1 MULIYANA 22
22
Akab fi mitta hay ɓam sa Siriyana
2 Lml 18
1Nisi li busat ɦidi bay duur li jar sa Siriyana hiɗi sa Israyella. 2Hay busata ɦidit kayni, Yosafat mulla vi Yuda kalay kat mulla vi Israyel. 3Mulla vi Israyel di tam sa sunda valamu: Nigi ka wi ala Ramot hay Galaad kayni mi fayna ɗisu? Nay as vi yayɗi kay tuɗ sla'a hay ɓam mulla vi Siriya. 4Nala nam di tam Yosafat: Naŋ min tapay kuɗanu kay tuɗ dur Ramot hay Galaadɗi su? Yosafat hot dit tam mulla vi Israyel ala: Numa as tuɗisa, naŋ hiɗi nanu nay kepe, sumuna van hiɗi sumuna vaŋ kepe, kulumayna van mi faŋŋa kaw.
5Bugol kayni Yosafat di tam mulla vi Israyel ala: Wulin kayni nan siɗawaŋu, kay naŋ ma job dita vi Ma-Vatɗina. 6Mul ma Israyella tok sa jobta, nisi ir ki kis-fiɗi nala, nam di tisiya: Nan ma tuɗ mok Ramot hay Galaad lebo tu'ɗi su? Nisi hotom dit ala: Tuɗaŋu, Bum-Sumuna ma vulsi hay ɓaŋu. 7May Yosafat di'e: Tan kayni sa ma jobta vi Lawna ma numa as job Lawn kuɗum mayɗi su? 8Mulla vi Israyel hot dit tam Yosafat ala: Sa mara ka lo ma nay as job Lawn hay vunamna, may sa namna kayni nan kaam gaw ŋolo, kay nam di law ma ŋaa'a kanɗi, nam dum kan kayn mi law ma joona tuta. Nam kayn mi Mikka, goora vi Yimla. Nala Yosafat di'e: Mulla, naŋ ma di ki kayn nalaɗi. 9Nala mulla vi Israyel yi sa ma patayn kepe nam dumu: Naŋ ma tuɗ gar Mikka goora vi Yimla aya.
10Mulla vi Israyel hiɗi Yosafat mulla vi Yuda, gigekaw ka musi kulo kay zlamda-mulda valam dam dam', cuki hiɗi sligar ma mulda katsi ca ca' may, ka lakay goy hay liyn (ma musta) goy vun-galana vi Samariya. Sum sa jobta kaf ka di yoboyn-jobta voksiya. 11Sedekiyas goora vi Kenaana kot miyokŋa ma kawayna, nam ka di ala: Ma-Vatɗin di'e: Hiɗi miyokŋ kayni naŋ ma jik sum sa Siriyana, ta-ta naŋ ma vatsi goyo. 12Sum sa jobta segen kaf ka di law ma voksina ki kayn nala kaw. Nisi ka di ala: Tuɗaŋ hay Ramot hay Galaad, naŋ ma kola, Ma-Vatɗin ma vula' hay ɓaŋu.
13Sa ma sunda ma kal yi Mikkana ka dum ala: Humaŋu, sa jobta vunsi ŋray kaf, nisi ka di sle ma ŋaana tam mulla; naŋ kaw, law ma naŋ dumna ɗawni ma li ŋray ca ki fisin nala, daŋgi mi law ma ŋaana. 14Mikka di'e: Ma-Vatɗin ka iriya, nan ma dum ɗawn mi va ma Ma-Vatɗin ma dantina.
15Hay li ma nam co kat mulla, mulla ka jobom ala: Mikka, nay ma tuɗ dur Ramot hay Galaad lebo tu'ɗi su? Nam hotom dit ala tuɗaŋu, naŋ ma kola, Ma-Vatɗin ma vulsi hay ɓaŋu. 16Mulla dumu: Naŋ ma yi va kaŋ sem gaage kay dan gasita hay semda vi Ma-Vatɗina? 17Mikka di'e: Nan wi sum sa Israyella kaf ka meray goy kay hiɗiyn ɓe'-ɓe', ki fok-dimin ma bay ŋomda nala; Ma-Vatɗin ka di lo: Sum nisin kayni mulsin mayɗi, hin gigekaw hot malam vo hay ziyna valam hiɗi sle'ta.
18Bugol kayni mulla vi Israyel di tam Yosafat: Nan may daŋɗi su? Nam may di law ma vokŋa ma ŋaa'a kanɗi! Dum kan kayni mi law ma joona tuta. 19Mikka hot di lo: Wulin kayni humaŋ yoboyna vi Ma-Vatɗina tige! Nan wi Ma-Vatɗina musi kay zlamda-mulda valam dam', sojena vi wuralawna kaf ka toki talamu, hay galam ma jufna hiɗi galam ma gulla kaw. 20Ma-Vatɗin di tisiya. Sa ma kuɗgi ma min ɗut Akab kay nam ma tuɗ hay Ramot hay Galaad, kay mit ɗawni mi gige? Nisi hot dit ir visiya visiya. 21Ŋusta tara kep co vok Ma-Vatɗina, na' ka di ala: Nanu nan min ɗutumu. Ma-Vatɗin ka da' ala nak ɗutum ɗawn ir nanige? 22Na' hot dit ala nan min kal goyo, nan ma muɗ ti ŋusta vi sinda hay vun sa jobta valam kaf. Ma-Vatɗin di'e: Nak ma ɗutumu, nak ma fumu, tuɗagu, lag ki kayn nala. 23Wulin kayni, humaŋu, Ma-Vatɗina kal yoboy ma sindawa hay vun sa jobta vaŋ kaf sa ka tani, Ma-Vatɗin col law ma joonawa kaŋu.
24Ki kayn nala Sedekiyas goora vi Kenaana co goboy tam Mikka, nam ci Mikka kulo geliyem til' ka dum ala: Ŋusta vi Ma-Vatɗina kalay goy hayan pa kay law hiɗi naŋ kayni gal arige? 25Mikka hot dita: Naŋ ma wi ɗawni hay buur ma naŋ ma jok kalaf hay ziy mara'a mara'a kay ŋay tuwaŋuna. 26Mulla vi Israyel di'e: Vaŋ Mikka kuɗaŋu, tuɗum kat Amon, sa ma ŋolla vi hoyok-ziyna, hiɗi Yowas goora vi mulla. 27Naŋ ma disi ala: Mulla di ala san kayni nigi ma gum daŋgaya, nigi ma vulumti mi funa hiɗi niyna ma asamɗina, ta-ta hay buur ma nan hotay sleɗ hulul' tuwa. 28Mikka di'e: La naŋ hotiyawa sleɗ' hululu ni, Ma-Vatɗin may law hiɗi della vanɗi. Nam ka di lo ala: Nigi sumun kaf humgi lawt kayn ŋaa'a.
29Mulla vi Israyel hiɗi Yosafat mulla vi Yuda kalay hay Ramot hay Galaad. 30Mulla vi Israyel di tam Yosafat: Nan min muɗ jifanu kay tuɗ vun duura, may naŋu, cukaŋ sligara vaŋ taŋu. Nala mulla vi Israyel muɗ jifamu, nam kalay vun duura. 31Mulla vi Siriya vul dit tam sum sa ŋulona sa dok-ɦidi yam ma'na vi keke-ma-duura valam ala: Nigi as mok sa gurayɗi lay sa ŋuloɗi lay, may nigi garam kayni mi mulla vi Israyel tuta. 32Hay li ma sa ŋulona vi keke-ma-duura irsi wi Yosafat, nisi di'e: Zawn mi mulla vi Israyel yo! Nisi co talam goboyo kay mokomu, Yosafat tun caw ciriya. 33Hay li ma sa ŋulona vi keke-ma-duura wi ala kayni may mi mulla vi Israyelɗi, nisi vi tuwsi goy talamu. 34Bugol kayni sa mara kep ɓe ɓarawt jar sumunis kuɗ moota, ɓarawt vi mulla vi Israyel hay gaŋ marayta, mulla di tam sa ma tuni vok keke-ma-duura valamna ala: Hotaŋiya, tuɗan goy gine hiɗi liy ma duura, kay nan fi millawa. 35Duur li dono ŋolo hay buur namna. Nisi mus mulla kulo hay keke-ma-duura valamu, goy vok sa Siriyana, hay vulatit kayn nam mita may. Busuwam jaŋ gaa hay keke-ma-duura. 36Hay li ma fatta ɗikawa, nisi tun caw siwel goy hay liyn kaf ala: Gigekaw kal vo hay hoyok-ziyna valamu valamu, gigekaw hay nagata valamu valamu. 37Ki kayn nala mulla mita. Nisi kalam kulo hay Samariya, nisi pum ɗawni may.
38Hay li ma nisi muz keke-ma-duura goy hay goloŋga vi Samariya kayni, durnayn tilek busuw Akab, boyn sa viyuwna muz tuwsi hay liy namna, kuɗ yoboy ma Ma-Vatɗin dumna.#22:38 Ɗuw 21:19 van liy goyo.
39Caw lopna vi Akab ma hinina, slen ma nam lum kafna, ziy ma hiɗi siy-slokŋa ma nam inimna, hoyok-ziyn kaf ma nam kotomna kaw, kayni ka ɗoy hay ɗerwelda vi Labar-Ma-Liyna vi muliyana vi Israyel. 40Akab mitiya, goora valam Ahasiya ti mulda hay baŋalamu.
Yosafat mulla vi Yuda
2 Lml 20:31—21:1
41Yosafat goora vi Asa ti mulda hay Yuda, kayni hay busata fiɗita vi Akab mulla vi Israyel. 42Yosafat ka hiɗi busat dok-ɦidi yam vasl hay li ma nam tun mulu, nam ti mulda busat dok-ma' yam vasl hay Yerusalem. Sulum ya' Azuba, na' ti goota vi Silki. 43Nam sla' kayni ti hagat ta bulum Asa sla'ta kafe, min cal goy noŋɗi, lum mi sle ma ɗigera kaf kir Ma-Vatɗina. 44May liyn ma ɗiŋiriŋŋa ma girifna may vat goyɗi; Sumun li ɗifini, hiɗi urdin kayni kulo kay liy ma ɗiŋiriŋŋa. 45Yosafat hiɗi mulla vi Israyel lakay kayn toyt ka jarsiya.
46Caw lopna vi Yosafat ma nam lumna, kursulita valamu hiɗi duur ma nam lumna kaw, kayni ka ɗoy hay ɗerwelda vi Labar ma Liyna vi gurona vi Yuda. 47Caw sum sa viyuwna sa ka hay nagatna, sa ays hay liyna vi bulum Asa pana nam yawsi goy hay nagata. 48Hay na'ta mul may hay Edom noŋɗi, musi kayni mi guverner ma nam gum kay ŋom nagata tuta. 49Yosafat kot lumayna vi Tarsis kay tuɗ hay Ofir gar ora; may nam as a co noŋɗi, kay lumayn kus goyo hay Esiyon-Geber. 50Nala Ahasiya goora vi Akab di tam Yosafat: Naŋ min ala sa sunda vanu ma tap hiɗi sa faŋŋa hay lumna su? Yosafat minɗi. 51Yosafat mitiya, nisi pum gaa tam sumiyam hay hoyok-ziyna vi bulum David. Yoram goora valam ti mulda hay baŋalamu.
Ahasiya mulla vi Israyel
52Ahasiya goora vi Akab ti mulda kay sa Israyella hay Samariya, kayni hay busata doogo yam siɗiyata vi Yosafat, mulla vi Yuda. Nam ti mulda kay sa Israyella ir busat ma'. 53Nam li slen ma joo'o kir Ma-Vatɗina, nam tuɗ hay hagata vi bulumu hiɗi sulumu, hay hagata vi Yerobowam goora vi Nebat, ma kal sum sa Israyella hay sulukŋa. 54Nam sun Baal, girif gaa vokomu kaw, nam muɗ dik Ma-Vatɗin Lawna vi Israyel ɦiya ki bulum li nala.
Currently Selected:
1 MULIYANA 22: Massana
Highlight
Share
Copy
Want to have your highlights saved across all your devices? Sign up or sign in
BIBALDA TA PELDETTA © L'Alliance Biblique du Cameroun, 2001