2 MULIYANA 1
1
MULIYANA VI YUDA HIƊI MULIYANA VI ISRAYEL
Ahasiya mulla vi Israyel li moyo, nam cap mita
1Sum sa Mowabna yaw kulo'o kat sa Israyella bugol mitta vi Akab. 2Fat tara kep Ahasiya nigay kulo hay ir kaway-ciliyna vi ziyda valam ta kulota pa hay Samariya, nam cap li moyo. Nam cuk sa sunda, ka di tisi ala: Tuɗgi kuɗ Baal-Zebub Lawna vi Ekron jobom tige, nan as yer goy kay moyna van su? 3May sunda-wuralawna vi Ma-Vatɗina di tam Eliyas ma Tikbina ala: Fokaŋ kulo'o, tuɗaŋ ŋaf ir sa sunda vi mul ma Samariyana, naŋ ma disi ala: Nigi tuɗ job kuɗ Baal-Zebub lawayna vi Ekron kayn kay lawn mara may hay Israyelɗit su? 4Ki kayn nala Ma-Vatɗina di'e: Ezekiyas ma fok kulo kay va ma buura valamɗi, nam ma cap mita. Nala Eliyas kalay malamu.
5Sa sunda hotay kat Ahasiya. Nam ka jobsi ala nigi hotay kay mige? 6Nisi ka dum ala sa mara kep co ŋafma irma'a, nam duma ala: Hotgi kat mulla ma cukgiyayna, digit ala, Ma-Vatɗin di'e: Naŋ cuk sumun kay tuɗ job kuɗ Baal-Zebub lawayna vi Ekron kayni, Lawn may hay Israyelɗi su? Ki kayn nala naŋ ma fok kulo kay va ma buura vaŋɗi, naŋ ma cap mita. 7Ahasiya di tisiya: Sa namna ma ŋafgi irgiya kay kus yoboy namna hiɗi nigin kayni, jifna valam ir nanige? 8Nisi hotom dita: San kayni cuki talam mi bakŋa, kanti ma furamna mi ɗigiya kaw. Ahasiya di'e: Kayni mi Eliyas ma Tikbina.
9Nam gi soje ma ŋolla ma sumun kalam dok-vasln talamu, hiɗi sum sa dok-vasln kuɗum kaw. San kayni kalay kat Eliyas. Eliyas ka musi kulo kay sin-hiɗiyta, nam ka di talam ala: Sana vi Lawna, mulla di ay ala naŋ naysa. 10Eliyas hot dit tam sa ŋol ma sojen kalam dok-vasln ala: La nan mi sana vi Lawna, kut ma jikay kulo hay wuralawn pa kay ŋalaŋ goyo, naŋ hiɗi sum sa kuɗaŋ dok-vaslna. Kut jikay kulo hay wuralawn pa ŋalam goyo, nam hiɗi sum sa kuɗum dok-vaslna.
11Ahasiya gi sa mara ma sojen kalam dok-vaslna talam lo, hiɗi sum sa dok-vasln kuɗumu. Sa namna sli ditiya di tam Eliyas ala: Sana vi Lawna, mulla di ala naŋ tuɗis gosoyo. 12Eliyas hotom dit ala la nan mi sana vi Lawna, kut ma jikay kulo hay wuralawn pa, ŋalaŋ goyo, naŋ hiɗi sumuna vaŋ sa dok-vaslna! nala kut jikay kulo wuralawn pa, na' ŋalam goyo, namu hiɗi sumuna valam sa dok-vaslna.
13Ahasiya hot gi sa ŋolla mara'a ma sojen kalam dok-vaslna lo hiɗi sumuna valam sa dok-vaslna. Sa ŋolla namna ma nam gum sem ma ɦidina kaliya; hay li ma nam coowa tam Eliyas, nam girif gaa vok Eliyas, ka dum hiɗi giɗel-delta ala: Sana vi Lawna, nan siɗawaŋ ala naŋ hiɗi sa sunda vaŋ sa kuɗan dok-vaslna lakŋi irita vuma li kiraŋ jibet lige. 14Wulin kayni kut jikay kulo hay wuralawn pa, sa ŋulona sa co jewan ma' hiɗi sojen kisi dok-vasl dok-vaslna na' ŋalsi goy kafe, may wulin kayni, irita van ma li kiraŋ jibet lige. 15Sunda-wuralawna vi Ma-Vatɗina di tam Eliyas: Tapaŋ kuɗumu, laŋ nar kalam noŋ ne'ɗi. Eliyas fokay kulo'o, tapay kuɗumu kay tuɗ tam mulla. 16Eliyas di tam Ahasiya: Humaŋ dita vi Ma-Vatɗina: Kay naŋ cuk sumun kay job kuɗ Baal-Zebub lawayna vi Ekron, ki Lawn ma sa as job kuɗum hay Israyel may noŋɗi nala, naŋ as fok kulo kay va ma buura vaŋ loɗi, naŋ ma mita. 17Ahasiya mitiya, kuɗ yoboy ma Ma-Vatɗin dum hiɗi vun Eliyasna. Yoram ti mulda hay baŋalamu, kayni hay busata ma'ta vi Yoram, goora vi Yosafat, mulla vi Yuda; kay nam may fi goor noŋɗi. 18Caw lopna vi Ahasiya ma hinina, slen ma nam lumna, kayni ka ɗoy hay ɗerwelda vi Labar-Ma-Liyna vi muliyana vi Israyel.
Currently Selected:
2 MULIYANA 1: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001