɗ di-goyta vuma'a.
11Kay na'ta numa siɗaw dok-dok kigiya, kay Lawna vaya ma muɗgi nagay kay yita valamu, kay hob varta ŋaata haygiya, hiɗi gaŋeraŋ kaw, varta ŋaata vi minda valam kaf hiɗi lopna vi vida vigiya;
12kay semda vi Bum-Sumuna vaya Yesu ma fi gajijita haygiya, nigi hay namu kaw, kuɗ slugota vi Lawna vaya hiɗi Bum-Sumuna vaya Yesu Kristu.
Currently Selected:
2 TESALONIKŊA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001